Вкупно 211 години затворска казна за 16 обвинети за „27 април“-Чавков осуден на 18 години затвор, Дурловски ослободен

Екс-министерот за внатрешни Чавков осуден на 18 години затвор, Нинџа на 8 години, а Дурловски ослободен.. По речиси две години од упадот во Собранието, судот пресуди 211 години затвор за 16 од вкупно 17 обвинети во случајот.

211 години затвор вкупно добија обвинетите за упадот во Собранието од 27 април 2017та. Од 17 обвинети за терористичко загрозување на уставниот поредок и безбедноста највисока казна затвор доби првообвинетиот  - тогашен шеф на БЈБ и носител на златната команда Митко Чавков 18 години. Неговите колеги Митко Пешов, Душко Лазаров и Горан Ѓошевски Леви добија по 15 години. Оливер Поповски е осуден на 13 години, а Оливер Радулов на 10 години. Разузнавачот Мунир Пепиќ доби 15 години, а најмалку доби Абдуљфета Алими – 7 години бидејќи единствено тој според судот му помогнал на пратеникот Зијадин Села. Од оние кои со фантомки влегоа во Собранието, највисока казна добија Јане Ченто, Влатко Трајковски и Никола Митревски-Кољо - по 15 години затвор, Вилијам Михајловски доби 14 години затвор, Игор Југ, Младен Додевски и Горанче Анѓелковски по 12 години затвор. Александар Василевски-Нинџа доби 8 години затвор. Обвинителството не успеа да го докаже делото со кое го товареше оперскиот пејач Игор Дурловски, заклучи судијката Добрила Кацарска, па така тој е ослободен од обвинение.

ТЕЛОП Пресуди за 27 Април

Митко Чавков  - 18 години затвор

Митко Пешов – 15 години затвор

Душко Лазаров – 15 години затвор

Горан Ѓошевски Леви – 15 години затвор

Оливер Поповски - 13 години затвор

Оливер Радулов - 10 години затвор

Мунир Пепиќ - 15 години затвор

Абдуљфета Алими – 7 години затвор

Јане Ченто – 15 години затвор

Влатко Трајковски – 15 години затвор

Никола Митревски-Кољо – 15 години затвор

Вилијам Михајловски - 14 години затвор

Игор Југ – 12 години затвор

Младен Додевски – 12 години затвор

Горанче Анѓелковски - 12 години затвор

Александар Василевски-Нинџа -8 години затвор

Игор Дурловски - ослободен од обвинение

Незадоволни од високите казни реагираа и обвинетите. Битката велат ќе ја водат преку жалба до Апелација.

Образложувајќи ја пресудата, судијата Кацарска срамно го нарече однесувањето на полицијата за време на упадот. Видео снимките и сведочењата покажаа дека се работи за однапред осмислено сценарио а мета на напаѓачите биле Зоран Заев и Зијадин Села но и Дамјан Манчевски, рече Кацарска.

По изречените пресуди Обвинителството побара продолжување на притворот но и да им се определи на оние кои имаа поблаги мерки.

Ахмети нуди сите функционери да поминат низ процес на т.н. Ветинг

Партијата на Али Ахмети останува на барањето за ветинг на пратениците и функционерите кои вршат јавна дејност. 

Лидерот на интегративците на средба со ИРИ во Собранието, барал совети за примена на системот за проверка во земјава. Само на тој начин според него ќе се спречат нападите кон функционерите и ширењето на лажните вести. За скандалот со Павле Богоевски пак вели дека не бил во тек.

Во врска со “Операција Метла”, Ахмети вели дека се уште не разговарал на таа тема со Заев, чека да поминат обврските на премиерот за да договорат состанок на таа тема. Заев пак од Виена повторно најави дека промените на дел од функционерите кои потфрлиле во својата работа ќе се случат на почетокот на идниот месец и кажа дека граѓаните испратиле јасна порака дека потребна е промена.

Трајковски предложен за нов член на УО на Еуростандард банка

Горан Трајковски е предложен за нов член на Управниот одбор на Еуростандард банка АД Скопје по препорака на Надзорниот одбор на банката.

Процедурата за именување на Трајковски како член на УО на банката е во тек, информираат од Еуростандард банка.

Оттаму соопштуваат дека Зоран Николовски, долгогодишен член на Управниот одбор на банката, поради приватни причини се повлекува од функцијата Член на Управниот одбор. Својата експертиза, Николовски ќе продолжи да ја споделува како советник на Управниот одбор на Еуростандард банка.

Николче Петкоски останува на функцијата Претседател на УО на Еуростандард банка.

Собранието денеска ја констатира оставката на Горан Трајковски од функцијата директор на Дирекцијата за заштита на лични податоци на негово барање. Трајковски во оставката, која во Собранието е доставена во петокот, пишува дека од лични причини си оди од ДЗЛП. 

Ангеловска-Бежоска – Османи: Народната банка е посветена на евроинтегративните процеси

Гувернерката на Народната банка Анита Ангеловска-Бежоска денеска оствари работна средба со вицепремиерот задолжен за европски прашања Бујар Османи.

На средбата било разговарано за заложбите на Народната банка за исполнување на насоките на Европската унија дадени минатата година во однос на Програмата за економски реформи.

На средбата, како што информираат од Народната банка, било нагласено дека регулативата и практиките во централнобанкарското работење кај нас се одликуваат со голем степен на усогласеност со европските.

Вицепремиерот Османи, посочил дека Народната банка, како независна институција во чија надлежност е монетарната политика, е една од клучните институции од кои се очекува да придонесат во создавањето на преговарачката структура и подготовката на државата за предизвиците на преговорите, особено во делот на економските поглавја.

Османи, исто така, изразил задоволство од досегашната соработка меѓу двете институции, особено во рамките на текот на т.н. објаснувачки скрининг, во чии рамки досега веќе се отворени неколку поглавја од сферата на економијата.

Ангеловска-Бежоска, нагласила дека Централната банка е цврсто решена да даде максимален придонес за приближувањето на нашата економија кон европското семејство.

– Посветено и континуирано работиме и на натамошно усогласување на регулативата којашто е во наша надлежност со регулативата на ЕУ. Особено би ги потенцирала промените во законската регулатива во однос на банкарскиот систем, коишто ќе придонесат за натамошно зацврстување на финансиската стабилност, како и промените коишто се однесуваат на платежните услуги и платните системи. Постојано сме посветени и на усогласувањето на централнобанкарската статистика со европските барања, изјави Ангеловска-Бежоска.

Во процесот на пристапување кон ЕУ, се вели во соопштението, централната банка активно учествува со свои претставници во националната преговарачка структура за пет поглавја од европското законодавство.

На средбата било нагласено дека во контекст на очекуваното забрзување на евроинтегративните процеси, Народната банка ќе продолжи со јакнењето на своите капацитети за да може и натаму да дава максимален придонес во чекорењето по европскиот пат на земјава.

Ангеловска-Бежоска и Османи, на средбата, изразиле задоволство од успехот на Република Северна Македонија, што го постигна влегувајќи  во втората фаза од спроведувањето на Спогодбата за стабилизација и асоцијација со ЕУ, што, како што се наведува во соопштението, создава исклучителен потенцијал за економското поврзување на земјава со земјите членки на Унијата, како важна основа во создавањето услови и потенцијали за полесен влез на странски директни инвестиции коишто доаѓаат од Унијата и воопшто, за унапредување на економската размена со ЕУ. 

притисни ентер