Македонија

Спасовски: Чешка даде најголема поддршка за време на мигрантската криза

Владата на Чешката Република за време на мигрантската криза даде помош за јакнење на техничките капацитети на МВР и е еден од најголемите поддржувачи на нашата земја генерално.

Ова го истакна министерот за внатрешни работи Оливер Спасовски за време на денешната заедничка посета со чешкиот премиер Андреј Бабиш на транзитниот центар „Винојуг" во Гевгелија.

Спасовски упати голема благодарност до Чешка за помошта што и беше пружена на земјава за време на мигрантската криза и нагласи дека професионалноста на чешките полицајци, заедништвото во работењето и споделувањето на искуства претставуваа исклучителна можност да се јакнат капацитетите на македонската полиција.

– Владата на Чешката Република со четири милиони евра даде помош за јакнење на техничките капацитети на МВР и во тој дел е еден од најголемите поддржувачи на Северна Македонија генерално, истакна Спасовски и подвлече дека тоа е најдобар показател за нашето партнерство и заедништво за справување со сите глобални предизвици како што впрочем беше и мигрантската криза.

Спасовски изрази подготвеност на македонската полиција за понатамошна соработка со цел за успешно справување со евентуална миграциска криза и генерално за обезбедување мир и стабилност во нашите држави, регионот и во Европа.

Со заложбите на Спасовски се согласи и чешкиот премиер Бабиш кој нагласи дека за него ова е посебно ценета посета.

– Би сакал да и се заблагодарам на тогашната Македонија и сегашната Северна Македонија за тоа што го направи во спречувањето на илегалната миграција. Сметаме дека со нашето присуство тука ја покажавме нашата солидарност во оваа криза во која вие останавте сами како Северна Македонија и сметам дека и во иднина ќе продолжиме да ви помагаме и да ве подржуваме, рече Бабиш.

За време на посетата во Гевгелија, Спасовски и Бабиш беа на граничниот камен 59 на јужната граница кој претставуваше порта на балканската рута до нејзиното затворање, а направија обиколка и на чешкиот контингент полицајци кои со своите македонски колеги ја обезбедуваат и чуваат јужната граница.

Култура

Хуманитарен концерт во сеќавање на Климентина Рафајловска

Во Салон 19:19 во Скопје вечерва ќе се одржи концерт во сеќавање на Климентина Рафајловска (1977-1994), која била ученик на пијано и харфа во училиштето „Илија Николовски-Луј”.

На програмата ќе бидат изведени дела од композиторите Сен Санс, Равел, Буланже, Штолцел, Пијацола, Хенсон, Капле, Форе и Шостакович.

На концертот ќе учествуваат музичари од нејзината генерација, Ема Абаџиева – обоа, англиски рог, Весна Ангелова Христов – пијано, Орце Ицковски – фагот, Гордана Јаневска – виолина, Тереза Крцоска – виолина, Јанинка Невчева – пијано, Јулија Нелковска – виолина, Надежда Рубен – сопран, Боро Станковски – виола, Елена Стојческа – флејта, Дарко Трајковски – виолина, Мерсиха Шукри – харфа.

Соученичката на Рафајловска, Мерсиха Шукри, која е единствената харфистка во земјава во изјава за МИА вели дека целта, меѓудругото, е и да се подигне свеста и поддршката за болните од рак.

- Климентина Рафајловска ни беше соученичка во музичкото училиште. За жал, за кратко време нѐ напушти, се разболе од леукемија. Оваа година се навршуваат 30 години од нејзината смрт. Во таа чест, генерацијата се собравме да одржиме концерт во нејзина чест. Воедно, да ја подигнеме свеста и поддршката за сите заболени од лошата болест, вели Шукри, додавајќи дека животот е непредвидлив и затоа е потребно многу повеќе љубов и разбирање.

Човекот е покршлив од стаклото и многу малку е свесен дека секому може да му се случи, вели Мерсиха Шукри.

Во чест на Рафајловска, од 1995 до 2008 година беше доделувана наградата „Климентина Рафајловска” за првенец на генерација, од страна на истоимената Фондација. Меѓу добитниците на оваа награда се и Симон Трпчески, Ирина Наумовска, Никола Атанасов, Александар Краповски и други.

Средствата собрани со продажба на билетите и од донаторската кутија, ќе бидат донирани на Здружението посветено на пациенти болни со рак и нивни негуватели ХЕМА-ОНКО, а наменети за потребите на пациентите на Универзитетска клиника за хематологија.

Регион

Единаесет лица се повредени во сообраќајка на бугарски автобус во Турција

Единаесет лица се повредени кога автобус со бугарски регистарски таблици што сообраќал од Истанбул за Бугарија се превртел во областа Киркларели во Турција, јави агенција та Анадолија.

Сообраќајната несреќа се случила на 50 километри од бугарската граница. Автобусот е на компанијата „Метро туризам“.

На местото на несреќата се упатени екипи на полиција и медицински лица.

Повредените, вклучувајќи го и возачот на автобусот, се хоспитализирани во околните болници. /МИА

Македонија

Сообраќајот тековно и без застои

Сообраќајот на државните патишта се одвива непречено, по претежно суви коловози. 

Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

Патниот правец Охрид – Ресен, преку националниот парк Галичица од 01.04.2024 е пуштен за сообраќај за сите видови возила со вкупна тежина до 3.5 тони.

притисни ентер