Грчкиот Парламент ќе гласа за ратификација на договорите за граничните премини меѓу С. Македонија и Грција

 На пленарна седница закажана за 16 часот по локално време, грчкиот Парламент ќе гласа за ратификација на двата договори потпишани во март и април во Скопје за отворање на новите гранични премини кај Мајден и Маркова нога.

Како и за подигнувањето на Канцеларијата за врски во Скопје на ниво на амбасада и на Канцеларијата за конзуларни, економски и трговски работи во Битола на ниво на Генерален конзулат, откако вчера Комисијата за национална безбедност и надворешни прашања ги прифати нацрт законите доставени од грчкото МНР, јави дописничката на МИА од Атина.

Согласно изнесените ставови на известувачите за нацрт законите од владејачката СИРИЗА и опозициската Нова демократија, но и на пратениците од другите партии, за време на вчерашната расправа на комисијата, предлог законите беа усвоени. СИРИЗА и Река се „за", Нова демократија и Златна зора против, додека пак Демократска алијанса на денот на гласањето ќе го соопшти ставот. Комунистичката партија на Грција, веројатно ќе биде воздржана. Пратениците од Сојуз на централисти, не присуствуваа на состанокот на Комисијата.

Расправата на Комисијата за национална безбедност и надворешни прашања, со говор ја затвори алтернативната министерка за надворешни работи на Грција, Сиа Анагностопулу, која рече дека двата договори не доаѓаат предизборно во грчкиот Парламент, туку се и по барање на локалното население и додаде дека отворањето на новите гранични премини во минатото беше попречувано, бидејќи не постеа билатерални односи меѓу двете земји.

-Мислам дека, ако навистина сакаме пријателство, соработка, зајакнување на нашата земја, она што треба да го направиме, во духот на она што се прави во Европа, би требало да ги поздравиме овие две ратификации, кои не дојдоа предизборни, дојдоа сега, а требаше да дојдат порано и имавме големи притисоци од локалното население за да дојдат што е можно побрзо, рече алтернативната министерка за надворешни работи на Грција.

Анагностопулу се осврна на граничниот премин кај Маркова нога, како долгогодишно барање на локалното население.

-Во 1959 за време на владата на Караманлис се отвори овој граничен премин, а беше затворен за време на хунтатат во 1967. Оттогаш жителите бараат отворање на овој пат што ја поврзува Грција со Северна Македонија. Не е вистина дека немаше проблем во односите и не беше потребен Договорот од Преспа. Да потсетам дека Конвенционалната рамка меѓу Грција и тогаш, поранешната југословенска Република Македонија, беше рамката Грција- Југославија, рече Анагностопулу, а како пример спомена дека не постоеше можност за регулирање ниту на избегнување на двојното оданочување.

Пратеникот од Нова демократија, Јоргос Кумуцакос, кој е известувач за нацрт законите во неговиот говор рече дека нема да ги поддржат законите и ги објасни

причините зошто тие како партија ќе гласаат против. Расправата ја поврза со претстојните евроизбори, велејќи дека владата за внатрешни цели ги носи законите на 10 дена пред изборите и додаде дека „времето е лукаво, а планот мрачен".

-Ги носите затоа што мислете дека ќе нѐ заробите, рече Кумуцакос, обраќајќи и се на владата.

Пратеникот од Нова демократија истакна дека „не беше потребен Договорот од Преспа за да се отворат нови гранични премини", бидејќи, како што рече „билатералните односи функционираа нормално и без Договорот од Преспа" и додаде дека тие сакаат добри билатерални односи со соседната земја, како што се покажало во изминатите години.

На вчерашната двочасовна расправа на Комисијата во грчкиот Парламент, збор зедоа околу 10 пратеници, кои ги претставија нивните позиции во однос на двата нацрт закони. Пратениците од СИРИЗА, Теодора Ѕакри, Костас Селцас и Јанис Сифакис кои доаѓаат од областите во кои ќе се отворат новите гранични премини ги објаснија придобивките од двата потпишани спогодби меѓу Северна Македонија и Грција.

Двата усвоени нацрт закони произлегуваат од потпишаните договори во Скопје во март и април годинава. Едниот предлог закон е под наслов „Ратификација на Договорот меѓу Република Грција и Република Северна Македонија во врска со воспоставување нов граничен премин меѓу двете земји, што ќе ги поврзува Промахи во Република Грција со Мајден во Република Северна Македонија", а вториот под наслов „Ратификација на Договорот меѓу Република Грција и Република Северна Македонија во врска со воспоставување нов граничен премин во регионот на Преспанското езеро и други одредби".

Согласно потпишаните договори, за изградбата и отворањето на граничниот премин кај Мајден ќе се користат фондови од Европската унија, а во договорот за граничниот премин кај Преспа, вклучени се и членови за подигање на нивото на Канцеларијата за врски во Скопје во амбасада и на Канцеларијата за конзуларни, економски и трговски работи во Битола на ниво на Генерален конзулат.

Според двата потпишани договори во Скопје, предвидено е да се формира заедничка Комисија на експерти од двете земји со најмногу девет претставници од секоја страна кои ќе бидат надлежни за техничките и правните теми, за функционирањето на граничните премини и за други прашања од заеднички интерес поврзани со спроведувањето на договорите.

Во рок од 30 дена од стапувањето на сила на договорот, двете страни по дипломатски пат ќе ги разменат листите со членовите на Комисијата, која за прв пат ќе се состане во рок од три месеци по стапувањето на сила на договорот, а ќе одржува состаноци на секои две години.

Ваква комисија е предвидена и за граничниот премин кај Мајден и за граничниот премин кај Маркова нога./МИА.

Квинтетот на Симон Трпчески и оркестарот „Ајга“ со два концерти во Скопје

 Квинтетот на Симон Трпчески и камерниот оркестар „Ајга“ ќе го изведат проектот „Македонисимо“ со оркестарската верзија, на два концерта, во салата на Македонската филхармонија. Ова беше кажано на денешната прес-конференција.

- Мислам дека направивме еден феноменален историски чекор за македонската музика, уметност и за Македонија како земја, рече Трпчески.

Диригентката Ана Спасовска, зборувајќи во име на оркестарот, изрази задоволство од соработката.

- Ова ќе биде балканска и македонска премиера. Сметам дека многу одговорно пристапуваме кон нашата задача, да го исполниме „Македонисимо“ најдобро што можеме, бидејќи ние како Македонци, сметам дека нашите ора, би можеле да ги изведеме најубаво, бидејќи најубаво и ги чувствуваме. А всушност тоа е музиката, чувствата да ги пренесеме кон публиката, подвлече Спасовска.

Композиторот Панде Шахов нагласи дека проектот е симболичен, бидејќи дава шанса на исклучително талентирани музичари да свират заедно, нагласувајќи дека соработката ќе продолжи и во иднина.

На средбата беше кажано дека концертите се на стартот од првото издание на Скопје Интернационалниот музички фестивал.

Притоа, беше нагласено дека по распродадениот прв концерт, закажан за 1 април, закажан е втор концерт на 31 март.

Костадиновска-Стојчевска на средба со Јоли: Соработката со Албанија дава резултати

Министерката за култура Бисера Костадиновска-Стојчевска денеска оствари средба со префектот на округот Корча, Нерти Јоли, со кој разговараа за соработката помеѓу Македонија и Албанија во областа на културата, за досегашната реализација на проекти.

„Имаме одлична соработка и секоја укажана прилика ја користиме за продлабочување на пријателските врски меѓу двете држави. Традиционално добрите односи со Албанија дополнително ги зајакнуваме со прекуграничната соработка, како најдобар европски модел за подобрување на квалитетот на животот на граѓаните“, изјави Костадиновска-Стојчевска.

Префектот на округот Корча, Нерти Јоли на средбата рече преку сериозна и темелна соработка на двете држави, важни проекти и иницијативи се реализирани во културата, инфраструктурата и туризмот, изразувајќи интерес за партнерство во идните проекти.

Костадиновска-Стојчевска и Јоли се согласија дека Пустец е посебен за двете држави и дека со унапредување на соработката не само во областа на културата ќе може да се направи многу повеќе за граѓаните од двете страни на границата.

Министерката потенцирање дека успешно реализираната иницијатива „Денови на македонската култура во Корча“ во која учество зеде и Културно-информативниот центар на Македонија во Тирана и Министерството за култура има големи придобивки во контекст на унапредувањето на културната соработка меѓу двете држави и изрази уверување дека оваа манифестација, со поддршка на округот Корча ќе стане традиционална, бидејќи е убава можност за промоција на македонската култура и истата ги негува релациите со Македонците во Корча.

На средбата беше истакната и петнаесетгодишната соработката помеѓу битолскиот универзитет со албанскиот универзитет Фан С. Ноли, како и за поддршката за промоција и афирмација на македонскиот јазик во Албанија, за што министерката Костадиновска –Стојчевска изрази верување дека иницијативата за изучување на македонскиот јазик на Универзитетот Фан С. Ноли во Корча ќе има уште поголем од младите и идни студенти, соопшти Министерството за култура.

Нетанјаху даде зелено светло за нова рунда преговори за примирје во Газа

Израелскиот премиер Бенјамин Нетанјаху даде зелено светло за нова рунда разговори во Катар и Египет, чија цел е да се постигне примирје во Газа, соопшти денеска израелската Влада.

„Бенјамин Нетанјаху се сретна со директорот на Мосад (надворешното разузнавање на Израел) и директорот на Шин Бет (внатрешно разузнавање) и одобри продолжување на новата рунда разговори во наредните денови во Доха и Каиро“, се вели во владиното соопштение.

притисни ентер