„Само Вистина“ вечерва со Филип Петровски и Стојанче Ангелов

Во вечерашната „Само Вистина“ ќе дебатираат Филип Петровски и Стојанче Ангелов

Драги гледачи, неуморни сонувачи, време е за првата АНАЛИЗА НА РЕЗУЛТАТИТЕ ОД ПРВИОТ КРУГ НА ПРЕТСЕДАТЕЛСКИТЕ ИЗБОРИ 2019 ГОДИНА. Вечерашни специјални, но и вонредни и ополномоштени аналитичари се: Филип Петровски и Стојанче Ангелов.

Опозицијата доста бучно и среќно и власта поскромно вчеравечер скандираа во име на победата додека опонентите на теренот „се бркаа“ со гласовите, за на крајот Пендаровски во фото финиш прв ја помине целта. Победата Пендаровски ја преточи во оптимизам дека во вториот круг ќе „тепа“ уште поубедливо – дали Заев може да го размести екипажот на бродот за да го оддалечи уште подалеку од копното?

Сиљановска, пак, ја обои мапата на Државната изборна комисија во црвено. Колку ова го наполни „политичкото его“ на Мицкоски за да може да биде достоен противник доколку евентуално изнуди предвремени парламентарни избори?

Што добија и што изгубија СДСМ и ВМРО-ДПМНЕ?

Зошто ВМРО ДПМНЕ слави кога овие бројки се нивните најслаби во последните десетина години? На што се надева Заев и како СДСМ да го мобилизира своето демотивирано гласачко тело?

Ќе ги „украде“ ли некој 80 илјади гласови од Река или ќе завршат на ничиј терен?

Навидум здодевните предизборни кампањи очигледно не ги изнесе граѓаните од дома. Ќе бидат ли Албанците „мангупи“ и ќе си седат ли дома во вториот круг за да конечно добијат, макар привремено, Претседател на државата, во ликот и делото на Талат Џафери?

Вечерва, никако не смеете да ја пропуштите оваа анализа на двајцата идеолошки дијаметрално антагонистички поставени гости. Не пропуштајте ја денешната АНАЛИЗА на вчерашните резултати, каде ако не во „Само Вистина“ со Филип Петровски и Стојанче Ангелов – на Канал 5 Телевизија.

Заев заедно со Димитров, Шеќеринска и Ременски со тужба ќе докажуваат дека немаат инволвираност во „Рекет“

Премиерот Зоран Заев со тужба ќе докажува дека нема инволвираност во случајот „Рекет“. Тој неможе да премине преку текстовите кои се појавија синоќа на некои портали, во кој се пишува за наводна негова вмешанот во изнудата. 

Премиерот Зоран Заев најави тужба за објавувањето на нелегално добиени документи од истрагата за случајот „Рекет“, кои ги објави порталот Инфомакс, а се однесуваат на исказот на Орце Камчев кога го пријавил случајот во Обвинителството и во која има детали за наводна инволвираност на политички функционери.

Заев бара шефицата на обвинителството за гонење на организиран криминал Вилма Русковска да каже дали записникот и документите кои претекоа од ОЈО се веродостојни.

,,Отфрлам секаква поврзаност со Боки 13 поврзана со случајот „Рекет“. Обврска на Обвинителството е да каже дали тоа е така кажано. Објавена е една страна од записникот, а потоа е прераскажувано. Доколку новинарите прават манипулации, има одговорност. Ги повикувам Ременска, Шекеринска и Димитров заедно со мене да поднесат тужба, за да се потврди дека се лаже, изјави Заев.

По Заев, и  министрите за одбрана и надворешни работи Радмила Шеќеринска и Никола Димитров, како и пратеничката Фросина Ременски најавија дека ќе ги тужат порталите Инфомакс и Република, како што велат, поради изнесени лаги и клевети, по објавувањето на документот од исказот на Камчев за наводна вмешаност во аферата „Рекет“.

Oд обвинителството за организиран криминал попладнево информираа дека Русковска ја потврдува автентичноста на сликата од објавениот записник, а останатите заклучоци и коментари на авторот на текстот нема да ги коментира. Оттаму соопштуваат дека оригиналните списи од предметот ги поседува само обвинителството, а копија од нив била доставена до надлежниот суд.

Оваа информација за Канал 5 ја потврди и државниот јавен обвинител Љубомир Јовески кој вели дека голема е веројатноста документот кој протече во јавноста да е веродостоен, но треба детално да се истражи и да се направи споредба со оригиналот за да се добие целосна потврда. Јовески ни изјави дека се истражува и дали записникот протекол од Кривичниот суд, бидејќи истиот бил испратен во судот како дел од барањето за притвор за Катица Јанева.

Од Основното јавно обвинителство соопштија дека ќе проверуваат како протекуваат документи од истрагата за „Рекет“. Обвинителството нема да ги коментира информациите, но потенцираат дека откривањето на доверливи информации од страна на поединци претставува опасност и е кривично дело.

„Основното јавно обвинителство за гонење на организиран криминал и корупција и укажува на јавноста дека ваквите неодговорни извори на информации и медиуми со ограничена цел, нема да влијаат врз решеноста на обвинителството овој случај да добие комплетна завршница, се наведува во соопштението.

Засега нема информации од обвинителството за гонење организиран криминал и од државното обвинителство дали веќе е отворен предмет за да се утврди како протекол документот и кој ќе понесе одговорност за тоа, бидејќи станува збор за доверливи податоци.

Заев: Гасот доаѓа сѐ поблиску до индустријата и до граѓаните

Премиерот Зоран Заев,заедно со министерот Горан Сугарески, директорот на МЕР Бајрам Реџепи, и градоначалниците, Љубе Кузманоски и Наташа Петровска,  беа на увидот на магистралниот гасовод Неготино – Прилеп – Битола.

Во изјавата за медиумите, премиерот Заев потсети дека пред точно 5 месеци, во март, на Плетвар во општина Прилеп, владина делегација беше на увид во напредокот на кракот од магистралниот гасовод Неготино – Прилеп – Битола, на делницата кај превојот Плетвар, кога директорот на МЕР Бајрам Реџепи информираше дека се завршени 36 проценти од градежно машинските работи на овој магистрален гасовод.

„Денеска, заклучно со јули 2019 година се завршени нешто повеќе од 70 проценти од градежните и машинските работи на овој крак. За само 5 месеци се завршени 34 проценти, што претставува исклучителен прогрес. Изградбата која започна во февруари 2017 година треба да заврши до февруари 2020 година, со што практично се исполнува планот за реализација на овој дел од големиот проект за гасификација на Република Северна Македонија“, потенцираше премиерот Заев.

Тој дополни дека на магистралниот гасовод Неготино – Штип се изведуваат завршните работи, а магистралата Скопје – Тетово – Гостивар се очекува да биде завршена до крајот на следната година.

„Гасот доаѓа се поблиску до индустријата и до граѓаните, со што се отвораат можностите да влеземе во фазата за определување оператори на секундарната мрежа кои ќе треба да го обезбедат преносот и приклучокот на гасот до домаќинствата и до индустриските капацитети по конкурентни цени“, нагласи Претседателот на Владата на РСМ Заев, и додаде дека гасификацијата на земјата ќе донесе намалување на трошоците за енергија и намалени емисии на штетни гасови во воздухот.

„Оваа изјава има посебно значење искажана во близината на РЕК Битола. Во таа насока треба да се прифати фактот дека Главната мерно регулациона станица Битола е со најголеми капацитет на овој крак со 28 илјади кубни метри гас. Ова го нагласувам бидејќи еден дел од овој гас ќе биде наменет за транзиција на работата на РЕК од производство на електрична енергија од јаглен во процес во кој гасот ќе стане новиот енергенс за производство на електрична енергија“, истакна премиерот Заев.

Премиерот Заев во изјавата за медиумите на настанот организиран за увид во напредокот на магистралниот гасовод Неготино – Прилеп – Битола, информираше и за претстојните, нови мерки од Планот за намалување на загаденоста на воздухот.

„Од претстојната грејна сезона, најавуваме дека ќе овозможиме бесплатна замена во домаќинствата на печките кои користат огревно дрво и фосилни горива со високоефикасни инвертори. Трошоците за користење на инверторите за домаќинствата се значително пониски од други начини на греење, вклучувајќи го и огревното дрво, топлинскиот комфор е далеку поголем, а како дополнителна вредност е можноста за ладење во летниот период. Но, клучно е дека на овој начин заеднички ќе си го заштитиме воздухот кој сите го дишеме и кој не препознава ни партија, ни политика, ни било каква припадност“, нагласи премиерот Заев, и дополни дека граѓаните сега имаат поволности и да се вратат назад на системите за централно греење, кое веќе е со намалена цена заради повластената ставка на ДДВ кој паѓа од 18 на само 5 отсто, и информираше за текот на процесот кој се реализира со германската KVW банка на проектот на топловодната мрежа од РЕК Битола кон градот Битола.

На увидот во напредокот на работите на магистралниот гасовод Неготино – Прилеп – Битола во Општина Новаци, министерот за транспорт и врски, Сугарески истакна дека ова е еден најстожерните проекти на оваа влада и дека во најскоро време гасот ќе биде достапен до сите корисници.

„Придобивките кои што ќе ги имаат граѓаните и компаниите ги потенцираме во неколку наврати, ќе има намалување на трошоците во делот на семејствата но сакам да потенцирам дека и компаниите кои ќе го користат овој енергенс ќе ги намалат своите трошоци и ќе се поконкурентни со своите производи“, рече Сугарески.          

Директорот на МЕР Бајрам Реџепи од своја страна соопшти дека според утврдениот план, до крајот на оваа година ќе биде остварено повеќе од 90 проценти од реализацијата на оваа делница и дека во втората половина на наредна година оваа делница ќе биде оперативна и спремна за опслужување за пренос на природен гас.  

Фестивалот „Струшки вечери на поезијата" со низа настани и голем број учесници

Фестивалот „Струшки вечери на поезијата" една од најреномираните културни манифестации во земјава, во текот на вчерашниот ден реализираше низа настани со голем број учесници - поети, но и издавачи.

По утринската посета и поетско матине во манастирот „Света Богородица" во Калишта, кога по една своја песна прочитаа 21 странски и домашни поети, во хотелот „Дрим" во Струга со почеток во 16 часот се одржаа неколку настани посветени на „Версополис", европска поетска платформа што создава можности за откривање на европските поети и е поддржана од програмата „Креативна Европа" на Европската комисија. 

„Струшки вечери на поезијата" (СВП) е активен учесник во „Версополис", а во вчерашното попладне најпрвин се одржа средба на македонски и издавачи од Грција, Србија и Романија со странските поети од „Версополис" што учествуваат во годинашното издание на СВП: Кармен Камачо од Шпанија, Сана Хартнор од Шведска, Џејкоб Поли од Англија и Гжегож Квјетковски од Полска, а веднаш потоа беа претставени и македонските млади поети предложени од СВП за програмата „Версополис". 

Пред публиката во хотелот „Дрим" своите творби ги интерпретираа Марта Маркоска, Ѓоко Здравески, Снежана Стојчевска, Стефан Марковски и Наташа Сарџоска. 

Следниот настан беше дебата за улогата на книжевните списанија во дигиталното доба.

Вечерниот дел од програмата на вчерашниот, трет фестивалски ден, се пресели на сцената „Галеб", каде пред многубројна публика беше презентиран поетскиот портрет на Богомил Ѓузел.

За богатото творештво на Ѓузел говореше Елизабета Шелева, при што од она што можеби остана некажано од неа, потоа се „исполни" низ краткиот разговор на универзитетската професорка со 80-годишниот поет, прозаист, есеист, преведувач и драматург 

Столчето од кое стана Ѓузел, потоа го зазеде младата хрватска поетеса Моника Херцег, добитникот на годинашната награда на СВП „Мостови на Струга" за најдобра дебитантска стихозбирка, која се доделува под покровителство на УНЕСКО.

Нејзиниот поетски портрет го претстави преведувачот на нејзината прва поетска збирка, „Поетски координати". Херцег одговарајќи на прашањата, раскажуваше за нејзиното растење и созревање во виорите на војната во Хрватска и како нејзиниот живот се преточува во поезија во која истакнато место им дава на смртта и на феминизмот.

Во вториот настан со нив во овој, трет фестивалски ден,, странските поети од „Версополис", Камачо, Хартнор, Поли и Квјетковски на сцената „Галеб", се претставија пред публиката со по неколку свои песни.

Доцна вечерта, нешто по 23 часот се случија уште 12-тина читања на по една песна од поети од странство и македонски творци, во рамките на настанот. Од македонските поети се претставија Владимир Мартиновски, Јовица Ивановски, Тихомир Јанчовски и Ненад Јолдески. 

Поетскиот карван потоа од сцената „Галеб" се пресели во Центарот за култура „Браќа Миладиновци", каде се се одржа „Ноќ без интерпункција" и поетски слем со учество  на, меѓу другите, Цветанка Колева, Перица Сарџоски, Игор Трпчески, Исток Улчар и други млади творци.

Четвртиот фестивалски ден на СВП, претпладнево содржеше „Поетско кафе" со добитничката на највисоката награда на фестивалот, „Златен венец", славната романска поетеса Ана Бландијана, на кое таа одговараше на прашања од публиката за нејзиното творештво, за историските преплети на Романија, но и за ангажираната уметност. 

Во претпладневниот ден на програмата на четвртиот ден на фестивалот, публиката се потсети на истакнатите македонски поети Вера Чејковска и Ристо Јачев, кои починаа во периодот од претходното до актуелното, 58 издание на СВП. За опусот на поетите говореше Милован Стефановски.

притисни ентер