Македонија

Во Прилеп над 200 барања за социјална пензија, првите решенија до крајот на месецов

Голем е интересот за остварувањето на правото за социјална пензија во Прилеп.

Повеќе од 200 прилепчани на возраст над 65 години, за околу еден месец поднеле барање за остварување на ова право, вели директорот на Центарот за социјални работи – Прилеп, Живко Силјаноски.

– Законот стапи во сила од 28 мај. Законот за сигурност на старите лица или попознат како Закон за старосна социјална пензија, и даде можност на една цела категорија лица кои претходно беа слабо работливи, или лица корисници на социјална парична помош, или активни корисници на одредено право, неспособни за работа, да се пријават да го остварат своето право на таканаречената социјална пензија. Законот важи за лица над 65 години. Тие лица имаат надеж дека иднината ќе им биде обезбедена и гарантирана. Со решенијата им обезбедуваме сигурност да земаат по 6.000 денари месечно, објасни Силјаноски.

Посочи дека има повеќе од 200 поднесени барања, но повеќе од 600 лица се заинтересирани за социјалната пензија и се проверуваат документите.

– Наше е да ги провериме документите. Тие не треба да имаат приход по друг основ, ниту имот над седум декари земја, ниту заштеда преку 70.000 денари, ниту моторно возило и друг со нив кој остварува право на пензија. Едноставно, на сите кои загубиле надеж во иднината, им создаваме можност да го остварат тоа право за прв пат, рече Силјаноски.

Дејан Чупетрески, социјален работник, нагласи дека најмногу сметаат на социјалната пензија лицата со минимално образование и оние кои немале моќмост да соберат работен стаж.

-Тоа се главно луѓе над 65 години, кои се главно со основно и без образование и во животот не можеле да бидат на пазарот на трудот и со тоа да остварат стаж. Тие луѓе главно егзистирале од работа под наем за да ги остварат своите животни потреби, рече Чупетрески.

Според надлежните од прилепскиот Центар за социјални работи, ќе се посетуваат руралните средини.

– Имаме соработка со локалните власти да посетиме одредени населени места во општина Кривогаштани, да им објасниме за остварувањето на правото на социјална пензија, вели директорот на Центарот Живко Силјаноски и додаде за десеттина дена ќе стигнат и првите решенија за социјална пензија.

Македонија

Пендаровски: Понудата на Мицкоски за коалицирање е знак на слабост

Кандидатот за претседател Стево Пендаровски вечерва од Бутел рече дека е легитимно и дека е демократски избор секој да коалицира со кого сака.

Но, понудата на претседателот на ВМРО-ДПМНЕ, Христијан Мицкоски за коалицирање со неговата партија, уште на првиот ден од кампањата за парламентарни избори, покажува дека тој бара помош.

„Ние среде кампања не бараме помош од пријател. Мене ми се чини дека тоа е јасен знак на слабост, затоа што господинот Мицкоски знае што го очекува на 24 април и на 8 мај. Инаку зошто би барал помош од страна?“, рече Пендаровски, соопштуваат од неговиот тим.

Македонија

Портокалова велосипедска тура, изложба на карикатури и холандски пазар на Деновите на Холандија

По повод националниот ден на Холандија – Денот на Кралот, Амбасадата заедно со своите партнери го отвори второто издание на „Денови на Холандија“ во Ист Гејт Мол во Скопје.

Амбасадорот Дирк Јан Коп и извршниот директор на Ист Гејт Мол Игор Давков ги пречекаа посетителите со посебно искуство кое вклучуваше портокалова велосипедска тура, изложба на декорирани велосипеди, филмови во виртуелна реалност и холандски пазар.

Настанот започна со симболична портокалова велосипедска тура и изложба на велосипеди декорирани од средношколци од Скопје во организација на Гоу грин – Биди зелен. Покрај автентичните холандски производи во понудата на холандскиот пазар беа вклучени и локални продукти произведени со холандска технологија.

Во рамките на отворањето амбасадорот Коп ги објави и победниците на регионалниот натпревар за карикатури организиран од холандското Министерство за надворешни работи и организацијата Картун мувмент. Независно жири составено од претставници од сите шест држави од Западен Балкан ја додели првата награда на Душан Перишиќ од Србија а втората награда на Арменд Ајредини од Македонија.

Холандскиот пазар ќе биде отворен овој викенд (19-21 април) од 12:00 до 18:00 часот. Изложбата на карикатури може да се посети до крајот на април.

Свет

Германската шефица на дипломатијата во кавга со Нетанјаху за снимките од пазарот во Газа

Германската министерка за надворешни работи Аналена Баербок и израелскиот премиер Бенјамин Нетанјаху се судрија за време на состанокот во Ерусалим околу хуманитарната помош за Појасот Газа, пренесоа германските медиуми.

Баербок и Нетанјаху се судрија околу тоа дали жителите на Појасот Газа имаат доволно храна на располагање. Нетанјаху ѝ покажа фотографии на Баербок, наводно од северниот дел на Газа, каде што се вели дека хуманитарната криза е најлоша, а на кои што се гледаат пазари преполни со овошје, зеленчук и други прехранбени производи.

Како одговор, Баербок на својот мобилен телефон покажа фотографии од прегладнети деца од Појасот Газа и рече дека фотографиите што ги покажал Нетанјаху не се вистинити.

Според израелската ТВ станица Канал 13, израелскиот премиер рекол: „Ние не сме нацисти“, алудирајќи на пропагандните филмови на националсоцијалистичкиот режим кои сугерираа изобилство и добри услови за живот во варшавското гето во 1942 година.

Нетанјаху рече дека фотографиите на кои се прикажани преполните пазари во Газа се од израелската државна канцеларија Когат, која е задолжена за контакти со Палестинците и хуманитарна помош. Германското Министерство за надворешни работи воздржано реагираше на медиумските написи и соопшти дека тие „не го одразуваат вистинскиот тон“ што преовладувал за време на разговорите.

Според овие информации, Баербок, која вчера престојувала во Израел за да укаже на лошата хуманитарна состојба во Појасот Газа и да се бори за поголема помош, не му замерила на Нетанјаху дека фотографиите што ги има се лажни, туку дека не одговараат на севкупна слика за состојбата на цивилите во Газа.