Канал 5 ТВ попладнево ги упати официјалните покани за „ТВ дуелот на деценијата“,помеѓу претседателот на СДСМ и премиер, г-дин Зоран Заев, и претседателот на ВМРО-ДПМНЕ, г-дин Христијан Мицкоски.
СДСМ и ВМРО-ДПМНЕ потврдија дека нивните претседатели ќе учествуваат на дебатата во „Само вистина“ на Канал 5 телевизија .
Во соопштението од штабот на СДСМ се вели:
„Ве информираме дека претседателот на СДСМ и премиер, Зоран Заев, ја прифаќа Вашата покана и ќе учествува на ТВ дуел со претседателот на ВМРО-ДПМНЕ, Христијан Мицкоски во емисијата „Само вистина“ што се емитува на вашата телевизија.
Во духот на демократските вредности, граѓаните имаат право да видат јавен, отворен судир на идеи и концепти. Тоа е основа на демократските принципи за кои СДСМ постојано се залагаше како опозиција, а сега ги реализира од позиција на владејачка партија.„
Од ВМРО-ДПМНЕ преку соопштение потврдија дека претседателот на партијата Христијан Мицкоски е подготвен за дебата со Зоран Заев во било кое време.
Во соопштението од ВМРО-ДПМНЕ стои:
Во однос на упатеното барање за ТВ Дуел на Телевизија Канал 5 и претходно јавно изнесениот став на претседателот на ВМРО-ДПМНЕ Христијан Мицкоски дека е подготвен за дебата со Зоран Заев во било кое време, го потврдуваме учеството на Мицкоски во посочената дебата.
Ја поздравуваме можноста да се говори за вистината во Република Македонија, за недостатокот на правда, загрозените слободи и права, како и изневерените очекувања од Владата. Ја поздравуваме и одлуката што конечно после две директни прозивки до Власта, Заев конечно се одважи и охрабри да прифати директен дуел и разговор за овие теми.
Се надеваме дека нервозата во власта нема да биде пречка за квалитетна дебата која пред се од интерес на широката јавност. Го поздравуваме и ангажманот на Вашиот медиум да организира дебата која веруваме дека ќе ги запази критериумите на професионалност и можност за квалитетно и објективно изнесување на ставови.