Грчкиот Парламент ќе гласа за ратификација на договорите за граничните премини меѓу С. Македонија и Грција

 На пленарна седница закажана за 16 часот по локално време, грчкиот Парламент ќе гласа за ратификација на двата договори потпишани во март и април во Скопје за отворање на новите гранични премини кај Мајден и Маркова нога.

 Како и за подигнувањето на Канцеларијата за врски во Скопје на ниво на амбасада и на Канцеларијата за конзуларни, економски и трговски работи во Битола на ниво на Генерален конзулат, откако вчера Комисијата за национална безбедност и надворешни прашања ги прифати нацрт законите доставени од грчкото МНР, јави дописничката на МИА од Атина.

Согласно изнесените ставови на известувачите за нацрт законите од владејачката СИРИЗА и опозициската Нова демократија, но и на пратениците од другите партии, за време на вчерашната расправа на комисијата, предлог законите беа усвоени. СИРИЗА и Река се „за", Нова демократија и Златна зора против, додека пак Демократска алијанса на денот на гласањето ќе го соопшти ставот. Комунистичката партија на Грција, веројатно ќе биде воздржана. Пратениците од Сојуз на централисти, не присуствуваа на состанокот на Комисијата.

Расправата на Комисијата за национална безбедност и надворешни прашања, со говор ја затвори алтернативната министерка за надворешни работи на Грција, Сиа Анагностопулу, која рече дека двата договори не доаѓаат предизборно во грчкиот Парламент, туку се и по барање на локалното население и додаде дека отворањето на новите гранични премини во минатото беше попречувано, бидејќи не постеа билатерални односи меѓу двете земји.

-Мислам дека, ако навистина сакаме пријателство, соработка, зајакнување на нашата земја, она што треба да го направиме, во духот на она што се прави во Европа, би требало да ги поздравиме овие две ратификации, кои не дојдоа предизборни, дојдоа сега, а требаше да дојдат порано и имавме големи притисоци од локалното население за да дојдат што е можно побрзо, рече алтернативната министерка за надворешни работи на Грција.

Анагностопулу се осврна на граничниот премин кај Маркова нога, како долгогодишно барање на локалното население.

-Во 1959 за време на владата на Караманлис се отвори овој граничен премин, а беше затворен за време на хунтатат во 1967. Оттогаш жителите бараат отворање на овој пат што ја поврзува Грција со Северна Македонија. Не е вистина дека немаше проблем во односите и не беше потребен Договорот од Преспа. Да потсетам дека Конвенционалната рамка меѓу Грција и тогаш, поранешната југословенска Република Македонија, беше рамката Грција- Југославија, рече Анагностопулу, а како пример спомена дека не постоеше можност за регулирање ниту на избегнување на двојното оданочување.

Пратеникот од Нова демократија, Јоргос Кумуцакос, кој е известувач за нацрт законите во неговиот говор рече дека нема да ги поддржат законите и ги објасни

причините зошто тие како партија ќе гласаат против. Расправата ја поврза со претстојните евроизбори, велејќи дека владата за внатрешни цели ги носи законите на 10 дена пред изборите и додаде дека „времето е лукаво, а планот мрачен".

-Ги носите затоа што мислете дека ќе нѐ заробите, рече Кумуцакос, обраќајќи и се на владата.

Пратеникот од Нова демократија истакна дека „не беше потребен Договорот од Преспа за да се отворат нови гранични премини", бидејќи, како што рече „билатералните односи функционираа нормално и без Договорот од Преспа" и додаде дека тие сакаат добри билатерални односи со соседната земја, како што се покажало во изминатите години.

На вчерашната двочасовна расправа на Комисијата во грчкиот Парламент, збор зедоа околу 10 пратеници, кои ги претставија нивните позиции во однос на двата нацрт закони. Пратениците од СИРИЗА, Теодора Ѕакри, Костас Селцас и Јанис Сифакис кои доаѓаат од областите во кои ќе се отворат новите гранични премини ги објаснија придобивките од двата потпишани спогодби меѓу Северна Македонија и Грција.

Двата усвоени нацрт закони произлегуваат од потпишаните договори во Скопје во март и април годинава. Едниот предлог закон е под наслов „Ратификација на Договорот меѓу Република Грција и Република Северна Македонија во врска со воспоставување нов граничен премин меѓу двете земји, што ќе ги поврзува Промахи во Република Грција со Мајден во Република Северна Македонија", а вториот под наслов „Ратификација на Договорот меѓу Република Грција и Република Северна Македонија во врска со воспоставување нов граничен премин во регионот на Преспанското езеро и други одредби".

Согласно потпишаните договори, за изградбата и отворањето на граничниот премин кај Мајден ќе се користат фондови од Европската унија, а во договорот за граничниот премин кај Преспа, вклучени се и членови за подигање на нивото на Канцеларијата за врски во Скопје во амбасада и на Канцеларијата за конзуларни, економски и трговски работи во Битола на ниво на Генерален конзулат.

Според двата потпишани договори во Скопје, предвидено е да се формира заедничка Комисија на експерти од двете земји со најмногу девет претставници од секоја страна кои ќе бидат надлежни за техничките и правните теми, за функционирањето на граничните премини и за други прашања од заеднички интерес поврзани со спроведувањето на договорите.

Во рок од 30 дена од стапувањето на сила на договорот, двете страни по дипломатски пат ќе ги разменат листите со членовите на Комисијата, која за прв пат ќе се состане во рок од три месеци по стапувањето на сила на договорот, а ќе одржува состаноци на секои две години.

Ваква комисија е предвидена и за граничниот премин кај Мајден и за граничниот премин кај Маркова нога./МИА.

Трамп и ЕУ неочекувано најавија прекуатлантски трговски договор

Доналд Трамп и претседателката на Европската комисија, Урсула фон дер Лејен неочекувано објавија во Давос подготвеност да склучат трговски договор во наредните недели, со што треба да се смират духовите од обете страни на Атлантикот.

„Планираме да добиеме договор за неколку недели што ќе може да го потпишеме“, рече Урсула фон дер Лејен, вчера во Швајцарија, на ден по средбата со Доналд Трамп, без да открие други детали.

Целта е да се елиминира опасноста од трговска војна со Вашингтон, а особено постојаната закана на Доналд Трамп да наметне данок од 25 проценти за европските автомобили.

Трансатлантските врски се влошија од доаѓањето на Доналд Трамп, кој го стави американскиот трговски дефицит на врвот на неговиот список со приоритети.

Неименуван европски извор смета дека не станува збор за голем билатерален трговски договор што е технички невозможно да се склучи за неколку недели, но спомнува можност за потпишување на „политичка изјава меѓу Фон дер Лејен и Трамп“, како онаа што беше потпишана во јули 2018 година од Трамп и поранешниот претседател на Европската Комисијата Жан-Клод Јункер.

Фон дер Лејен треба да го посети Вашингтон во наредните недели.

Во 2018 година, САД беа првиот трговски партнер на ЕУ со размена во вредност од 674,1 милијарди евра, а вториот има суфицит од 138 милијарди.

Комесарот за трговија Фил Хоган денеска изјави во Давос дека договорот може да ги опфати технологијата и енергијата. Преговорите ќе траат „недели“ и „месеци“, но „ние зборуваме за 2020 година“, рече тој.

Британец бил ставен во карантин поради коронавирусот : Ме одвлекоа доктори во скафандери

Британец кој ги добил симптомите на инфекција со коронавирус и кој бил ставен во карантин на почетокот од оваа недела, ракажа како е да се биде во изолација.

Крег Дилон од Лондон поминал 12 часа во болница откако се вратил дома од Австралија преку Кина и поминал многу тестови. Резултатите на крајот покажале дека тој е негативен за новиот вид коронавирус и дека всушност на патувањето добил пневмонија.

"Се вратив во Велика Британија во понеделникот. Поминав одмор во Австралија и Тајланд, а на враќање на летав прво во Кина, а од таму во Англија. Се чувствував лошо недела или две. Отидов на работа во средата, но се чувствував полошо и полошо. На крајот, се јавив во службата за итни случаи и ми рекоа веднаш да дојдам во болница “, изјави Дилон за Скај њуз.

„Кога пристигнав во болницата „Ст. Томас“, му реков на мојот лекар дека бев во Кина и Тајланд и дека имам симптоми на грип. Докторот буквално ме извлече од болницата и веднаш ми стави маска за лице. Потоа ме однесе во просторијата за изолација, во карантин , и ми рече да влезам. Чекав таму 30 минути. Беше прилично страшно “, се сеќава тој.

"Докторот и медицинската сестра набргу влегоа во собата облечени во скафандери. Тие беа со мене во собата два часа и ми направија некои тестови. Тешко беше да се разбере сè што кажуваа затоа што носеа маски. Ми правеа повеќе пати тестови на крвта, зедоа брис. од уста и нос. Напишаа сè на хартија и потоа ги ставаа тие белешки на стаклото за да можат лекарите надвор од собата да ги прочитаат. Чекаа со мене за резултатите. За среќа, моите наоди беа негативни на коронавирусот ", рече младиот Британец.

Во Скопје одбележано потпишувањето на Елисејскиот договор помеѓу Франција и Германија

Историското помирување меѓу Германија и Франција пред 57 години познато како Елисејски договор денеска го одбележаа амбасадите на двете земји со проекција на еколошкиот филм „Тајната на шумата" од Лик Жаке.

Амбасадорот на Германија во Скопје, Томас Герберих истакна дека Договорот е основа на историското помирување меѓу двете земји, врз основа на кој сојузната канцеларка Ангела Меркел и францускиот претседател Мануел Макрон минатата година го потпишаа договорот за соработка и интеграција во Ахен.

-Со нив сакаме да се справиме со последиците од 21 век. По тој повод, денеска ќе го погледнеме филмот „Тајните на шумата" од Лик Жаке кој ја раскажува приказната за една тропска шума. Темата е интересна за сите нас, за Германија и Франција, но и за Македонија бидејќи покажува колку е фрагилен нашиот свет и колку е значајно, имајќи го предвид уништувањето на животната средина која зема замав, сите ние да покажеме поголемо внимание во односот со нашите ограничени ресорси, порача Герберих.

Првиот советник во Амбасадата на Франција и вршител на должност во отсуство на амбасадорот, Станислас Мрозек нагласи дека Договорот за Француско-германското пријателство е момент на блискост и спојување.

-Бевме сведоци на несогласување и на тензични моменти, проширувањето на ЕУ беше едно од нив, но и едно од најважните. Токму денес повторно ја наоѓаме автентичноста и цврстината на нашите односи. Се прикажува филмот на Жаке прво затоа што е кинематографија, а токму преку седмата уметност Северна Македонија е препознатлива во светот со номинирањето на „Медена земја" за Оскар. „Тајната на шумата" ја покажува посветената битка која ја водат Франција и Германија против климатските вонредни состојби, истакна Мрозек.

Темата на филмот „Тајната на шумата" е џунглата како еколошки систем. Врз основа на густите шуми во Франција, Перу и Габон, се гледа во историјата на еволуцијата, но, исто така, се упатува на опасноста што се крие во иднината доколку природата не се заштити соодветно. 

притисни ентер