Средба на Царовска со тимот што работи на апликацијата за поддршка од врсничко насилство

Министерката за труд и социјална политика Мила Царовска денеска се сретна со тимот „АндроМета" кој е еден од петте тимови избран на светско ниво за развој на апликацијата SpeakOut за поддршка од врсничко насилство.

Како што соопштија од МТСП, Царовска ги поканила Александра Поповска, Матеј Плавевски, Дарио Стојанов, Данче Петрушевска и Амра Личина, иновативното решение да го презентираат и пред Националното координативно тело за заштита на деца од злоупотреба и  занемарување со што, како што посочуваат, ќе се разгледа можноста истото да се вметне како дел од сеопфатната стратегија против насилство врз деца и оперативен план кои се во фаза на подготовка.

-Горди сме што имаме непроценлив потенцијал кај младите луѓе во Република Северна Македонија. Вашата иновативност, посветеност и енергија за создавање подобри услови за живот и развој на вештини кои решаваат сериозни проблеми во општеството и на новите генерации, ни дава поттик како министерство и Влада да останеме посветени на заложбата за обезбедување еднакви услови и подобар живот за секое дете, рече Царовска.

Лидерот на тимот, осумнаесетгодишната Александра Поповска, вели дека возрасните не веруваат секогаш во нивните способности, но таа лично верува дека младите можат да направат промена.

-„SpeakOut е мобилна апликација која ги мотивира младите анонимно да побараат помош и да дадат поддршка на своите врсници. Ним им се нудат две опции за добивање помош. Јавно да објават и да добијат помош од другите членови во заедницата или да разговараат со волонтер, приватно, еден-на-еден" , вели Поповска.

Апликацијата се развива како дел од предизвикот Generation Unlimited, а македонскиот тим беше избран од УНИЦЕФ и партнерите меѓу оние коишто ќе добијат стручно менторство и по 20.000 американски долари за проширување на апликацијата. Во Generation Unlimited се вклучија повеќе од 800 иноватори од 16 земји за да побараат одговор на неодложното прашање: „како да се постигне секој млад човек да добие образование, вештини и оспособеност за изградба на подобра иднина?". Целта на овој предизвик во кој се вклучени првите луѓе на Обединети Нации и Европска Унија е сите млади на возраст од 10 до 24 години да добијат образование, обука и работа до 2030 година.

Промоција на книги од Санде Стојчевски, Елена Пренџова и од Стефан Марковски

Промоција на книгите „Болката на јаболкото" од Санде Стојчевски, „Мини прирачник за поезија" од Елена Пренџова и „Хипербог" од Стефан Марковски, ќе бидат промовирани вечерва во Салон 19:19, во Културно-информативниот центар – Скопје.

Како што најавија од КИЦ-Скопје, книгите ќе ги промовира Филип Клетников, а извадоци ќе читаат авторите.

Санде Стојчевски е реномиран македонски поет, есеист, книжевен критичар и преведувач. Дипломирал на Филолошкиот факултет во Скопје. Бил новинар, а потоа уредник во образовната редакција во Радио Скопје, уредник, главен уредник и директор на книгоиздателството „Македонска книга" – Скопје. Член е на Македонскиот ПЕН центар и на Друштвото на писателите на Македонија.

Елена Пренџова (1985, Скопје) е поетеса и слемерка. Дипломирала на Филолошкиот факултет во Скопје. На книжевната сцена е присутна една деценија, како авторка на шест поетски збирки, од кои четири се наградени со национални награди, и има една коавторска двојазична збирка, во препев на српски. Денес е една од уредниците на најстарото книжевно списание „Современост" и активна членка на ДПМ од 2012 год. Последните неколку години организира слем-натпревари во градовите низ Македонија.

Стефан Марковски е роден и израснат во Гевгелија, каде што завршил основно и средно образование. Дипломирал на Катедрата за компаративна книжевност при Филолошкиот факултет и Институтот за филозофија на Универзитетот „Св. Кирил и Методиј" во Скопје, а магистрирал Сценарио за филм и ТВ на Факултетот за драмски уметности во Скопје. Марковски е член на Друштвото на писатели на Македонија, македонскиот центар на Интернационалниот театарски институт и други здруженија. 

САД ќе испратат околу илјада војници на Блискиот исток како одговор на „заканата“ од Иран

САД ќе испратат околу илјада војници и воена опрема на блискиот исток како одговор на „заканата“ од Иран, изјавија синоќа од Пентагон

Според него, Вашингтон не оди во конфликт со Иран. Мерката е во прилог на безбедноста на веќе присутните воени служби и заштита на националните интереси на САД во регионот.

Како што е веќе познато, на 13 јули во Оманскиот залив се случија експлозии на два нафтени танкера, јапонски и норвешки.  Танкерите биле нападнати во близина на Ормускиот теснец.

Сите 44 морнари на тие пловила се евакуирани од ирански итни служби и префрлени во пристаништето Џаск, лоцирано на територија на Иран.

Одговорноста за експлозиите САД ја префрлаат на Иран, а Техеран ги отфрла обвинувањата.

Најдоцна до петок владејачката партија ќе излезе со предлог за владината реконструкција

Најдоцна до петок владејачката партија ќе излезе со предлог за владината реконструкција.

Ова вчера го најави  и министерката за одбрана Радмила Шекеринска во синоќешното гостување на телевизиска  емисија. Таа рече дека најавената реконструкција ќе се случи наскоро.

-Очекувам дека до петок, предлогот за реконструкција да биде доставен во собранието-рече Шекеринска која потенцираше дека следуваат и системски промени на делување во интерес на граѓаните.  

Се очекува осуммина министри да ги предадат фотелјите, извори од владината коалиција велат дека дел ќе бидат ротации, а дел нови решенија. Освен на министерско ниво, новиот кадровски бран ќе опфати и над 20 директори

За сега се знае дека  министерот за земјоделие Љупчо Николовски заминува од функцијата и ќе продолжи да работи во партијата.

притисни ентер