Заев на одбележување Светски ден на културна различност

Премиерот Зоран Заев вечерва присуствуваше на настан организиран од Комисијата за односи со верските заедници и религиозни групи, по повод одбележување  Светски ден на културната разноличност за дијалог и развој, којшто е прогласен на 21 мај.

Како што соопштуваат од владината прес-служба настанот го отвори директорот на Комисијата за односи со верските заедници и религиозни групи, Даријан Сотировски, кој им посака добредојде на присутните, и нагласи дека оваа манифестација ги заокружува активностите реализирани во рамки на „Неделата на заедничка молитва", реализирана од 13 – 21 мај со цел да се поттикне соработката и дијалогот меѓу верските заедници, за стабилен и одржлив процес на градење доверба, пријателство и општество на вистински човекови вредности, на соживот и напредок.

Премиерот Зоран Заев испрати порака дека културната разноличност е од корист за целото човештво.

– Светскиот ден на културната разноличност за дијалог и развој – не потсетува дека не треба да зборуваме за културни разлики што не делат едни со други, туку дека треба да зборуваме за културна разноличност која ни дарува сила од глобални размери, која може да биде од корист на целото човештво, истакна премиерот и додаде дека ова е ден за порака дека интеркултурниот дијалог е најдобрата гаранција за мирен, праведен и одржлив свет на културна разноличност.

Според него културната разноличност е инспирација и мотивација за креативноста како инвестиција за промени за подобри општествата,  општества со хуман, човечки лик.

-Инвестицијата и должноста на нашето општество е да ги развиваме образованието и меѓукултурните вештини кај младите луѓе за да ја одржиме разноличноста на нашата земја и да научиме да живееме заедно со разноличноста на нашите јазици, култури и религии, за да ја градиме нашата инвестиција создадена токму од разноличноста на културите и традициите на народите на нашата земја – инвестицијата Едно општество за сите, рече Заев.

Тој истакна дека Светскиот ден за културна разновидност за дијалог и развој ни дава можност да го продлабочиме нашето разбирање на вредностите на културната разноличност и да научиме да живееме заедно како едно семејство што дели заеднички вредности.

-Треба безрезервно да прифатиме дека секој од нас има шанса да направи нешто за разноличноста и инклузивноста да станат алатки за дијалог и разбирање, за мирот и безбедноста, како неопходни за одржливиот развој на нашата заедница, рече премиерот.

Истакна дека прашање на нашата иднина е да ја интегрираме културата на сите наши заедници во сите наши развојни принципи. -Особено, потенцира, оние поврзани со младинските прашања, како што се образованието, јавното здравје и животната средина, како наш придонес за развојот на хармонично општество со сите разлики, рече премиерот.

На одбележувањето присуствуваа претставници на државни институции и граѓанскиот сектор, како и сите претставници на верските заедници во РСМ.

Совет за реформи во правосудството: Јавните обвинители да бидат избирани од Советот на јавни обвинители

Избор на шеф на кое било јавно обвинителство на предлог на политичките партии, вклучувајќи ја опозицијата е решение кое отвара врата за политизација во јавнообвинителскиот систем.

Ова им го препорачаа членовите на Советот за имплементација на Стратегијата за реформи во правосудството на политичките партии и пратениците во Собранието на денешната тринаесетта седница на Советот на која беше презентирана информација за разговорите за обезбедување мнозинство за донесување на Законот за Јавното обвинителство.

– Постапка во која политички партии, односно опозицијата би предлагала јавен обвинител, може да обесхрабри квалитетни обвинители да се јават на конкурсот за шеф на обвинителството. Поради тоа, Советот препорачува да не се прави исклучок за било кое јавно обвинителство и да се задржи уставниот принцип Советот на јавни обвинители да ги избира шефовите на јавните обвинителства, соопшти владината прес-служба.

Министерката за правда, Рената Дескоска, информирала за текот на разговорите, за решенијата за статусот на обвинителството надлежно за гонење висока корупција, за прашањата поврзани со Специјалното јавно обвинителство, за критериуми за избор на обвинители и за други прашања отворени за време на разговорите. /МИА

Мадуро наскоро во посета на Москва

Кремељ денес најави дека претседателот на Венецуела, Николас Мадуро наскоро ќе ја посети Москва.

„Подготовките за таа посета се во тек и таа наскоро ќе биде реализирана. Ќе ги соопштиме датумите“, изјави за новинарите портпаролот на Кремељ, Димитриј Песков, пренесува „Тас“.

Рускиот заменик министер за надворешни работи, Сергеј Рајбков, во јули за време на посетата на Каракас разговараше за подготовките за посетата на претседателот на Венецуела.

Во Берово означен стартот на работите за рехабилитација на локалната патна инфраструктура

Во Берово денеска беше означен стартот на работите за рехабилитацијата на локалната патна инфраструктура за поврзување на повеќе села од општината до регионалниот пат, во вкупна должина од седум километри. 

Вредноста на овој проект како што истакна премиерот Зоран Заев кој присуствуваше на стартот на градежните работи е околу 15 милиони и 600 илјади денари, од кои 13,3 милиони се обезбедени преку програмата за рурален развој од Владата на РМ, а остатокот се буџетски средства на општина Берово.

-Реализацијата на овие и другите проекти од оваа програма ќе придонесе за севкупен развој на инфраструктурата во Македонија. Со ефикасното искористување на овие мерки, ќе се решат проблемите со комуналната и патната инфраструктура во руралните средини. Реализацијата на проектите ќе обезбеди солидна урбана и транспортна инфраструктура, но и надвор од руралните населени места, со единствена цел, подобрување на условите на граѓаните и позитивно влијание на развојот на економските активности, рече Заев.

Дури 80 општини во нашата земја, како што додаде, имаат поднесено над 200 капитални проекти за три мерки од програмата за рурален развој.

-Овие проекти доволно ја илустрираат вредноста и неопходноста за развој на општините што ќе произлезе од капиталните инвестиции во изградба и реконструкција на локални патишта потребни за поврзување на населени места, изградба и реконструкција на пазар, партерно уредување, плоштади, домови, мостови, водоснабдителни системи и мрежи, како и за инвестиции за развој на одредени туристички точки кои што може да бидат интересни како за домашните така и за странските туристи, додаде Заев.

Посочи дека мерките се подобрување на квалитетот на живот во руралните средини, обнова и развој на селата и зачувување и унапредување на традионалните вредности во руралните подрачја. За реализација на овие мерки оваа Влада обезбеди 38 милиони евра, а досега се потпишани 19 договори, меѓу кои е и овој договор. Останатите се во фаза на потпишување после што ќе следуваат тендерските постапки.

Премиерот додаде дека Владата на РМ со оваа програма како и со повеќе други мерки и активности останува посветена на поддршката на развој и подигање на капацитетите на единиците на локалната самоуправа, со тоа што во месец ноември како што информираше ќе се распишат и постапките за изградба на локалните патишта.

-Некаде во ноември ќе се распишат и постапките за изградбата на локалните патишта за кои обезбедуваме 70 милиони евра средства од Светска банки и некаде од 100 милиони дополнителни за водоводи и канализации на територијата на цела земја, дополни премиерот.

Изрази надеж дека општина Берово ќе го врати брзо сјајот на  една модерна и просперитетна туристичка општина во нашата Источна Македонија.

На настанот присуствуваа и Министерот за земјоделство Трајан Димковски, како и директорот на Агенцијата за финансиска поддршка во земјоделството Николче Бабовски кои истакнаа дека преку програмата за рурален развој во наредните две години ќе се инвестираат 38 милиони евра, се со цел младите да се задржат во родните огништа.

-Да напоменеме дека целата програма во која учествуваат 80 општини е 38 милиони евра кои ќе се инвестираат во наредните две години, а целта е да се подобри условот за живот во руралните средини.Секако во развојот на руралната средина е и оној алтернативен туризам кој што допрва треба да се вложуваат од страна на Владата, а секако во овој дел се можностите за искористувањето на европските фондови, истакна Министерот за земјоделство Трајан Димковски.

-Средствата од оваа програма за рурален развој сведочи дека се инвестира во руралните средини и секогаш при одобрувањето на овие проекти се внимаваше на рамномерниот регионален развој од цела држава, а се една цел, младите да останат на родните огништа, тука да основаат свои фамилии и да започнуваат свои бизниси, истакна директорот на Агенцијата за финансиска поддршка во земјоделството Николче Бабовски.

Беровскиот градоначалник изрази задоволство што по пауза од 23 години патот се реконструира.

-Патот е изграден 1996 година и сега за прв пат се реконструира после неговата изградба. Тоа за нас како општина која има низок фискален капацитет, значи многу како поддршка од Владата на РМ, за такви проекти кои овозможуваат подобрување на локалната инфраструктура, овозможување полесен пристап на земјоделците до нивните имоти, како и развој на локалната економија, рече Пекевски.

Освен за овој, Општина Берово има конкурирано со уште два проекти од оваа програма и сите три се одобрени. 

притисни ентер