Македонија

Полскиот претседател Анджеј Дуда побара ЕУ да продолжи со проширувањето

Пораки со поддршка и охрабрување, но и критики дека Европската Унија не го исполнила ветувањето кон Македонија и Албанија, упати домаќинот Полска на самитот ЕУ-Западен Балкан, што денеска завршува во Познањ.

Полскиот претседател Анджеј Дуда во воведните зборови пред Меркел, Меј, Едуард, Могерини, потенцира дека проширувањето не смее да биде на маргините, во момент кога Британија ја напушта Унијата. Само така, вели Дуда, Брисел ќе докаже дека европскиот проект е жив.

-Жалам поради одложувањето на преговорите со Северна Македонија и Албанија. Тоа не е добар третман за овие држави, зашто Европската Комисија беше задоволна од направените реформи, особено за решението на спорот меѓу Скопје и Атина. Европа е во тешка позиција, но кризите во Европа ќе ги има, без оглед дали во Унијата се шест, 10 или повеќе од 20 земји членки. Напротив, новите членки носат нова енергија, изјави Анджеј Дуда, претседател на Полска

Шестиот самит ЕУ-Западен Балкан, денеска е во формат на претседатели на Влади на шесте земји кандидатки за членство. Во рамките на состанокот, најавена е средба на премиерот Заев со францускиот колега, Едуард Филип, на која се очекува да ја разјасни позицијата на Париз, по острата изјава на Макрон, дека одбива ново проширување без длабоки реформи на Унијата. Токму на оваа тема, како што соопштија од македонската влада, Заев зборувал на работниот појадок во Познањ. Тој оценил дека реформите во Унијата можат да се одвиваат паралелно со процесот на проширувањето, изразувајќи убедување дека земјава во октомври ќе го добие долгоочекуваниот датум.

Автомобилизам

„Гугл мапс“ ќе може да го посочува најблискиот полнач за електромобили

Апликацијата „Гугл мапс“ за „Андроид“ и „Андроид авто“ доби надградба што со помош на вештачката интелигенција, ќе нуди попрецизни насоки како да се дојде до најблискиот полнач за електрични автомобили.

Се работи за функции што, според познавачите, ќе овозможат полесна навигација, како и безгрижно и лесно планирање на долги патувања.

ВИ-алгоритмот собира кориснички коментари што содржат точни податоци за локацијата на полначот и како да се стигне до него. Описот може да содржи и дополнителни информации околу времето на чекање итн.

Додека електромобилот е во движење, „Гугл мапс“ ќе може да му предложи на возачот и други станици за полнење во близина. „Гугл мапс“ ќе може да нуди и план за долги патувања, на пр. со повеќе застанувања. Станиците за полнење електрични возила ќе бидат предложувани врз основа на нивото на батеријата, брзината на полначот и достапноста - сѐ тоа во реално време.

Свет

Повеќе од 15 членови на семејството Кенеди ќе го поддржат Бајден на претстојните избори

Повеќе од 15 членови на познатото семејство на поранешниот американски претседател Џон Кенеди ќе ја поддржат кандидатурата за реизбор на американскиот претседател Џозеф Бајден.

Со овој потег тие ќе се обидат да ја намалат легитимноста на кандидатурата на Роберт Кенеди Џуниор, син на родениот брат на поранешниот претседател Џон Кенеди.

„Можам само да замислам колку би бил ужасен татко ми Роберт Кенеди од неверојатните лаги и однесување на Доналд Трамп“, рече Кери, сестрата на Кенеди Џуниор, додавајќи дека нејзиниот татко се залагал за „еднаквост, човекови права и слобода, токму како што денес тоа го прави претседателот Бајден“.

Здравје

СЗО загрижена поради големото ширење на вирусот на птичји грип

СЗО загрижена поради големото ширење на вирусот на птичји грип, кој еволуира и развива способност да зарази луѓе, тврди научник.

Светската здравствена организација денеска изрази загриженост поради големото ширење на птичјиот грип Х5Н1 меѓу новите видови, кој развива способност да зарази и луѓе.

„Мислам дека ова останува огромна загриженост“, изјави главниот научник на здравствената агенција на ОН, Џереми Ферар за новинарите во Женева.

Појавата на птичји грип почна во 2020 година и доведе до смрт на десетици милиони живина, при што се заразени и диви птици, како и копнени и морски цицачи.

Кравите и козите се приклучија на листата минатиот месец -- изненадувачки развој за експертите, бидејќи не се сметаше дека се подложни на овој тип на грип.