Македонија

Поставена нова спомен плоча кај Карпалак

Нова спомен плоча е поставена денеска кај месноста Карпалак со имињата на десетмината припадници на АРМ кои беа убиени на тоа место во 2001 година, информираат од Одборот на бранители. 

Претставници на Одборот, кој е заеднички орган на девет здруженија на бранители, денеска ја поставиле плочата по вчерашното целосно уништување и отстранување.

– Ние како Одбор апелираме на цивилизациско однесување и бараме да не се крши одново спомен плочата. Таа само сведочи за судбината на десет луѓе кои си ја вршеле нивната работна задача, изјави Марин Најдов, член на здружението на бранители „Достоинство" и на Одборот на бранители.

Случајот е пријавен во полицијата, а Најдов побара и од надлежните да си ја вршат работата.

– Досега шест пати е уништувана плочата и секој пат е пријавувано во полиција, но никој не одговорал за стореното, рече Најдов.

На 8 август 2001 година загинаа осум војници и два офицери од резервниот состав на АРМ : Нане Наумоски, Сашо Китаноски, Бранко Секулоски, Горан Миноски, Веби Рушитоски, Ердован Шабаноски, сите од Прилеп, Марко Деспотоски од Новоселани, Љубе Грујоски од прилепско Пашино Рувци, Дарко Велјаноски од прилепско Ропотово , од Прилеп и Пеце Секулоски од прилепско Бело Поле.

Шоу биз

Бразилка ќе оди во затвор, зашто на познат пејач за еден месец му испратила 8.000 писма

Бразилката Мира Карваљо (35) е толку опседната со британскиот пејач, Хари Стајлс (поранешен член на групата „One Direction“) што го оставила партнерот дома и го пропатувала целиот пат до Лондон.

Но, тоа не е сѐ, Мира му испраќала на Хари писма, свадбени честитки, а бидејќи за само еден месец испратила дури повеќе од 8.000 писма, Бразилката завршила во затвор, пишува „The Sun“.

Таа е осудена на 14 недели затвор и се изјаснила за виновна за следење.

- Хари беше навистина потресен. Тој само сака да продолжи нормално, но секако дека е загрижувачки за него, неговото семејство и неговиот тим“, изјави извор близок до Стајлс.

Нејзе ѝ е забрането да се приближува до Стајлс дури 10 години и да присуствува на кој било настан, односно концерт, каде што е тој.

Да потсетиме, фановите на споменатата група некогаш беа познати по претерувањето кое се граничело со демнење, па еднаш ги хакираа и безбедносните камери на лондонскиот аеродром за да ги видат своите идоли.

Македонија

Пендаровски: Понудата на Мицкоски за коалицирање е знак на слабост

Кандидатот за претседател Стево Пендаровски вечерва од Бутел рече дека е легитимно и дека е демократски избор секој да коалицира со кого сака. 

Но, понудата на претседателот на ВМРО-ДПМНЕ, Христијан Мицкоски за коалицирање со неговата партија, уште на првиот ден од кампањата за парламентарни избори, покажува дека тој бара помош.

„Ние среде кампања не бараме помош од пријател. Мене ми се чини дека тоа е јасен знак на слабост, затоа што господинот Мицкоски знае што го очекува на 24 април и на 8 мај. Инаку зошто би барал помош од страна?“, рече Пендаровски, соопштуваат од неговиот тим.

Македонија

Портокалова велосипедска тура, изложба на карикатури и холандски пазар на Деновите на Холандија

По повод националниот ден на Холандија – Денот на Кралот, Амбасадата заедно со своите партнери го отвори второто издание на „Денови на Холандија“ во Ист Гејт Мол во Скопје. 

Амбасадорот Дирк Јан Коп и извршниот директор на Ист Гејт Мол Игор Давков ги пречекаа посетителите со посебно искуство кое вклучуваше портокалова велосипедска тура, изложба на декорирани велосипеди, филмови во виртуелна реалност и холандски пазар.

Настанот започна со симболична портокалова велосипедска тура и изложба на велосипеди декорирани од средношколци од Скопје во организација на Гоу грин – Биди зелен. Покрај автентичните холандски производи во понудата на холандскиот пазар беа вклучени и локални продукти произведени со холандска технологија.

Во рамките на отворањето амбасадорот Коп ги објави и победниците на регионалниот натпревар за карикатури организиран од холандското Министерство за надворешни работи и организацијата Картун мувмент. Независно жири составено од претставници од сите шест држави од Западен Балкан ја додели првата награда на Душан Перишиќ од Србија а втората награда на Арменд Ајредини од Македонија.

Холандскиот пазар ќе биде отворен овој викенд (19-21 април) од 12:00 до 18:00 часот. Изложбата на карикатури може да се посети до крајот на април.

притисни ентер