Османи: Имаме добри односи во владеачката коалиција, Владата продолжува со својата работа

Односите во владеачката коалиција се добри и Владата продолжува со својата работа, порача вицепремиерот Бујар Османи во врска со изјава на пратеникот  Мухамед Зекири дека е опција и доколку може Влада без ДУИ.

-Ние имаме добри односи помеѓу владејачката коалиција. И не гледам дека сега имаме потреба во Влада да се дефокусираме со вакви обиди што повеќе имаат за цел да ја оживеат дебатата низ социјалните мрежи отколку да одразуваат некоја динамика на односи меѓу двете политички партии. Владата продолжува со својата работа. Вчера до два ноќе имавме седница на Влада, носевме важни одлуки за земјата. Продолжуваме понатаму со реформската агенда бидејќи ова се историски мигови за земјата да добие датум за преговори што го чекаме веќе 18 години, изјави Османи на заедничката прес-конференција со француската министерка за европски прашања Натали Лоазо.

Во врска со тоа дали она што се случуваше во Парламентот со барањето за симнување на имунитетот на Трајко Вељаноски е поврзано со судбината на СЈО, односно дека на ДУИ не му одговара да продолжат со истраги бидејќи, како што беше речено, се вмешани и нивни функционери, Османи рече дека тоа е лажна вест и дека ДУИ дава апсолутна и целосна поддршка на СЈО.

– ДУИ е и единствената партија во Република Северна Македонија што има донесено одлука на претседателството и бара целосна истрага од домашни и меѓународни организации на сите функционери од 2002 до сега, бидејќи е време да се почне битката против лажните вести и пропаганда. Значи ДУИ е единствената партија и ги повикуваме и другите политички партии да го направат истиот повик до институциите да направат истрага на нивните функционери додека биле на власт, рече Османи.

Тој посочи дека за Нацрт законот за јавно обвинителство има само некоку членови што се однесуваат на СЈО, а во тој дел ДУИ рече, нема никаква разлика со СДСМ за тоа како треба да се реши судбината на Специјалното обвинителство, а тоа, е додаде, да се продолжи со целосно расветлување на сите истраги што произлегуваат од прислушуваните материјали и да се инкорпорира во ЈО бидејќи тоа беше препорака на експертите.

-Разликите одредени во текстот беа пред се во делот на правичната застапеност, како ќе се гарантира, како ќе се обезбеди, некои технички прашања што се усогласени во меѓувреме. Ние немаме апсолутно никаква разлика во тој закон и апсолутно лажна вест е дека тоа било предмет на некакви разлики. Ставот на ДУИ е тоа да се најде трјано решение и да се даде можност да се продолжат сите истраги до целосно рачистување, рече Османи.

Тој појасни дека предлогот што го даде Министерството за правда е СЈО да се инкорпорира како автономно одделение  во ЈО со цела автономија и во делот на буџетот и во делот на надлежносите и во делот на тоа што треба да покрие како антикорупциско обвинителство.

Очекува многу брзо законот за обвинителството да биде донесен затоа што роковите за испоорака треба да бидат до 18 март за сите законски решенија во делот на Планот 18. /MИА

Цакај: Предвремени избори во Македонија не се заради неуспехот со преговорите

Албанскиот министер за Европа и надворешни работи Гент Цакај оцени дека „предвремените избори во Македонија не се поради неуспехот да се отворат преговори со ЕУ".

Тој нагласи дека „во соседната земја" од поодамна се дискутирало за предвремени парламентарни избори, додавајќи дека предлогот на премиерот Зоран Заев „не е поврзано со одлуката на Советот на Европа".

– Дискусијата за предвремени избори во Македонија е од многу порано. Вие не можете да ги поврзете процесите. Предлогот за предвремени избори не е последица на одлуката на Советот, изјави Цакај на прес-конференцијата во Министерството за надворешни работи, одговарајќи на новинарско прашање околу можноста за предвремени избори и во Албанија.

Цакај, исто така, изјави дека „во Македонија имало ветувања дека овој процес (отворање на преговори) неизбежно ќе се случи", додека албанската Влада „не го гарантирала тоа".

Инаку, обраќањето на премиерот Заев се најде во ударните термини на сите албански медиуми, со посебен акцент на предлогот за предвремени избори и решителноста да се продолжи со реформите. /МИА

Традиционален саем на медот во Кочани со бесплатна едукација за потрошувачите

Во Кочани по 22. пат се одржува дводневниот Саем на медот, чиј организатор е локалното пчеларско здружение „Матица".

На манифестацијата, која е најголема од ваков вид во источниот регион, штандови имаат 25 пчелари и пчелни стопанства од Битола, Куманово, Тетово, Пробиштип, Свети Николе, Виница и од Кочани.

Покрај мед и пчелни производи, на посетителите на саемот им се нудат и пчеларски алати и опрема.

– Годинава беше релативно поповолна за пчеларството во споредба со претходните и произведовме квалитетен шумски мед. Во зависност од подрачјето во регионот во кој се наоѓаат пчелните семејства, количините се во рамки на просекот, односно околу 12 килограми од кошница. Присутни се и пчелари од беровскиот крај кои добија многу повисоки приноси од просечните. Иако немаме меѓусебен договор, сепак цената што ја бараат нашите пчелари се движи меѓу 350 и 400 денари за килограм, што е во рамки на рентабилноста, истакна претседателот на здружението „Матица", Благој Митев.

Новина на саемот годинава е обезбедената бесплатна едукација со печатен материјал и средби со потрошувачите на кои им се укажува за корисноста од употреба на медот, како да препознаат природен мед и за начинот на користење на другите пчелни производи.

Покровител на манифестацијата е општина Кочани, а градоначалникот Николчо Илијев истакна дека при крај е постапката за прогласување на Осоговскиот регион за заштитено подрачје што се реализира во соработка со Македонското еколошко друштво и Програмата за зачувување на природата во Македонија./МИА

Унијата на жени на ВМРО-ДПМНЕ примена во членство во Организацијата на жени на Европската народна партија

Унијата на жени на ВМРО-ДПМНЕ е примена за членка на  Организацијата на жени на Европската народна партија (EPP Women) на Конгресот кој се одржува во Виена 18-19 октомври 2019.

На состанокот во седиштето на Австриската народна партија присуствуваат претседателката на Унија на жени, Благица Ласовска и секретарот за меѓународна соработка на Унијата, д-р Христина Рунчева Тасев.

Со овој прием, се заокружува вклученоста на сите структури на партијата во Европската народна партија, која е најбројната партија во Европскиот парламент и се потврдуваат европските аспирации на ВМРО-ДПМНЕ и придонесот на жените во креирањето на политики на европско ниво.

На Конгресот на женската секција на Европската народна партија е усвоена резолуцијата “Женски визии за подобра Европа” која се однесува на приоритетите за делување на Европската комисија во периодот 2020-2024 година.

Центар за комуникации на ВМРО-ДПМНE 

притисни ентер