Од денеска од Скопје до Штип за половина час, пуштен новиот автопат

Новиот автопат Миладиновци – Штип, прв во источниот дел на државата, денеска е пуштен во употреба

. Инвестицијата во автопатската делница, долга 47 километри, изнесува над 200 милиони евра. Со новото автопатско решение времето за патување од Скопје до Штип се намалува за половина час.

Од Министерството за транспорт и врски апелираат до корисниците да се почитува поставената хоризонтална и вертикална сигнализација.

Автопатот е широк 27,4 метри, има четири ленти од 3,75 метри и две ленти за застанување од 2,5 метри. Проектираната брзина е 130 километри на час. По должината на автопатот има седум клучки. Делницата почнува после клучката Миладиновци, која има девет нови крака, долга е 1,5 километри и се спојува со коридорите 8 и 10. Последната клучка на автопатот е „Три чешми", каде ќе има спојување со новиот експресен пат во изградба Штип-Кочани.

Долж автопатот е поставена челична одбојна ограда, мрежа за заштита од животни, оптички кабел, звучни бариери, службени премини.

Изградбата на автопатот ја почна претходната Влада, во февруари 2014 година и според проектот и плановите тој требаше да биде готов до март 2017 година. По промената на власта надлежните институции соопштија дека има бројни пропусти во изградбата и незавршени активности, по што беа склучени два анекса на Договорот за изградба со изведувачот кинески „Синохидро".

Во изградбата на патот покрај „Синохидро" беа ангажирани и домашните градежни компании „Бетон" и „Гранит", односно над 800 работници од државава. Со Договорот се наложуваше кинескиот изведувач да ангажира подизведувачи и да набавува градежни материјали од државава во вредност од најмалку 49 отсто од вкупната цена на договорите, а бројот на македонски работници да биде најмалку 51 отсто од вкупниот број.

На терен во тек е изградба на автопатот Кичево-Охрид, во должина од 57 километри, што, исто така го гради „Синохидро". Според најавите, наскоро треба да се објави тендер за изградба на автопатот Скопје-Блаце, во должина од 13 километри. Финансиската конструкција изнесува 110 милиони евра, од кои 27 милиони евра грант од ЕБОР од каде се обезбедени и 20 милиони евра за првата делница од автопатот Гостивар-Кичево, на потегот Букојчани-Кичево.

Заразеното дете од струмичката градинка не ги затвори останатите дома

Околу 20 отсто од вкупниот број на деца, кои се згрижени во шесте клонови на градинката „Детска радост" од Струмица, денеска не биле донесени од нивните родители откако вчера беше регистриран првиот случај на заразено петгодишно дете со Ковид-19.

Според директорот Васил Бубев, се забележува мало отстуство на децата, но тоа во многу мал дел е предизвикано од вчерашниот случај.

-Можеби има нешто, но по сите анализи ние дојдовме до заклучок дека во периодот во кој се наоѓаме сега, почеток на градинката, како и секоја година кога се почнува, ова е период на прилагодување на самите дечиња и јас мислам дека родителите ги имаат задржано децата дома токму од таа причина дека е период на прилагодување и веројатно, еве, следува викенд, па нашле начин да им бидат децата дома покрај нив, рече Бубев.

Додаде дека по вчерашниот случај 11 деца и тројца вработени се во изолација, но потенцираше дека детето не е заразено во градинката, туку од член на семејството и од понеделникот не доаѓало во градинка.

Тој истакна дека дека градинката продолжува да работи според утврдените протоколи и прописи./МИА

Секое шесто дете во Македонија нема можност да следи онлајн настава

Секое шесто дете во Македонија нема можност да следи онлајн настава. Новата учебна година ќе ја почнат 258 илјади ученици.

Министерката за образование Царовска ја презентираше новата онлајн настава со објаснување дека државата може да овозможи пристап до интернет, но дека нема можност да обезбеди толку уреди за секое дете. Дополнителна обврска за училиштата ќе биде да ги печатат материјалите за секое дете и да ги достават до родителите и потоа назад да се вратат за да се оценат.

Засега голем предизвик останува и за родителите до трето одделение. Според првичниот план часовите на децата ќе завршуваат до 10.30 и се поставува прашањето како родителите ќе можат да ги земат децата во работно време од училиште и како да го продолжат денот.

Новата онлајн платформа ќе биде на пет јазика. 130 лица ја поминале обуката подготвиле 160 наставници кои исто така ќе вршат обука на колегите.

Средба на Независниот академски синдикат со Царовска

Членови на Извршниот одбор на Независниот академски синдикат (НАкС) вчера одржаа средба со министерката за образование и наука Мила Царовска, во просториите на Министерството.

Како што соопшти Синдикатот, пред Царовска ги презентирале анализите и истражувањата на НАкС за актуелните проблеми низ кои минуваат вработените во високото образование и студентите.

-Се се акцентираше делот за оценка на квалитетот во високото образование, улогата и законитоста на Интеруниверзитетската конференција, итноста за усвојување ажурирана Фраскатијева класификација, како и други недостатоци во Законот за високото образование кои се констатирани во периодот на неговата досегашна имплементација. Говорено е за итноста за вработување на млади кадри и замена на пензионираниот наставен кадар, системско структуирање на платите на вработените, потребата да се задржат студентите на додипломски и последипломски студии во државата преку стипендии, зголемено финасирање на научно-истражувачката и уметничка работа, како и да се овозможи пристап до базите на научни списанија, стои во соопштението.

Царовска одговори дека нејзините заложби за разрешување на посочените проблеми ќе се базираат врз нејзиниот даден мандат и постојната законска рамка што беше протолкувано од НАкС дека сегашната Влада и ресорната министерка се задоволни со донесувањето на Законот за ВО во изминатиот мандат на Владата и нема да се отвора прашањето за измени на ЗВО.

-МОН веќе има почнато да работи врз дефинирање на структурата на платите на вработените во високото образование. Во таа смисла, беше реафирмирано прашањето за колективен договор, чиј предлог- текст НАкС го има доставено до МОН пред нецела година. За потсетување на јавноста, овој Колективен договор предвидува дека платите на вработените во високото образование и наука треба да бидат пресметувани согласно коефициент во однос на минималната плата и да соодветствуваат на платите во регионот, стои во соопштението.

Околу финализацијата на Колективниот договор, министерката Царовска задолжи вработени во МОН да отпочнат со работа кон средината на октомври, оваа година, додаваат од Синдикатот./МИА

притисни ентер