Каратистот Дервиши го освои првиот медал за земјава на Балканското првенство за деца во Бања Лука

Членот на македонската карате репрезентација Нуредин Дервиши го освои првиот медал за нашиот национален тим на 24-то Балканското првенство за деца во карате што се одржува во Бања Лука, БиХ.

Дервиши, кој е член на КК „Ускана ” од Кичево, вчеравечер го освои трето место и бронзениот медал во неговата категорија во силна конкуренција од 27 натпреварувачи од сите балкански земји. Тој оствари вкупно четири победи, но загуби од претставникот од Турција кој стана балкански првак.

-Во првата борба беше поуспешен од претставникот на Србија кого го победи со 5:0 , потоа победи со 3:2 со вториот претставник од Турција, во третата борба го совлада претставникот од Бугарија со 3:2, по што следуваше поразот од балканскиот првак од Турција.На петтиот свој настап во репасаж за трето место беше поуспешен од хрватскиот претставник и победи со резултат од 5:0, со што освои бронзен медал, информира Неџби Дервиши, тренерот на нашиот репрезентативец.

Ова е прв медал за нашата држава на ова балканско првенството во карате за деца на кое борбите продолжуваат уште денеска и утре.

Забележан благ пад на новозаразени со коронавирусот, ефикасен протокол за безбедно гласање на изборите

Нови 120 случаи на Ковид-19 вчера беа регистрирани од направени 1.367 тестирања во претходното деноноќие.

Пет лица починаа, од кои по двајца од Скопје и Тетово и еден од Куманово.

На Клиниката за инфективни болести и фебрилни состојби почина 65-годишен пациент. Во ГОБ „8 Септември" почина 46-годишна пациентка, кај која вирусот е докажано постмортем. Во болницата во Козле е почината пациентка на возраст од 85 години. Во Тетово починаа две лица вон болнички услови на возраст 78 и 76, кај едниот Ковид – 19 е дијагностициран постмортем.

Институтот за јавно здравје регистрира 125 оздравени лица. Со последните статистички податоци, бројот на заразени се искачи на 7.244, на починати 351, а оздравени 3.324. Се уште се активни 3.569 заразени со коронавирусот.

Најмногу активни случаи се во Скопје, со вчерашните 63 инфицирани, вкупно 1.941 случај, најмногу во Чаир 373 Од другите градови најмногу заразени има во Тетово со 373, потоа Куманово со 197, Охрид 180 и Штип 160.

На Инфективната клиника хоспитализирани се 87 пациенти, од кои на кислородна поддршка се 51 пациенти, нема пациенти на респираторна машина.

Во болницата во Козле се хоспитализирани 27 возрасни пациенти позитивни на Ковид-19, три деца позитивни и два суспектни на вирусот.

Во ГОБ „8 Септември" вкупно хоспитализирани се 115 пациенти од кои на респираторна машина се тројца пациенти.

Во болницата во Битола се хоспитализирани 41, а во болницата во Штип се хоспитализирани 47 пациенти. На инфективните одделенија во Тетово, Охрид, Велес, Куманово, Прилеп и Гостивар се хоспитализирани 102 пациенти – позитивни и сомнителни на Ковид-19.

Министерот за здравство Венко Филипче вчера истакна дека веќе осми-деветти ден по ред паѓа факторот на преносливост, што значи дека бројот на случаи се намалува.

– Од минатата недела има помалку случаи отколку што тоа беше просек трите претходни недели, што значи дека постепено посебно во некои делови во Скопје спласнува ситуацијата. Има спорадични случаи во другите градови. Сето тоа се работи коишто ги земаме предвид кога ги евалуираме барањата во однос на организација и попуштање за некои сегменти на сè уште рестриктивните мерки. Утрово беа претставници на организацијата ХОТАМ коишто побараа да се организираат свадби. Се разгледуваа протоколите коишто тие ги предлагаат, меѓутоа заеднички беше заклучено дека треба да помине уште најмалку една недела, што значи дека за една недела ќе се донесе соодветна одлука за организирање на свадбите, истакна Филипче.

Министерот за здравство потенцира дека одржувањето на изборите не се фактор за одредувањето на рестрикциите. А рестрикции ќе се воведат ако ескалира состојбата.

– Нема никаква индикација да се прави дополнителна рестрикција на движењето со оглед на тоа што паѓа бројот на случаи, рече Филипче.

Министерот за здравство вчера испрати видеопорака дека се преземени сите мерки гласањето на предвремените парламентарни избори да биде безбедно.

– Министерството за здравство, во соработка со другите институции, изготви сигурен и ефикасен протокол за заштита на здравјето на граѓаните при гласање. Сакам од мое лично име и од името на комисијата, да ве уверам дека на денот на изборите ќе биде сосема безбедно да се гласа и со тоа да го остварите вашето граѓанско право. Гласањето нема да биде помалку безбедно од која било друга нормална активност која ја вршиме секојдневно, како одењето во маркет, истакна Филипче.

На вчерашната седница Владата го утврди Протоколот за работа на Дневните центри за деца и лица со попреченост во услови на епидемија на заразната болест КОВИД-19.

На седницата беа усвоени и измени и дополнувања на Протоколот за начинот и условите за организација на настани исклучиво на отворен простор.

Министерот за внатрешни работи Наќе Чулев информираше дека досега се констатирани вкупно 27.326 прекршоци за неносење лична заштита на лицето.

ЕУ вчера испрати 65.000 хируршки маски за Македонија, Црна Гора, Србија и Хрватска.

Освен овие нови 65.000 маски, ЕУ веќе има доставено 370.000 заштитни маски на земји на кои им се потребни.

Внимателно се следи и состојбата во соседните земји, каде што е забележан пораст на новозаразени и доколку е потребно македонските власти најавија и рестриктивни мерки на границите.

ВМРО – ДПМНЕ: Филипче злоупотребувал службени возила да оди по митинзи

Доктор и министер за здравство да не го интересира здравјето на граѓаните е крајно неетички. 

Додека колегите колабираат од замор во борба со корона вирусот, да се трча на митинзи за да му се статира на Заев е срамно.

Наместо да се инвестира секој денар во справување со корона кризата, да се злоупотребуваат службени автомобили за одење по митинзи е криминал.

Јавното обвинителство мора да престане да се прави слепо и да ги истражи злоупотребите на Филипче констатирани од ДКСК.

Дури народот заболува и умира, Шекеринска, Филипче и Заев секој ден заглавуваат во афери за криминал, корупција и рекет

Народот виде со каква неспособна власт на Заев, Шеќеринска, Филипче и СДСМ си има работа.

Цел месец Македонија се бори со трицифрени бројки новозаразени што е резултат на нивната лажна нормалност. Последното деноноќие имаше 120 заболени и 5 починати, со што вкупните бројки се 7244 заболени и за жал 351 починат, со што сме црни рекордери во регионот по двата параметри на еден милион жители.

Единствено успешни се покажаа во креирање и заштита на криминални и рекетарски шеми.

Јавноста уште чека одговорност за седенките на Шекеринска со двајцата осудени во случајот Рекет.

Јавноста уште чека одговорност за бизнисот кој му го договарал Заев на про рускиот бизнисмен Дака за кој биле дадени 300 илјади евра.

Јавноста уште чека одговорност за сведоштвото дека рекетираните пари во Македонија завршиле кај браќата Зоран и Вице Заеви.

Јавноста чека одговорност и за пазарењето со правдата во износи од 4,6,8, милиони евра.

Јавноста чека одговорност за снопчињата пари кои Ден Дончев ги ставаше во својата чанта.

Јавноста уште чека одговорност за сведоштвото дека рекетарско мафијашки групи палеле возила со зелено светло добиено од Вице Заев.

Ете заради ова системот во Македонија е урнисан и државата тоне секој ден со власта на Заев.

СДСМ и Зоран Заев покажаа дека можат само повеќе криминал, повеќе рекет, повеќе корупција, повеќе порази и повеќе понижувања! Да ставиме крај на виткањето на кичмата! Исправи се Македонијо, одбери Обнова!

Центар за комуникации на ВМРО-ДПМНЕ

Симулација на безбедно гласање со примена на сите здравствени мерки и препораки во пресрет на изборите на 15 јули

Државната изборна комисија (ДИК) денеска на избирачко место во средното училиште „Јосип Броз Тито" ќе спроведе симулација на безбедно гласање со примена на сите мерки и здравствени препораки. 

Во симулацијата, која се одржува во пресрет на предвремените парламентарни избори на 15 јули, ќе биде опфатен целиот избирачки процес во реални услови.

-Почнувајќи од доаѓањето на граѓаните на избирачкото место, чекањето, влегувањето, дезинфекцијата, идентификација, се што е по закон, со посебно напоменување на сите здравствени мерки кои треба да ги почитуваат граѓаните, но и самите изборни органи и домашните и странскирте набљудувачи, најави вчра на седница Борис Кондарко, член на ДИК.

На настанот се поканети медиумите, домашни и странски меѓународни мисии, меѓу кои и мисијата на ОБСЕ/ОДИХР, претставниции на Министерството за здравство, како и претставници на амбасадите. Поканети се и учесниците на изборите односно политичките партии. /МИА

притисни ентер