Вели дека ако добиеме ново одложување по се што направи земјава за да добие зелено светло за старт на преговорите, ќе нема лице да зборува пред македонскиот народ за придобивки од членството во унијата.
- Жал ми е да го кажам ова, но ако не започнеме преговори со ЕУ годинава, тоа за мене значи дека нема Европска перспектива. И се плашам дека по се што ние направивме во 2 години. Направивме очигледен демократски пресврт, имавме грешки, не сме совршени, но има очигледно движење напред кон Европска либерална демократија. Мислам дека шансите за успех во октомври се навистина заеднички и мислам дека немаме луксуз во денешна Европа да дозволиме да пропадне прилика која консолидира успех, вели Никола Димитров – министер за надворешни работи .
Амбасадорите на Унгарија, Полска, Чешка и Словачка во земјава тврдат дека поддршка за сигурен датум во октомври имаме од сите земји членки. Велат дека не треба да се разочаруваме бидејќи никој не е против датум за Македонија, а одложувањето од јуни за октомври е само поради технички причини. Но, за напредок и успешни преговори фокусот треба да се погрижиме за владеење на правото во земјава.
- Не бидете разочарани бидејќи никој на министерскиот совет не кажа дека е против за почеток на преговорите. Повеќе беше од технички причини. Има уште многу да се работи, но атмосферата за Северна Македонија е добра, затоа има добри шанси за датум во октомври. Мојата препорака е да се фокусирате најпрво на владеење на правото, а потоа се ќе биде подобро и полесно, се разбира - се зависи од административните капацитети на земјава, Хенрик Маркуш – амбасадор на Република Словачка.
Оптимистички пораки дека одложувањето на датумот е само поради процедурални причини на германскиот Бундестаг, пристигнаа и од Атина. Во телевизиско интервју грчкиот премиер Алексис Ципрас вели дека реформите кои беа побарани од земјава за датум кој ќе овозможи пристапни преговори со унијата - се исполнети.