Со нејзиното прифаќање и спроведување победници се граѓаните на двете земји и на целиот регион. Победници и оние кои се противеа договорот, бидејќи и за нив доаѓа време на просперитет, мир и пријателство, порача Заев.
„Од денеска тргнуваме со уште поголема сила да ги зближуваме граѓаните и народите на двете земји. Иднината нема веќе да ја гледаме како фатална судбина, туку како заеднички пат поплочен со пријателски намери и вредности кои произлегуваат од заедничкото европско семејство. Храбрите граѓани избраа да ги избркаат сеништата од минатото и на светот да му дадат Балкан од кој извираат можности и политичка стабилност, место со поврзани соседи, зона на економски процут, модел за интеграција. На Европа и на светот им треба стабилност и соработка за решавање на глобалните проблеми што се и наши проблеми„, истакна македонскиот премиер.
Канонадата од честитки по усвојувањето на преспанскиот договор упатени до Грција и Македонија продолжи и денеска. По еврокомесарот Хан, високата претставничка Могерини, претседателот на Европската Комисија Јункер, првиот човек на Европскиот Совет, Доналд Туск, задоволство по грчката поддршка на Договорот изрази и канцеларката Меркел.
- „Ова е само мала, но многу важна вест, која има многу врска со војна и мир, како и со стабилност. Сега, со Преспанскиот договор, патот за земјата кон евроатланските интеграции е отворен.
Пофалби за ратификацијата ан спогодбата од Преспа денеска упати и Генералниот секретар на ОН Антонио Гутереш, оценувајќи дека Договорот ќе го зајакне мирот и стабилноста во регионот и ќе ги поттикне напорите за помирување во Европа и во светот. Храброста и решеноста на Заев и Ципрас за надминување на повеќедеценискиот билатерален спорт, ги поздрави и францускиот министер за Европа и надворешни работи, Ле Дриан.
Храброста на грчкиот премиер Ципрас и неговиот македонски колега Заев е достојна за восхит, порача и поранешниот бугарски претседател Росен Плевнелиев. Тој најави дека групата „Пријатели на Македонија“, заедно со европратеници ќе предложи кандидатура на премиерите Заев и Ципрас за Нобелова награда.