Еуфорија на улиците на Истанбул, масовно се слави поразот на Ердоган на локалните избори

Истанбул доби нов градоначалник – опозицискиот кандидат Екрем Имамоглу на прегласувањето од изборите во март ја зацврсти победата над против кандидатот и екс премиер Бинали Јилдирим. 

Имамоглу кој пред 3 месеци победи со 13 илјади гласови разлика, сега доби 800 илјади гласа повеќе од Јилдирим. Десетици илјади граѓани низ улиците на Истанбул до доцна во ноќта ја прославуваа победата на Имамоглу, а многумина од нив во него веќе гледаат човек кој би можел да го победи Ердоган.

Имамоглу пак веднаш по победата го повика претседателот Ердоган на заедничка соработка, а на приврзаниците им порача дека го осветлиле образот на Турција.

-Сакам да се заблагодарам на секој граѓанин на Истанбул. Вие ја заштитивте репутацијата на турската демократија во очите на светот. Подготвен сум да работам со турскиот претседател во хармонија, и се стремам кон тоа. Објавувам пред сите жители на Истанбул, дека веднаш откако ќе стапам во функција сакам да го посетам за да му ги презентирам моите планови и мислења, но и да ги слушнам неговите, Екрем Имамоглу – Градоначалник на Истанбул.

Победата на опозициската републиканска народна партија во Анкара, а сега и во Истанбул се смета за силен пораз врз Ердоган, кој во минатото има кажано дека победникот во Истанбул ја држи цела Турција. Тој доцна синоќа на социјалните мрежи ги призна резултатите од прегласувањето.

-Би сакал резултатите од изборите да бидат од корист за нашиот Истанбул. Народната волја денеска се оствари. Му честитам за Екрем Имомоглу, кој победи на изборите според неофицијалните резултати- Реџеп Тајип Ердоган – Претседател на Турција.

Tурските аналитичари за дел од странските медиуми велат дека поразот во Истанбул може и да го собори Ердоган.

Може да е почетокот на крајот за Ердоган, ако не направи две работи: Прво, тој треба да ја сопре турската рецесија и да стави крај на острите мерки против рецесијата и угнетување на народот. Силната тактика со откажувањето на резултатот од изборите во Истанбул во март не помина добро ниту кај гласачите на владејачката партија. Турците можеби немаат целосно разбирање за тоа што значи демократијата, но се грижат многу за фер избори. 

Изборите за градоначалник на Истанбул беа повторени откако беа поништени резултатите од гласањето во март на барање на владејачката партија која се пожали на нерегуларности. Имамоглу во таа прилика победи со тесна разлика и беше градоначалник само 18 дена. Повторените избори за многумина се сметаа и како своевиден тест за власта на Ердоган.

Вучиќ: Очекувам Македонија и Албанија да ги започнат преговорите во март

Тие ќе го сторат тоа во март, бидејќи се плашат од резултатите од изборите на 12 април во Скопје. 

Очекувам преговорите за членство во ЕУ со Македонија и Албанија да бидат отворени во март, освен ако не се чека Самитот во Загреб во мај, изјави во Париз српскиот претседател Александар Вучиќ по средбата со неговиот француски колега Емануел Макрон, коментирајќи ги барањата на одредени земји за повторно ставање на гласање на одлуката за старт на пристапните преговорите со двете земји.

– Тие ќе го сторат тоа во март, бидејќи се плашат од резултатите од изборите на 12 април во Скопје. Тие не сакаат да бидат виновни за поразот на некој кому му ветиле нешто за нешто што тој направил, изјави Вучиќ.

Како што јави дописникот на МИА од Белград, српскиот претседател по синоќешната средба во Париз со Макрон истакна дека иницијативата за укинување на бариерите за слободно движење на стоки, услуги, капитал и луѓе меѓу Србија, Македонија и Албанија е поважна од повлекувањето на признавањето на Косово.

На прашањето дали добил поддршка од Макрон за „Малиот Шенген" и дали очекува притисок поради идејата, Вучиќ одговори дека оваа иницијативата нема да ја нарече со тоа име, иако веќе е влезена во секојдневна употреба, бидејќи тој назив „вознемирува некои луѓе, а и заради географската одредница".

– Никој не може да каже дека таа иницијативата може некому да му пречи, затоа што не постои рационална причина за тоа. Иницијативата е поддржана од САД и Макрон тоа ќе го стори јавно. Но, на некои земји може да им се каже да речат дека се против тоа заради нешто, затоа што сфатиле дека ја земаме судбина во свои раце и самите ги решаваме сопствените проблеми, истакна Вучиќ.

Тој нагласи дека ни на членови на неговото семејство не може да им ја објаснам важноста на оваа иницијатива. – Постариот син смета дека е позначајно повлекувањето на признавањето на независноста на Косово, а тоа не е ни близу до тоа, рече Вучиќ.

Српскиот претседател истакна дека е неопходно „да се стави на видело" европската иднина на регионот, додавајќи дека започнувањето преговори и потоа задржување десет години во отворање на поглавјата, само доведува до зголемување на бројот на противници на ЕУ.

Во исто време, смета Вучиќ, францускиот претседател Макрон е во право кога вели: „ќе преговарате, а потоа 10 години ќе отворате поглавја".

Притоа, според Вучиќ, ова ќе доведе до целосен „егал" на противниците и поддржувачите на ЕУ во земјите од регионот.

– Макрон, за разлика од другите, ја кажува вистината и не е лицемерен, додаде тој.

Вучиќ истакна дека на Србија не и пречи да продолжи да преговори по поглавјата и во меѓу време да бидат отворени структурните фондови со што земјата би добила над една милијарда евра со кои би се живеело подобро. – Но, тоа нема да се случи, истакна Вучиќ. /МИА.

Мицкоски се сретна со претставници на организацијата „Македонија 2025"

​Претседателот на ВМРО-ДПМНЕ Христијан Мицкоски денеска оствари средба со претставници на организацијата „Македонија 2025".

На средбата се разговараше за актуелната политичка ситуација, економската состојба и стратешките приоритети кои се клучни напредокот на Република Македонија.

Во текот на средбата Мицкоски посочи дека Владата на Зоран Заев не покажува суштински интерес за отстранување на недостатоците поради кои државава не доби датум за преговори.

Граѓаните се повеќе осиромашуваат поради оваа влада. Постојат 90 илјади блокирани сметки, како и половина милион кои живеат на прагот на сиромаштија. Предизборните покачувања најавени од владата се само нервозен рефлекс откако имаме три години стагнација и неисполнети ветувања, посочи Мицкоски.

На Република Македонија и е потребна нова влада, влада која ќе донесе реални проекти, а не празни ветувања. Влада која ќе се залага за остварување на проекти, а не влада кој има остварено само 2% од ветеното како што е сегашната.

Претседателот на ВМРО-ДПМНЕ истакна дека Македонија ќе се залага за отворен пристап и соработка со стопанството.

Мицкоски на крајот од средбата посочи дека време на реформи доаѓа по изборите на 12-ти април, кога ќе победи ВМРО-ДПМНЕ на предвремените парламентарни избори.

Центар за комуникации на ВМРО-ДПМНE

Шеесетгодишник од Крива Паланка загина во сообраќајна несреќа

Во сообраќајна несреќа што вчера попладне се случила на магистралниот пат А2, Куманово-Крива загина шеесет годишник од Крива Паланка.

Според информациите од портпаролот на СВР Куманово, Живкица Чавдаревиќ базирани на официјалниот билтен на МВР несреќата се случила на 11 ноември 2019 во 15 часот и 40 минути, на магистралниот пат Крива Паланка – Куманово, во близина на клучката на магистралниот пат со главната улица во градот.

До незгодата дошло кога патничко моторно возило „мерцедес", со кривопаланечки регистарски ознаки, управувано од шеесетгодишниот Д.И. од село Борово, удрило во 67 годишен пешак С.А. од село Градец, кривопаланечко.

Во незгодата Д.И. се здобил со тешки телесни повреди и бил пренесен во Комплексот клиники „Мајка Тереза" во Скопје, каде во 18 часот и 55 минути починал. Извршен бил увид на местото на настанот од екипа на Полициската станица Крива Паланка./МИА

притисни ентер