Разрешувањето на Рангелова од директорската позиција во Драмскиот предизвика реакции и критики

Владината препорака за разрешувањето на Викторија Рангелова од директорската позиција во Драмскиот театар предизвика силни реакции и критики од повеќе театарски работници, но и од голем број на граѓани на социјалните мрежи.

Од Синдикатот на културата велат дека го чекаат владиното образложение за нејзиното разрешување. Одлуката според нив е изненадувачка, како и тоа дека таа доаѓа од Премиерот Заев, бидејќи мандатот на Рангелова бил добиен врз основа на јавен оглас на министерството за култура.

Рангелова денеска не беше достапна за коментар. Таа на позицијата директор беше десет месеци, а нејзината смена доаѓа како резултат на таканаречената метла број 2 на премиерот Заев.

Во текот на вчерашниот ден, повеќе од шеесетина директори и членови на управни одбори беа сменети од функциите, а меѓу повидните на листата се најдоа имињата на директорите на МЕПСО, Македонија пат, ЕЛЕМ и Македонски Железници. 

Освен разрешувањата, на владина седница помина и одлуката за избор на нови функционери. Васко Ковачевски од челната позиција во РЕК Битола ќе седне во директорската фотелја на АД Електрани, додека Милан Тоцев е нов директор на 11 Октомври – Еурокомпозит.

Владата одобри зголемување на буџетот за поддршка на иновациите на компаниите за 12 пати

Владата донесе одлука за давање согласност на „Програма за измени и дополнувања на Среднорочна програма за работа на Фондот за иновации и технолошки развој за финансиска поддршка на микро, мали и средни претпријатија за 2018-2020 година".

Со предложените измени, информираат од владината прес-служба, се предвидува проширување на буџетот на планираните јавни повици за технолошки развој од Планот за економски раст, како и проширување на буџетот за финансирање на проекти во рамки на тековниот повик за комерцијализација на иновации. Со овие измени директно или индиректно се таргетирани помеѓу 170 – 200 компании (зависно од буџетите и конечната одлука на Комитетот за одобрување на ко-финансирање) од пристигнатите 487 апликации.

Вкупниот обем на планирани инвестиции кај овие компании, се наведува во соопштението, е нешто над 87 милиони евра, од кои 67 отсто или над 58 милиони евра се побарано учество на Фондот, додека 33 отсто или околу 29 милиони евра се сопствени средства кои апликантите планираат да ги вложат во домашната економија. Иницијално предвидениот буџет за овој јавен повик е пет милиони евра, со што аплицираниот износ се надминува за речиси 12 пати.

САД го ратификуваше Протоколот за членство на Македонија во НАТО

Сенатот на САД вечерва со 91 глас за и 2 против ,го изгласа протоколот за членство на Македонија во НАТО.

Претседателот Стево Пендаровски им се заблагодари на САД и напиша дека стратешкото партнерство продолжува.

-Благодарност до САД за ратификацијата на Протоколот за нашето членство во #НАТО во Сенатот. Стратешкото партнерство САД-Северна Македонија продолжува во Алијансата придонесувајќи за глобалната стабилност и безбедност. #WEARENATO, напиша Пендаровски.

Уште четири земји остануваат да го ратификуваат Протоколот за земајва  и официјално да стане членка на НАТО.

Владата ги утврди законските измени за зголемување на минималната плата

Владата денеска во рамки на 160. седница го утврди Предлог  Законот за изменување и дополнување на Законот за минимална плата во Македонија.

Со измените се создаваат услови за корекција на минималната плата за 16 отсто, односно од 12.507 денари на 14.500 денари во нето износ со исплатата на платата за декември 2019 година, што претставува зголемување за речиси 60 отсто во однос на минималната плата пред првата корекција во 2017 година. 

притисни ентер