Судењето за „Маџар Телеком" продолжува на 27 март

На следното рочиште треба да бидат сослушани сведоците Слободан Богоевски и Борче Давитковски.

Судењето против поранешните генерален и финансиски директори на Македонски Телеком Атила Сендреи и Ролф Плат, како и други две лица за злоупотреба на службената положба и склучување фиктивни договори за консултантски услуги со кипарски фирми, познат како “Маџар Телеком” продолжува на 27 март, откако на денешното рочиште беше сослушан сведокот Џемали Мехази.

Случајот го води судијката Ленка Давиткова, а застапник на обвинението е Лиле Стефановска од СЈО.

На следното рочиште треба да бидат сослушани сведоците Слободан Богоевски и Борче Давитковски.

Стефановска, посочи дека сведокот Џемали Мехази е претходно сослушан за истиот случај и има само некои дополнителни прашања, кои се однесуваат на протоколи за соработка потпишани меѓу македонската влада и Македонски телеком. Мехази е потписник на овие протоколи во својство на министер за транспорт и врски.

– Како што претходно имам изјавено, јас не сум бил дел од влада кога е срочен овој документ, туку само кога сум требал да го потпишам протоколот за соработка во својство на ресорен министер за транспорт и врски. Бидејќи овој документ не го имав на увид кога реков дека не се сеќавам, но сега го видов, тогаш ми беше кажано дека треба да го потпишам бидејќи како Влада сме акционери во тогашниот Македонски Телеком, изјави Мехази.

Прашан дали е потписот негов и дали е тој протоколот што го потпишал, сведокот рече дека поминало многу време и не се сеќава на содржината, а потписот треба да е негов.

– Долго време е поминато и колку што се сеќавам од содржината сум го прочитал и треба да е потписот мој, меѓутоа не знам ни кога сум го потпишал, ниту каде е истиот чуван, изјави сведокот.

Обвинителката Стефановска го праша сведокот дали знае дека подоцна врз основа на овој протокол биле исплатени 7, 5 милиони евра во 2006 година, како и на пријателите од Тетово А. А. и М. Џ..

– За вакви чекори првпат слушам. Никогаш немам слушнато дека постои таков договор, ниту дека е преговарано за такво нешто, рече сведокот.

На прашање од одбраната, дали му е познато дали овие протоколи се реализирани, во смисла дали е исплатена поголема дивиденда за државата и други точки од истиот, сведокот рече дека не може точно да одговори.

– Исплатата најверојатно одела преку министерството за финансии и таму може точно да се види кој износ е платен, рече сведокот.

Стапката на наталитет во Италија се намалува

Националниот институт за статистика објави дека стапката на наталитет во Италија е намалена за 34,3 отсто од 2008 година, која беше последната година во која беше забележан пораст.

Стапката на наталитет во Италија продолжи да се намалува и во изминатата година, кога се регистрирани 379.000 раѓања, или 6,4 на 1.000 луѓе, покажуваат прелиминарните податоци објавени денеска од Националниот институт за статистика на Италија (ИСТАТ), цитиран од италијанската новинска агенција АНСА.

Во апсолутна смисла, ова е за 14.000 раѓања помалку од 2022 година, или пад од 3,6 отсто.

Националниот институт за статистика објави дека стапката на наталитет во Италија е намалена за 34,3 отсто од 2008 година, која беше последната година во која беше забележан пораст.

Просечниот број деца по жена се намалил од 1,24 во 2022 година на 1,2 во 2023 година, а историскиот минимум е забележан во 1995 година, кога се родиле 1,19 деца по жена. /МИА

МТСП: Понеделник неработен за граѓаните од католичка вероисповед

Понеделник, вториот ден на Велигден, според Грегоријанскиот календар, неработен за граѓаните од католичка вероисповед.

Министерството за труд и социјална политика соопштува дека согласно Законот за празниците, 1 април 2024 година (понеделник) вториот ден на Велигден, според Грегоријанскиот календар, е неработен ден за граѓаните од католичка вероисповед во Република Македонија.

Министерството за труд и социјална политика на граѓаните од католичка вероисповед им го честита празникот.

АВМУ: Донесено упатство за радиодифузерите за Претседателските и Парламентарни избори 2024

 Агенцијата за аудио и аудиовизуелни медиумски услуги (АВМУ), со цел појаснување на начинот на примена на правилата од Изборниот законик донесе упатство за радиодифузерите за Претседателските и Парламентарни избори 2024.

Како што соопштија денеска од АВМУ, со упатството се опфатени правилата за лимитите за платеното политичко рекламирање (ППР), означувањето на нарачателот на рекламирањето, распределбатата на времето во вести кај Јавниот сервис, бесплатното политичко претставување на Собранискиот канал, обезбедувањето пристапност на содржините за изборниот процес за лицата со попреченост, правилата за известување во деновите на изборниот молк особено за периодот на преклопување на двата изборни процеси.

- За време на изборната кампања за Претседателските избори, во првиот круг на гласање, радиодифузерите може да емитуваат вкупно девет минути и триесет секунди дополнително време за рекламирање на реален час емитувана програма, исклучиво наменети за ППР. Во упатството е точно утврдена распределбата на овие минути меѓу седумте подносители на листи/кандидатите за претседател. Во вториот круг на гласање вкупното време за ППР ќе зависи од времето за ППР што го користат подносителите на листи/кандидатите за претседател кои ќе ја продолжат изборната кампања во вториот круг, се наведува во соопштението.

За време на изборната кампања за Парламентарните избори, се појаснува во соопштението, радиодифузерите имаат право на дополнителни девет минути и триесет секунди за рекламирање на реален час, исклучиво наменети за ППР. По потврдувањето на поднесените листи на кандидати за пратеници од страна на Државната изборна комисија, Агенцијата соодветно ќе го дополни упатството за радиодифузерите за Претседателските и Парламентарни избори 2024.

- За време на изборниот молк за Претседателските избори, на 23 и на 24 април (до 19 часот) 2024 година, продолжува изборната кампања за Парламентарните избори, но запира медиумското покривање во вестите и во посебните-информативни емисии на учесниците во изборните кампањи за двата изборни процеси, се додава во соопштението од АВМУ.

Јавниот сервис и телевизиите на државно ниво што ќе објавуваат платено политичко рекламирање, треба да емитуваат содржини поврзани со изборниот процес во формат пристапен за лицата со попреченост.

Упатството за радиодифузерите за Претседателските и Парламентарни избори 2024 е достапно на веб страницата www.avmu.mk.

притисни ентер