Свечена академија по повод 60 години постоење на ФЕИТ, Машински факултет и Технолошко-металуршкиот факултет

Трите технички факултети Машинскиот факултет, Технолошко-металуршкиот факултет и Факултетот за електротехника и информациски технологии, вчеравечер, на свечена академија одбележаа 60 години постоење.

Претприемничкиот дух и иновациите го движат светот, а нашата земја нема друг избор освен да чекори напред и да ги следи новите модерни трендови на дигиталното поврзување и трансформација. Наша цел е многу бргу да ја обезбедиме иднината на техничките науки, преку финансирање опрема за лаборатории како предуслов за развој на капацитетите на научните работници и како можност за нови развојни проекти што произлегуваат од науката, рече премиерот Зоран Заев во синоќешното обраќање на свечената академија по повод 60 годишнината на трите технички факултети во Скопје.

Заев нагласи дека развојот на државата се темели на поддршката што ја даваат техничките факултети. Дејностите за кои тие продуцираат кадри се исклучително важни зашто претставуваат основа за креирање нови работни места, нови вештини и нови бизнис модели на брзорастечки и конкурентни индустрии во глобалниот свет.

-Развојот на сите компании се потпира на знаењето на инженерите кои произлегле од овие три факултети: машинци, технолози, електро инженери има во секоја добра компанија како што се Алкалоид, ЕЛЕМ, ЕВН, Цементарница, Окта, винариите, пиварите, прехранбената индустрија, секаде,… Сите директни странски инвеститори прво доаѓаат на овие факултети за да се уверат во потенцијалите на човечките ресурси. Во таа насока, Владата заедно со академската заедница на овие три факултети и бизнис заедницата ќе продолжи да создава услови за да им ги отвори перспективите и патот на успехот на младите луѓе, истакна премиерот.

Рече дека нема да се задржува на минатото, туку дека сака да зборува за иднината.

-Државата финансиски зајакнува, јакнеме комплетно економски, нашата намера е да вратиме многу пари во знаењето преку опремувањето токму на овие, покрај другите факултети и универзитети во земјава. Од оваа година, дополнително, преку Буџетот се финансира и научно-истражувачката дејност во насока на проширување и континуирано унапредување, координација на субјектите за вршење на научно-истражувачката дејност, подвлече Заев.

Потсети и на првиот Научно – технолошки парк што го отвори пред неполни четири месеци Факултетот за електротехника и информатички технологии. Во него, рече, веќе почнаа да се развиваат нови вештини, да се раѓаат нови идеи, да се креираат нови иновации и изуми на студентите и професорите од сите три технички факултети.

-Некои млади луѓе ќе ги почнат и своите старт-ап бизниси. Со еден збор ќе се трасира патот на нашата заедничка иднина – патот кон напредокот и дигиталната револуција, напомена претседателот на Владата.

Трите технички факултети, Машинскиот, Технолошко-металуршкиот и Факултетот за електротехника и информациски технологии  на свечена академија одбележаа 60 години постоење.

На академијата, која се одржа во Македонската филхармонија, покрај премиерот Заев, зборуваат и ректорот на УКИМ, Никола Јанкуловски, како и деканите на трите високо образовни институции, Димитар Ташковски, Јон Магдески и Дарко Данев.

-Не постои општествена пора во која не придонел одреден инженер. Начинот на размислување и стилот на функционирање во светот на инженерите дава посебен и различен придонес во разнобојноста на општеството, рече ректорот Јанкуловски.

Трите технички факултети го прославија јубилејот под мотото „Создаваме иднина". 

Грчки медиуми: Политички случувања во Скопје по ветото од Франција

Медиумите во Грција ги пренесуваат изјавите на првите луѓе на Еврокомисијата, Жан-Клод Јункер и на Европскиот совет, Доналд Туск и на шефот на француската држава Емануел Макрон, но и на претседателот Стево Пендаровски.

„Ветото од Франција предизвика политички случувања во Северна Македонија"; „Бура во Скопје по кажаното „не" од ЕУ"; „Разочараност во Северна Македонија"; „Политички земјотрес во Скопје", се дел од коментарите во грчките медиуми по завршениот Самит на ЕУ, а случувањата во земјава беа дел и од синоќешните централни изданија на вестите на грчките телевизии, но и на насловните страници на денешните изданија на весниците, jави дописничката на МИА од Атина.

Медиумите во Грција ги пренесуваат изјавите на првите луѓе на Еврокомисијата, Жан-Клод Јункер и на Европскиот совет, Доналд Туск и на шефот на француската држава Емануел Макрон, но и на претседателот Стево Пендаровски, информирајќи за вонредната лидерска средба закажана за в недела, а во текот на вчерашниот ден пишуваа и за наводна оставка на премиерот Зоран Заев.

Грчката телевизија Антена коментира дека Франција ја блокираше европската перспектива на Северна Македонија, а државната телевизија ЕРТ, во прилогот во централното издание на вестите, коментираше дека постои разочараност во Северна Македонија.

– Европа им заврти грб на Скопје и Тирана. Зоран Заев и Еди Рама се враќаат со празни раце, коментира телевизијата Стар, додавајќи дека блокадата од Макрон предизвикува разврска на Балканот.

Во текот на вчерашниот ден во грчките медиуми кружеше информацијата за наводна оставка на премиерот Заев. Дел од информативните портали во Грција се повикаа на веста објавена од италијанската новинска агенција АНСА, додека пак во централните вести на телевизиите, новинарите коментираа дека постојат шпекулации за оставка, но и демант од Владата на Македонија.

– Според новинарски информации Ангела Меркел му се јавила на Заев и побарала да не поднесува оставка, додека пак и други странски лидери го повикаа премиерот на соседната земја да продолжи по патот на реформите, пишува Катимерини.

Паралелно медиумите во Грција ги пренесуваат и ставовите на грчкиот премиер Кирјакос Мицотакис, кој на вчерашната прес-конференција од Брисел рече дека резултатот не е добар ни за Балканот, ни за Грција, говорејќи за проширувањето на Унијата, односно како што рече за прашањето „за кое за жал не успеавме да се договориме"./МИА

Премиерот Заев одговараше на новинарски прашања

Претседателот на Владата на Република Македонија, Зоран Заев денеска се обрати пред граѓаните.

Тој ја искажа својата разочараност околу европското „НЕ“. По обраќањето, премиерот одговараше на новинарски прашања.

Сите прашања и одговори може да ги проследите во видеото.

Пратениците денес гласаат за Брегзит

Британските пратеници денес ќе гласаат за договорот за Брегзит на премиерот Борис Џонсон, што се гледа како историски чин по кој Лондон или ќе излезе од ЕУ или ќе западне во уште подлабока криза.

Пратениците ќе расправаат за договорот кој Џонсон во четвртокот на 17 октомври го постигна со лидерите на ЕУ.

Опозициските партии и Џонсоновите сојузници од Северна Ирска  веќе го отфрлиле текстот, но премиерот и неговиот тим ги помина последниве 48 часа обидувајќи се да добијат поддршка од пратениците, наведува „АФП“.

-Нема подобар исход од овој кој јас го заговарам, рекол Џонсон за „Би-Би-Си“, истакнувајќи дека договорот за Брегзит е фантастичен.

Џонсон претходно кажа дека Британија на 31-ви октомври ќе ја напушти ЕУ со или без договор.

притисни ентер