Регион

Хрватска: На студентка и го изгребале автомобилот во Дубровник, мислеле дека е од Србија (фото)

На студентка од Славонија, која студира во Дубровник, изгребан и е автомобилот, а таа е уверена дека тоа се случило бидејќи нејзиниот сосед мислел дека на нејзиното возило има српски регистерски таблички.

Како што изјавила, купила возила за да може почесто од Дубровник да патува во родниот крај и го паркирала на јавен паркинг што предизвикало негодување кај нејзиниот сосед, кој како што каже, спомнувал регистерски таблички од Пожаревац.

Но, на регистерските таблички се наоѓале буквите PZ, кои се кратенка за Пожега, град во западна Славонија.

Како што изјавила за локалните медиуми, соседот ја повикал и рекол дека не може да паркира тука и ја прашал дали е од Србија.

„Ме праша дали сме од Србија бидејќи мислеше дека табличките се од Пожаревац, а тие се всушност од Пожега. И да сме од Пожаревац, не знам зошто тоа е важно. Се обидов на пристоен начин да му објаснам дека станува збор за јавен, а не приватен паркинг. Рече дека “се создаваат проблеми што не табличките не се од Дубровник“, изјавила студентката.

Таа, на инсистирање на соседот, го ослободила паркинг местото, кое наводно тие два дена било празно. Затоа таа на тоа паркинг место повторно го паркирала возилото за потоа да го најде изгребано.

Како што изјави, не знае кој е сторителот, но има свои сомнежи и е уверена дека возилото е намерно изгребано.

Студентката, која е разочарана од однесувањето на своите сограѓани, додала дека расправијата околу табличките не е единствената неугодност која ја доживеала од соседот.

Свет

Спречен е атентат врз Зеленски, полски државјанин е уапсен- му се закануваат 8 години затвор

Маж од Полска е уапсен под обвинение дека бил подготвен да шпионира за руската воена разузнавачка служба и да им помогне да го испланираат атентатот на украинскиот претседател Володимир Зеленски, соопштија полските обвинители, а пренесува АП.

Полското национално обвинителство во соопштение вели дека човекот, идентификуван само како Павел К, бил обвинет дека бил подготвен да пренесе информации за безбедноста на аеродромот до руските агенти и бил уапсен вчера во Полска.

Тој побарал контакт со Руси директно вклучени во војната во Украина и се очекувало да пренесе детални информации за аеродромот Ржешов-Јасионка во југоисточна Полска, во близина на границата со Украина, кој е порта за меѓународни воени и хуманитарни снабдувања за Украина. Аеродромот е под контрола на американски војници.

Доколку биде прогласен за виновен, тој може да добие до осум години затвор, се вели во соопштението.

Обвинителите, исто така, изјавија дека апсењето е резултат на блиска соработка со обвинителите и безбедносните служби на Украина, кои обезбедија клучни докази.

Членката на Европската унија, Полска повеќе од две години дава цврста поддршка на соседна Украина и Зеленски во одбрана од руската агресија.

Македонија

Ковачевски: СДСМ и Коалицијата се единствена опција за европска иднина на државата

СДСМ и Коалицијата се единствена опција за европска иднина на државата. Ние нудиме јасен план и визија како до 2030 година Македонија да стане земја членка на ЕУ.

Наспроти нашите политички конкуренти ВМРО – ДПМНЕ кои немаат ниту план, ниту визија, ниту одлучност, ниту волја да го направат тоа порача претседателот на СДСМ Димитар Ковачевски, од предизборниот митинг во Демир Капија.

Ковачевски нагласи дека изборот е кристално јасен.

Избирате помеѓу надеж за подобра, европска иднина со СДСМ или безнадежност и враќање назад со ВМРО ДПМНЕ. Нашите идеи се прогресивни, со јасна визија за европска иднина на државата за што имаме голема поддршка од нашите пријатели од ЕУ, истакна Ковачевски.

Претседателот Ковачевски додаде дека од друга страна, Мицкоски ќе го одолговлекува европскиот пат и за тоа ќе го обвини Брисел.

ВМРО-ДПМНЕ не нуди никаков план за јасен напредок во евроинтеграциите, напротив, може да слушнете нивни изјави каде велат дека не треба да станеме членка на ЕУ сто години, а можеби и никогаш. Тоа покажува дека ја продолжуваат политиката на Никола Груевски. Со нив, Северна Македонија ќе се врати во чекалниците и во темното минато на недемократските процеси, нагласи Ковачевски.

СДСМ никогаш не се откажува! И нашите противници мора да го знаат тоа! Не ни треба враќање назад во изолација и неизвесност туку напредок и членство во ЕУ, нема откажување од подобра иднина за нашите граѓани, порача претседателот на СДСМ Димитар Ковачевски, од предизборниот митинг на СДСМ и Коалицијата во Демир Капија, се наведуива во партиското соопштение.

Живот

Потопиле голем патнички авион во море, за да стане туристичка атракција (ВИДЕО)

Авион со 400 седишта, L1011 Tristar, бил потопен во 2019 година во близина на брегот на јорданскиот град Акаба со цел да привлече туристи, односно љубители на подводни истражувања.

Џамбо-џет првпат полетал во средината на 1980-тите, но на крајот беше исфрлен од употреба. Последните години ги поминал на пистата на меѓународниот аеродром „Крал Хусеин“. На крајот е спуштен на дното на Црвеното Море.

Потонатиот авион стана едно од најпосетуваните места за нуркање во Јордан, пренесува Метро.

Неговите мотори се сè уште на место, а не се допрени ниту кокпитот, тоалетите и галијата.

„Кокпитот е во најплиткиот дел, на длабочина од 13 метри, а последните два излеза се на 28 метри“, откри подводниот фотограф Брет Холцер.

На интернет има бројни снимки од потонатиот L1011 Tristar, а интересно е што тој во еден момент по грешка бил поврзан со исчезнатиот MH370.

Имено, на социјалните мрежи се појави фотографија од потонатиот брод за која се наведува дека го претставува леталото на компанијата „Малезија Ерплане“, кое во 2014 година било изгубено без трага.

Во пораката стоело дека „не се пронајдени човечки останки во кабината“, но подоцна е избришана.