Парламентот е опкружен со бодликава жица, а 1.500 специјалци ја обезбедуваа Тирана по најавите дека толпата ќе се обиде да упадне во Собранието, кое мораше да ја откажа предвидената седница.

Здружената опозиција бара оставка од Еди Рама, кој е во посета на Италија и вонредни избори, поради како што велат, коруптивната и криминална власт. Опозицијата ги оствари најавите и денеска се откажаа од вкупно 44-те мандати.

-Ова е пораката што треба да ја слушне Рама, кој побегна од Тирана. Опозицијата денеска ги предаде мандатите и од денеска ние стануваме обични граѓани како и вие. Битката продолжува се до прекинување на неправдата, изјави Љуљзим Баша, лидер на Демократската партија

Битката за крај на неправдата, како што најавуваат организаторите, продолжува и во соседна Србија, каде задутре ќе се одржи 11-иот во низа граѓански протест, наречен Еден од пет милиони, кој сериозно ја тресе позицијата на претседателот Вучиќ. Денеска Вучиќ се обиде да ја релативизира нивната моќ, со оглед дека тие на бараат нови избори.

-Тие не протестираат затоа што мислат дека изборната волја е поинаква. Тие знаат дека се помалку, но сакаат своето да го наметнат, изјави денеска Александар Вучиќ, во интервју за Б92.

Паралелно со антивладините собири и самиот Вучиќ веќе трета недела тера кампања и средби со граѓаните, кои многумина ги протолкуваа како контра протест. Телевизијата N1 објави видео снимка од еден од митинзите, на која се слуша како на учесник на собирот му се наложува дека мора да остане до крајот.

-А, кога завршува. Имам некои обврски, затоа прашувам? За 5-10 минути. Значи, морам да останам до крај. Ако си заминете, морам да ве фотографирам дека сте заминеле, а вие, како сакате, вели еден од организаторите на митингот, кому му е скриен идентитетот.

Проблеми на релација власт – опозиција има и во соседна Бугарија, каде што опозицијата го бојкотира парламентот поради измените на изборниот законик.