Наградени најдобрите цртежи на темата „Маркови Кули – предизвик за сите нас"

Вкупно 123 цртежи на учениците од прилепските основни и средни училишта беа претставени на изложбата во фоајето на Центарот за култура „Марко Цепенков" на тема „Маркови Кули – предизвик за сите нас". 

Цртежите се резултат на конкурсот што го распиша прилепската локална самоуправа, дел од проектот „Маркови Кули – заштита и делување" во рамките на Програмата за подобрување на управувањето со заштитените подрачја, финансирана од ЕУ, а спроведена од УНДП.

За најдобри со мотивот на Марковите кули беа прогласени цртежите на Илина Смугреска  од гимназијата „Мирче Ацев", која го освои првото место, ликовната творба на нејзиниот соученик од гимназијата, Матеј Зарески го освои второто, а цртежот на Лејла Јаховиќ од основното училиште „Пере Точев" од Дупјачани според четиричлената комисија го освои третото место.

Конкурсот, кој на 15 март оваа година го објави прилепската локална самоуправа имаше за цел да ги мотивира и активно да ги вклучи младите како дел од локалната заедница.

Според Бранко Ристески, директор на Инстиутот за старословенска култура, изложбата претставува почеток на заокружување на завршната фаза на вреднување на овој проект кој е финансиран од ЕУ, а го спроведува УНДП.

-Овој проект има цел да ја подобри методологијата за управување со заштитените подрачја во кој издвоено место има локалитетот Маркови Кули. Ова е почеток на завршната фаза за изработка на план за управување со Марковите Кули , по што би следела постапка за ревалоризација на просторната целина како мешовито добро со природни и културни вредности, на што би се надоврзала завршната, оперативна фаза со активности околу осветлувањето на Марковите Кули, санирање на пристапниот пат,  поставување информативни табли и видиковци. Партиципацијата на младите во оваа фаза е особено значајна бидејќи се добиваат почетни идеи и визуелизација на еден простор кој тие непосредно го доживуваат за разлика од нас возрасните. Секако дека избраното решение допонително ќе се обработува за да се добие графичко решение, истакна Бранислав Ристески, директор на Институтот за старословенска култура.

На изложбата беа доделени благодарници и книги на сите учесници како и благодарница за поддршка на асоцијацијата „Ластовица" и  градинката „Наша Иднина" која ја збогати оваа поставка со 67 цртежи од најмладите. Исто така награди беа обезбедени и за првонаградениот gopro  камера и bluetooth звучници за второто и третото место.

Следен  чекор  во спроведувањето на проектот „Маркови Кули – заштита и делување"  ќе биде поставувањето видео-мониторинг и осветлувањето на дел од локалитетот, согласно нормите за заштите за да не се влијае инвазивно и да се нарушува биодиверзитетот на локалитетот. Ќе се постават инфо –точка на потегот  „Кај слонот" за потребите на посетителите и туристите, а ќе се реконструира и дел од  постојниот пат за да се спречи ерозија./MИА 

Сејдини: Една прифатена и три одбиени тужби поврзани со изборите

 Управниот суд досега постапувал по четири случаи поврзани со претседателските и предвремени избори за градоначалник на општините Охрид, Ново Село и Дебар, изјави денеска претседателот на Управниот суд Бурим Сејдини.

 Управниот суд досега постапувал по четири случаи поврзани со претседателските и предвремени избори за градоначалник на општините Охрид, Ново Село и Дебар, од кои три се одбиени и една е уважена, изјави денеска претседателот на Управниот суд Бурим Сејдини.

– Во петокот уважена е тужбата на Агенција за финансиска поддршка во земјоделството и руралниот развој со која се поништува одлуката на Државна комисија за спречување на корупцијата од 17 април 2019 година за отворање на постапка за истражување на исплатата на субвенции, изјави Сејдини.

Отфрлени се двете тужби на 1ТВ против ценовникот на ДИК за изборно рекламирање и една која се однесува за заштита на избирачко право поднесена од страна на Стево Митевски со која бара упис во Избирачкиот список.

Сејдини посочи дека нема да ги коментира одлуките, кои се образложени и јавно достапни на веб страницата на Управниот суд.

Претседателот на Управниот суд посочи дека очекува и вториот круг од претседателските избори да мине во најдобар ред како и првиот.

– Резултатите од првиот изборен круг сите ги знаеме и не очекуваме тужби по вчерашниот мирен изборен ден. Доколку има тужби во вториот круг, јавноста ќе биде официјално информирана за јавните седници на кои ќе се одлучува по нив, изјави Сејдини.

Посочи дека во март годинава се формирани пет совети кои по случаен избор одлучуваат по тужбите доколку ги има. Рокот за одлучување на Управниот суд е 48 часа од моментот на поднесување на тужбата. На минатите избори до Управниот суд биле поднесени 27 тужби. /МИА.

Во Софија Гранд При македонски краткометражен игран филм!

Краткометражниот дипломски игран филм "Обид за среќна приказна" на режисерката Лавинија Софрониевска ја освои највисоката награда Гранд При  на Интернационалниот Студентски Филмски Фестивал „New Wave“ во Софија.

Жирито едногласно го прогласил филмот за добитник на главната награда и упатило пофални зборови за севкупната режија, продукција, кастинг, камера, монтажа и сценарио. 

Филмот е шармантна, необична и нелинеарна приказна за животот на две сестри, а во главните улоги се појавуваат Тамара Ристоска, Матеа Јанковска, Филип Трајковиќ, Игор Ангелов и Кристина Леловац. 


„Само Вистина“ вечерва со Филип Петровски и Стојанче Ангелов

Во вечерашната „Само Вистина“ ќе дебатираат Филип Петровски и Стојанче Ангелов

Драги гледачи, неуморни сонувачи, време е за првата АНАЛИЗА НА РЕЗУЛТАТИТЕ ОД ПРВИОТ КРУГ НА ПРЕТСЕДАТЕЛСИТЕ ИЗБОРИ 2019 ГОДИНА. Вечерашни специјални, но и вонредни и ополномоштени аналитичари се: Филип Петровски и Стојанче Ангелов.

Опозицијата доста бучно и среќно и власта поскромно вчеравечер скандираа во име на победата додека опонентите на теренот „се бркаа“ со гласовите, за на крајот Пендаровски во фото финиш прв ја помине целта. Победата Пендаровски ја преточи во оптимизам дека во вториот круг ќе „тепа“ уште поубедливо – дали Заев може да го размести екипажот на бродот за да го оддалечи уште подалеку од копното?

Сиљановска, пак, ја обои мапата на Државната изборна комисија во црвено. Колку ова го наполни „политичкото его“ на Мицкоски за да може да биде достоен противник доколку евентуално изнуди предвремени парламентарни избори?

Што добија и што изгубија СДСМ и ВМРО-ДПМНЕ?

Зошто ВМРО ДПМНЕ слави кога овие бројки се нивните најслаби во последните десетина години? На што се надева Заев и како СДСМ да го мобилизира своето демотивирано гласачко тело?

Ќе ги „украде“ ли некој 80 илјади гласови од Река или ќе завршат на ничиј терен?

Навидум здодевните предизборни кампањи очигледно не ги изнесе граѓаните од дома. Ќе бидат ли Албанците „мангупи“ и ќе си седат ли дома во вториот круг за да конечно добијат, макар привремено, Претседател на државата, во ликот и делото на Талат Џафери?

Вечерва, никако не смеете да ја пропуштите оваа анализа на двајцата идеолошки дијаметрално антагонистички поставени гости. Не пропуштајте ја денешната АНАЛИЗА на вчерашните резултати, каде ако не во „Само Вистина“ со Филип Петровски и Стојанче Ангелов – на Канал 5 Телевизија.

притисни ентер