Пред илјадници посетители на свеченото отворање на големата фестивалска бина прилепскиот градоначалник Илија Јованоски, наздравувајќи им порача добредојде на сите посетители.
– Посакувам да се забавувате, да се дружите и со добра мисла да бидеме заедно во Прилеп овие четири фестиваски дена, рече Јованоски.
Атмосферата весела и на штандовите, на плоштадите, пред големата сцена, како и кај алтернативната на Камената бина на плоштадот „Александрија" и на неколкуте локации во градот со забава за сите генерации.
Според пиварниците и скараџиите, има голем интерес да се вкусат производите, а кулминацијата се очекува овие три дена, особено вечер и утревечер.
Анкетирајќи ги посетителите сретнавме домаќини кои чекаат гости од другите градови од земјава, а веќе се дојдени и гостите од соседството, како и нашинците од дијаспората, особено од Австралија. Неподелено е мислењето дека по Фестивалот, Прилеп е препознатлив во регионот, има 17-годишна традиција која треба да се одржува, а како што нагласува туристичкиот водич Милан Велески, „Пивофест" е голема туристичка атракција.
-„Пивофест" е препознатлив и атрактивен како настан во Пелагонискиот регион. Тој е туристичка атракција која го привлекува вниманието на посетителите и гостите од цела Македонија и од странство. мене ми се најавија гости кои моментално се во Скопје и во Охрид дека ќе го посетат „Пивофест". фестивалот треба да се развива, изјави Велески.
Голем број посетители привлекоа синоќешните изведувачи: „Прилепски еснаф", дуетот Селимова – Желчески, Ѓорѓе Давид и Ивана Негатив, а посебно внимание предизвика концертот на групата „Галија" кој ја воодушеви публиката. На алтернативната сцена на Камената бина за младите имаше музика и перформанси на стаклен светлечки робот кој предизвика големи атракции.
Денеска се очекуваат бројни посетители. Вечер на големата фестивалска бина ќе настапат: Ален Хасановиќ, Миле Кузманоски, Кантурови и на крајот Светлана Ражњатовиќ-Цеца. Во текот на утрешниот ден се очекува посета и на политичари и на дипломатски претставници во земјава.