Земјава се препознава како атрактивна дестинација за инвестиции и постои голем интерес од реномирани компании да инвестираат кај нас, изјавија премиерот Зоран Заев и вицепремиерот за економски прашања, Кочо Анѓушев на Форумот за Западен Балкан „Инвестициски можности во брзорастечкиот регион" во организација на Фајненшал Тајмс кој се одржува во Лондон.
Премиерот Заев истакна дека форумот е одлична прилика за промоција на земјава пред реномирани компании.
„Ги споделивме нашите искуства што ни се случуваат последната година. Денеска имаа можности бизнисмените и сите други да слушнат дека имаме 737 милиони долари СДИ во 2018 во споредба со 205 милиони долари во претходната година или за 260 % поголеми во споредба со просекот од претходните години, како расте индустријата и се намалува невработеноста“
Нашата држава е светла точка во Западниот Балкан. Ја искористивме оваа можност дополнително да ги информираме компаниите за економските политики на Владата и да ги промовираме можностите за инвестирање во земјава, истакна вицепремиерот Анѓушев во своето обраќање.
„Фокусот на Владата е да привлекува реномирани странски инвеститори, во изминатите две години 20-ина компании започнаа со инвестициски проекти, имаме рекордно ниво на странски директни инвестиции, раст на бруто домашниот производ, намалување на невработеноста, се се тоа позитивни економски параметри кои го мотивираат интересот на инвеститорите за нашата земја. Република Северна Македонија ја презентиравме како одлична дестинација за инвестиции, но и како локација во која се произведуваат квалитетни производи кои се извезуваат во Европа и светот.“
Фајненшал Тајмс е трет значаен настан овој месец, на кој пред претставници на реномирани компании се претставуваат економските политики на Владата и можностите за инвестирање кои земјава ги нуди.
Покрај Заев и Анѓушев на форумот во Лондон присуствуваа и српската премиерка Ана Брнабиќ, како и албанскиот премиер Еди Рама кој во Лондон група граѓани го пречекаа со исвиркувања.