Сто и шест години од Тиквешкото востание

Сто и шест години од Тиквешкото востание се навршуваат денеска, 19 јуни, а историчарот Петре Камчевски од Кавадарци, во изјава за МИА раскажува детали за ова востание.

По завршувањето на Првата Балканска Војна и протерувањето на Турците од Балканскиот Полуостров, територијата на тогашна Македонија била поделена на интересни сфери на влијание. На десната страна на реката Вардар биле сконцентрирани српските воено административни сили или Тимочката дивизија, а на левата, бугарските воени сили, четвртата армија. Веднаш по назначувањето на потполковникот Драган Урошевиќ за командант и управник на Кавадарци, српските воени сили ги покажале своите асимилаторски и денационализаторски тенденции.

-Како прво, тој го разрешил кметот на Кавадарци Тасе Бошков и шестчлената мешана комисија составена од Македонци и Турци, кои привремено управувале со градот. Тој им кажал дека оттогаш па натаму, ќе било така, како што тој ќе кажел. Веднаш потоа биле истерани од работа сите учители, а на нивно место биле донесени учители од Србија. Оние кои сакале да останат, биле приморани да одат на курс во Белград, каде требало добро да го научат српскиот јазик и српската историја. Најнапред била затворена третокласната нижа гимназија во Кавадарци, а биле уапсени учителите Ристо Михов, Ѓошо Бадев, Борис Минчев, Димитар Коцев и други. Набргу истата судбина ги нашла и свештениците во Тиквешко, а нивниот архиерејски старешина Глигорие Лазаров бил претепан, затоа што се обидел да го пречека својот митрополит на железничката станица во Криволак. Во една турска куќа во Кавадарци, српските војници ги убиле сите нејзини членови, само затоа што им се спротивставиле на војниците да пљачкаат во куќата, раскажа Камчевски.

Тепана и бабата на Страшо Пинџур

Во селото Ваташа, продолжи тој, биле безмилосно претепани Зарко Илиев, Тодор Мицев и Лазар Хаџи-Јорданов, без никаква причина.

-Во истото село била тепана и измачувана и Наца Пинџурова, мајка на војводата Димитар Пинџуров, од неа било барано да каже каде е нејзиниот син. Бидејќи паднала во бессознание, комшиите ја кренале на носилка и ја однеле дома. Во Кавадарци бил убиен младинецот Александар Видов, кој на прашањето на управникот на градот, Урошевиќ, дали е Србин или не, одговорил негативно. Поради страв од револт на народот, неговото тело било тајно изнесено од градот и закопано на скришно место. Така што, до ден денешен не се знае каде е неговиот гроб. Во Ваташа била силувана Марија Тодорова од страна на поручникот Милан Керковиќ, само еден ден по нејзината свадба, соопшти Камчевски.

Револтот на населението од овој крај од ден на ден бил се поголем.-Така во почетокот на јуни 1913 година, поранешните војводи и револуционери, Дончо Лазаров, Мишо Шкартова, Димитар Пинџуров, Тасе Мурџев, Коцо Сеизов, Тодор Камчев и други, се собрале во куќата на Јованче Шкартов и се договориле да го подготвуваат револтираниот народ за вооружено востание. На овој состанок присуствувал и Петко Пенчев, претставник на бугарската Влада, кој им ветил несебична помош на востаниците. Тука биле и вооружените чети на ВМРО на Христо Чернопеев, Ѓакон Евстатиј, Васил Чакаларов, Петар Чаулев  и други, кои исто така понудиле поддршка за востанието. Бил формиран Главен штаб на востанието, во кој влегле дваесетина видни револуционери од Кавадарци, Неготино и Ваташа, информираше Камчевски.

Градот Кавадарци бил слободен седум дена

На 19 јуни востаниците го објавиле востанието, со биење на камбаните и пукање во општинскиот писар и другите српски чиновници во Кавадарци.

-По силниот напад, градот бил ослободен од српската власт. На општинската зграда било симнато српското знаме и било подигнато револуционерното, од 1903 година, на кое пишувало „Слобода или смрт", а под него, „Тиквешки револуционерен округ". Во наредните денови биле ослободени Неготино на 22 јуни и Криволак, како и сите поголеми села во Тиквешијата во кои имало сконцентрирано српска војска. Градот Кавадарци бил слободен цели седум дена, а биле ослободени и педесетина села, меѓу кои и некои од прилепска општина, рече Камчевски.

За тоа време не бил регистриран ниту еден инцидент помеѓу македонското и турското население во Кавадарци.

-По седум дена, голема српска војска предводена од Василие Трбиќ, помогната од башибозучки чети на Јован Бабунски, Јован Долгачот и Јаја Ага Малиќ, ги нападнале востаничките позиции кај Неготино, потоа кај Сирково, Рибарци и Манастирец. Штабот на востаниците бил на Љубаш, од каде се гледала целата линија на фронтот. Востаничките сили кога слушнале дека голема српска војска заедно со турските наемници се приближуваат кон Кавадарци, се разделиле на повеќе од 10 групи и се распоредиле фронтовски по целата линија на фронтот, на 5-6 километри северно од Кавадарци, во близина на селата Манастирец и Рибарци. Тука српските чети биле наполно разбиени и биле приморани да се повлечат кон Градско и Велес, оставајќи голем број убиени и ранети војници и големо количество оружје, меѓу кое и повеќе тешки митролези. На двапати српската војска повторно напаѓала и била одбивана и принудена да се врати назад, но отсуството на ветената помош придонела големата српска војска и башибозук да ги разбијат востаничките сили, кои биле приморани да се повлечат спрема Конопиште и планината Кожуф, раскажа Камчевски.

По задушувањето на востанието, настанал страшен терор.

-Биле убиени 545 луѓе, според наодите на Карнегиевата комисија, покрај тоа што вистинската бројка била многу поголема. Најмногу убиени имало во Неготино, 117, во Бохула 46, Ваташа 37, Сирково 26, Кавадарци 25, Дреново 13, Марена 12, Мрзен Ораовец 11 и слично. Биле запалени повеќе од илјада куќи, а 2700 луѓе биле затворени. Исплашени од репресалии, за кратко време од Тиквешијата се иселиле повеќе од 3.000 семејства, најмногу во Бугарија и никогаш повеќе не се вратиле во своите домови. Тиквешкото востание и последиците од него, го претставуваат најголемиот терор во поновата историја на народот од овој крај, завршува Камчевски./МИА.

(Видео) За Македонија се „невидливи“, ама затоа пак РТВ Србија им посвети емисија

Станува збор за емисијата на РТС - Квадратура на кругот, во која оваа недела темата беше граѓанската војна во Грција, и нашите сограѓани - бегалците од Егејска Македонија!

За жал, официјално се откажавме од нив, но тие се само уште еден доказ дека Македонци живееле и живеат во северна Грција, регион што тие си го нарекоа „Македонија“, додека ние од неодамна станавме Северни.

Српската државна ТВ се потсетува на овој страшен егзодус и вели:
„Во таа братоубиствена војна, во која од една страна се бореа вооружените сили на грчката влада, а од друга страна грчки комунисти, загинаа околу 50.000 луѓе, над половина милион беа внатрешно раселени, а повеќе од 50.000 избегаа само од Егејска Македонија“

50.000 наши луѓе, од кои преку 28.000 беа деца...сите Македонци.

( Видео ) Емисијата - Квадратурата на кругот

Полициска рација во близина на Москва – Откриена најголемата лабораторија за синтетичка дрога (ВИДЕО)

Полицијата изврши рација и ја затвори најголема нелегална лабораторија за синтетички дроги во Русија.

Дилерите се скриле на фарма недалеку од Москва, соопшти руското Министерство за внатрешни работи.

Тие објавија видео и фотографии од лабораторијата скриени на четири хектари фарма во Серпуково, на околу 100 км јужно од Москва. Откриле околу тон и пол синтетички дроги, околу 100 килограми кристали, тон и пол разни течности, четири тони реагенси, повеќе од 600 кг прекурсори , седум хемиски реактори и друга опрема.

Уличната вредност на лекот се проценува на повеќе од сто милијарди долари.

„Производството беше во тек кога влета полицијата“, рече портпаролката на Министерството, Ирина Волк. Тие пронашле и уапсиле  тројца хемичари, по потекло  Украинци, транспортер , како  и организаторите на целиот бизнис. Сите завршија во притвор и им се заканува казна затвор до 20 години.

Европол разби мрежа на криумчари на мигранти

Полската гранична служба, со поддршка на Европол, на 18. овој месец растурила организирана криминална група вклучена во шверц на мигранти.

Полската полиција уапси 17 осомничени членови на криминалната мрежа, од кои четворица, за кои се верува дека се главните организатори, се приведени.

За време на операцијата биле запленети телефони и компјутери, како и документи од регистрирани компании користени за полесно шверцување на мигрантите низ Европа.

Активна од 2012 година, групата овозможила нелегално да преминат мигранти од Источна Европа, Азија и Африка, главно во Полска, и во други земји на ЕУ и САД, соопшти Европол.

Криминалната мрежа соработувала со криминалци од различни земји, особено од Русија, Турција и Украина. Тие организирале нелегален влез во ЕУ за најмалку 13.000 лица при што заработиле над 2,3 милиони евра.

притисни ентер