Мицкоски е за соработка со Владата за да се добие датум за преговори во октомври

Лидерот на ВМРО-ДПМНЕ Христијан Мицкоски ќе го понуди потенцијалот на неговата партија за да се добие датум за преговори со ЕУ во октомври. 

Рече дека ќе побара поддршка од Извршниот и Централниот комитет да се формираат работни групи кои заедно со Владата ќе ги утврдат проблемите и ќе работат на надминување на сите пречки за, како што рече, барем во октомври да добиеме датум зашто летово не можеме од објективни причини.

Во интервју во емисијата „Топ тема" на ТВ Телма вечерва тој рече дека не навива за неуспех на државата како што го обвинува СДСМ, и дека прв приоритет на неговата партија е доброто на граѓаните и тие, како што рече, да не бидат казнети поради неспособноста на власта. Не знае дали владата би ја прифатила неговата иницијатива за соработка.

– Загрижен сум за ситуацијата во Македонија, која како држава е во подредена улога. Македонија се води во апокалиптично сценарио, рече Мицкоски, додавајќи дека приоритет не им е „алчноста за власт" и предвремени парламентарни избори, но е уверен дека ВМРО-ДПМНЕ ќе победи и е исклучително подготвена за нив, а тоа, рече, го покажала на претседателските избори.

Во однос на пописот и најавата дека ќе го бојкотираат поради брзо носење на законот, лидерот на опозицијата во интервјуто рече дека инсистираат пописот да се спроведе според регулативата што ја практикува ЕУРОСТАТ која, рече, има јасни насоки, меѓу кои е лицето да биде присутно и најмалку 12 месеци да не ја напуштило државата. За ВМРО-ДПМНЕ пописот, рече, не е „политичка трговија од зелените пазари", туку реална статистичка операција која ќе даде одговор каде и како ќе се развива државата во следните десетина години.

-Ова што сега на брза трака се става во Собранието, без учество на опозицијата, е спротивно на она што денеска го слушаме од СДСМ и од ДУИ за европски вредности. Ова ни најмалку не наликува на тоа, туку повторно на една политичка трговија што наликува на зелените пазари. Зоран Заев ги отплаќа долговите на она што го позиционираше таму каде што е веќе трета година, рече Мицкоски.

Во однос на иницијативата за реформа на изборниот модел, рече дека постојат повеќе опции кои може да се разгледаат и дека ВМРО-ДПМНЕ тоа го прифаќа ако целта е да биде прифатливо за граѓаните, ако е одржливо и ќе ја олесни работата на ДИК, и доколку одговара на демократските критериуми.

-Мислам дека ќе понудиме решение што ќе одговара на интересите на сите граѓани, а не на политичките елити. Можеме да разгледуваме и отворени листи кои во прва фаза би можеле да се применуваат на локални избори, за да видиме како тоа би функционирало со изборот на советници, а во подоцнежна фаза да излеземе со предлог за таков вид на листи и за избор на пратеници во Собранието. Може да дискутираме и за изборен праг што ќе биде репрезентативен и ќе може политичките партии да се натпреваруваат за да го поминат. Интересно решение е и модел за 120 изборни единици итн, рече Мицкоски.

Опозицискиот лидер не ја отфрла можноста да се репреговара Преспанскиоот договор доколку Киријакос Мицотакис победи на предвремените парламентарни избори во Грција.

-Ако Мицотакис победи во Грција, а тој вели дека ќе ја отвори таа тема, и доколку бидеме поканети – зошто повторно да не седнеме на преговарачка маса и повторно го преговараме Преспанскиот договор кој е капитулантски и штетен за Република Македонија. Тоа нема да го правиме монополизирано како што тоа го правеше двоецот Заев – Ципрас, туку со сериозна екипа од експерти зад нас. И ние, и другата страна, имаме принципиелна позиција дека овој договор е штетен. Доколку формираме влада, ќе седнеме и ќе го репреговараме договорот, но на сериозен начин, со група експерти кои ќе бидат наша логистика за да го направиме подобар, рече Мицкоски. /МИА

Истражување: Заразата со корона е три пати помала меѓу вакцинираните

Целосно вакцинираните луѓе во Англија имаа три пати помала веројатност да бидат позитивни на коронавирус отколку невакцинираните, според британското истражување објавено денеска.

Ова е студија на научниците од Кралскиот колеџ во Лондон спроведена на 98.233 тестови за коронавирус помеѓу 24 јуни и 12 јули.

Вкупно 0,63 проценти од тестовите биле позитивни (или 1 на 158), при што процентот на позитивни кај невакцинираните изнесувал 1,21 проценти , а кај целосно вакцинираните 0,4 проценти. Студијата, исто така, посочува дека резултатите покажуваат дека вакцинираните луѓе имаат помала веројатност да го пренесат вирусот отколку невакцинираните, бидејќи количината на вирус во нивното тело е помала.

Сепак, некои британски претставници и научници повикале на претпазливост, откако владата ги олесни сите рестриктивни мерки на 19 јули, вклучително и укинувањето на задолжителното носење маски во одредени затворени простории.

Документ на американската влада протечен минатата недела предупредува дека инфекциите кај целосно вакцинираните луѓе не се толку ретки како што се мислеше и дека вакцинираните луѓе лесно можат да го пренесат вирусот.

Пол Елиот, професор во одделот за јавно здравје на Империјал Колеџот и директор за истражување, рече дека резултатите ги потврдуваат претходните податоци што покажуваат дека двојната доза на вакцината обезбедува добра заштита од инфекција.

„Сепак, ние исто така можеме да видиме дека сеуште постои ризик од инфекција, бидејќи ниту една вакцина не е 100 проценти ефикасна, и знаеме дека некои луѓе со двојна вакцинација сеуште можат да го добијат вирусот“, рече тој.

„Значи, дури и со олеснување на ограничувањата, сепак треба да дејствуваме со претпазливост за да се заштитиме едни со други и да ја спречиме стапката на инфекции“, додаде Елиот.

Бројот на дневни случаи во Велика Британија регистрирани од Министерството за здравство на Обединетото Кралство е намален по олабавувањето на мерките. Овој тренд ги изненади експертите кои предвиделе големо зголемување на бројот на заразени.

Стојанче Ангелов именуван за директор на ЦУК

Владата на денешната седница го именува Стојанче Ангелов за директор на Центарот за управување со кризи (ЦУК).

Ангелов досегаше беше на истата функција, но како вршител на должност.

По избувнувањето на пожарот во Кочани на 2 август и информацијата за несервисираните канадери, тој беше обвинет од опозицијата и од дел од јавноста, за лошо менаџирање на ситуацијата. ВМРО-ДПМНЕ побара од него и да си поднесе оставка.

Но, Ангелов неколку пати потенцираше дека не само што не направил никаков пропуст како прв човек на ЦУК, туку е и горд на реализираното во врска со гасењето на пожарот во Кочани.

-Најодговорно и категорично тврдам дека беа преземени сите мерки, се што ни беше на располагање се стави во функција тој ден. Не само што не направив пропуст, туку сум и горд на тоа што го направиме во Кочани, истакна Ангелов во денешното гостување на Канал 5 и најави тужба за пратеникот од Кочани доколку, како што рече, не му се извини за изнесените невистини.

За Ангелов, реакцијата на ВМРО-ДПМНЕ за пожарот во Кочани е невкусна и неточна, за добивање политички поени.

Русија планира да субвенционира набавка на домашни електрични возила

Русија планира да го субвенционира купувањето електрични возила од домашно производство за да ја зголеми побарувачката и производството, објави денеска руското Министерство за економија.

Употребата на електрични возила во еден од најголемите светски производители на нафта заостанува многу зад Европа, и во моментов во Русија не се произведува електричен автомобил. Но, руската влада има амбициозен план и размислува да обезбеди фискален стимул за зајакнување на секторот.

Од вкупно проценетите 45 милиони возила што возеле по руските патишта минатата година, само 11.000 се електрични, главно купени и веќе користени.

Преку субвенции, владата планира да покрие 25 проценти од набавната цена на секое електрично возило произведено во Русија, до максимум 625.000 рубли или 8.750 американски долари, најверојатно веќе следната година.

Русија има за цел до 2030 година да има годишно производство од 220.000 електрични возила, а официјалните лица велат дека некои странски компании покажале интерес за производство во таа земја.

Зголемената употреба на електрични возила ќе и помогне на Русија да ги исполни своите цели за намалување на штетните емисии на јаглерод. Русија се приклучи на Парискиот договор во 2019 година и планира до 2030 година да го намнали нивото на штетни емисии за 70 проценти од она во 1990 -тите.

притисни ентер