Но, ги расчисти дилемите дека јуни е недофатлив за добивање датум. Тоа индиректно го појасни претседателот на Европскиот Совет, телото кое за 10-ина дена треба да се изјасни за Македонија. За Туск, неспорен е напредокот на земјава, и во реформите и во односите со соседите, но како што прецизира, консензус меѓу земјите членки се уште нема.
-Не сакам да ја предвидувам одлуката на ЕУ. Вие направивте сѐ што се очекуваше од вас. Но, сакам да бидам искрен со вас, не сите земји- членки се подготвени да ја донесат одлуката за отворање на преговорите во наредните денови. Прашањето денеска не е дали, туку кога. Јас сум претпазлив, бидејќи за постигнувањето на консензус меѓу сите 28 земји- членки на ЕУ е потребно повеќе време, отколку што јас би сакал. Но нема сомнеж дека местото на вашата земји и целиот регион е во ЕУ, изјави Доналд Туск, претседател на Европскиот Совет.
Пендаровски потенцира дека Македонија не бара незаслужена награда и дека донела храбри одлуки за чувствутелни прашања. Потсети и на улогата на земјава во справувањето со мигрантската криза пред три години, кога како што рече, го демонстрираше цврстото европско партнерство.
-Морам да истакнам една реалност – ние сме најефикасни кога пред нас имаме задачи, а преговорите за членство се најдобрата реформска алатка. Овој јуни ЕУ има историска можност да покаже лидерство и визија за иднината на целиот наш регион – со тоа што ќе и додели датум за преговори на Северна Македонија, порача претседателот Стево Пендаровски.
Во таква мисија денеска во Берлин отпатува и премиерот Заев, каде утре ќе има средба со канцеларката Меркел, по која, како што соопшти, ќе се искристализираат и политиките што ќе ги преземе владата. Заев очекува од Меркел да добие прецизни одговори кога формално би ги почнале преговорите и дали земјава на Европскиот Совет на 21-ви месецов ќе може да добие формулација која ќе гарантира почеток преговорите во разумнен период.