ВМРО-ДПМНЕ: Прилеп е ова или Бронкс?

Откако во едно од најпосетените кафулиња беше оставена рачна бомба, прилепскиот огранок на ВМРО-ДПМНЕ ја обвини власта за намалена безбедност и раст на криминалот во градот.

Од ВМРО-ДПМНЕ се сомневаат дека тоа ќе се одрази и на посетеноста на претстојниот Пивофест.

Возач на мотоцикл и велосипедист потешко повредени во сообраќајки во Скопје

Возач на мотоцикл и велосипедист се здобиле со тешки телесни повреди во две од вкупно 15 сообраќајки што се случиле во текот на вчерашниот ден. 

Во осум со полесни повреди се здобиле 12 лица. Во пет била причинета материјална штета.

Од СВР Скопје информираат дека вчера сообраќајната полиција санкционирала 27 возачи кои се движеле со брзина поголема од дозволената, а од сообраќај исклучила седум возачи кои го управувале возилото под дејство на алкохол, 14 возачи пред да се стекнат со право на управување моторно возило и 20 нерегистрирани возила.

Санкционирани биле и тројца почетници, пет возачи поминале на крстосница на црвено светло, тројца возачи не дале првенство на минување на обележан пешачки премин, 17 возачи за не носење заштитен шлем, 10 возачи за не  користење сигурносен појас и девет возачи кои користеле мобилен телефон за време на управување на моторно возило.

Затекнати биле 63 возила непрописно паркирани, а со помош на специјалното возило „пајак", отстранети биле 46 возила. /МИА

Обновената брана Слатино ќе биде пуштена во употреба

Во Дебарца денеска ќе биде пуштена во употреба браната Слатино, реконструирана во рамки на Програмата на Европската Унија за санација на штети од поплави.

Браната Слатино беше сериозно оштетена и имаше потреба од обемна реконструкција. Со 1,2 мил. евра, ЕУ помогна да се намали потенцијалниот ризик од поплави и да се зголеми отпорот кон идните поплавувања. Таа ги поддржа и услугите за наводнување што браната ги обезбедува за локалното население.

На настанот, што е дел од кампањата „ЕУ за ТЕБЕ", кој има за цел да ја подигне свесноста и да ја информира јавноста за помошта што Унијата ѝ ја дава на земјата, најавено е присуство на шефот на делегацијата на ЕУ, Самуел Жбогар, претставничката на УНДП Нарин Сахакјан, министерот за земјоделство, шумарство и водостопанство, Трајан Димковски и градоначалникот на Општина Дебарца, Зоран Ногачески. 

Проектот го спроведе УНДП во соработка со Секретаријатот за европски прашања и Министерството за земјоделство, шумарство и водостопанство. 

ЕУ им помогна на земјата и нејзините граѓани да ги надминат последиците од поплавите со тоа што обезбеди 10 милиони евра во изминатите две години. Оваа помош од ЕУ беше наменета за приоритетните потреби и помогна да се реконструира транспортната и водната инфраструктура во најпогодените области, во согласност со принципот за одржливост „Повторно изгради подобро". /МИА

Лидерска ќе има, Заев повторно го повика Мицкоски да дојде

Лидерската средба закажана за утре најверојатно ќе се одржи во отсуство на лидерот на најголемата опозициска партија ВМРО-ДПМНЕ Христијан Мицкоски.

Премиерот Зоран Заев вчера на прес-конференција во Владата повторно го повика Мицкоски да дојде на средбата, истакнувајќи дека таа ќе се одржи без разлика на неговото учество и оти е негова одговорност дали ќе се појави на средбата. Мицкоски, пак, не го промени ставот дека не гледа потреба да присуствува на средба на која, како што рече во вторникот, ќе се разговара за се, а не за тоа што и е потребно на земјава – предвремени парламентарни избори. Присуството на средбата го потврдија Али Ахмети од ДУИ и Зијадин Села од Алијансата за Албанците.

– Јас сум подготвен за се да разговарам вклучувајќи го она што Мицкоски сака да го нотира. Правам уште еднаш обид, ред е да се појавиме таму. Не мора да се договориме за сите прашања, но треба да разговараме. Тоа е наша обврска, рече вчера на прес-конференција Заев.

Според него, не можеме да бидеме нормална земја ако лидерите не седнат да разговараат за пописот, бидејќи тој не може да се одложи за уште десет години.

Мицкоски бара да се разговара за предвремени избори, но, како што рече Заев, прво треба да се договорат за Изборниот законик, за чие носење препораки даде и ОДИХР. Според него, неодложно е и носењето на законот за Јавно обвинителство.

Премиерот повтори дека лидерската средба ќе се одржи в петок, сите теми се потенцијал за разговор, но оти нема намера да исполнува желба за предвремени избори.

– Немам намера да исполнувам желби за предвремени избори, иако знам дека ќе победам, дека власта ќе победи. Но немам намера само заради тоа за да не наштетам на економските перспективи на граѓаните, додаде Заев.

Сепак, Заев рече дека очекува Мицкоски да се појави на лидерската средба, истакнувајќи дека тој, како еден од политичките партиципиенти, ќе продолжи да ги турка процесите што ќе ја внесат државата во НАТО и ЕУ, како и зголемувањето на економските параметри, бидејќи, како што рече, тоа е очекувањето на граѓаните.

Од ВМРО-ДПМНЕ вчера немаше никаков коментар ниту, пак, реакција за повторниот повик на премиерот Мицкоски да присуствува на средбата.

На последната прес-конференција што ја одржа Мицкоски во вторникот побара оставка од Владата и предвремени избори, но и постави низа прашања поврзани со СЈО и инволвираните во случајот „Рекет".

Најголем дел од партиските преписки и прес-конференции вчера, пак, беа поврзани со случајот „Рекет" и сомнежите поврзани со специјалната јавна обвинителка Катица Јанева. /МИА

притисни ентер