Според уставните амандмани кои беа изгласани во Македонија, промената на името и измените на уставот ќе бидат применливи дури откако Грција ќе го ратификува пристапниот протокол за членство на земјава во НАТО, но не претходно.
- Член 1 од Уставен закон
„Амандманите од 33 до 36 на Уставот на Република Македонија влегуваат во сила со влегувањето во сила на Конечната спогодба за решавање на разликите, за престанување на важноста на Привремената спогодба од 1995 година и за воспоставување на стратешко партнерство меѓу страните и ратификацијата на Протоколот за пристапување во НАТО од Првата страна на Конечната спогодба.
Следните чекори за целосно спроведување, се уште се во Грција, каде треба да се објави законот за договорот во службен весник. Тоа според најавите ќе се случи идната недела, по потписот од грчкиот претседател Прокопис Павлопулос. Потоа, Грција треба да го извести НАТО за спроведување на преспанскиот договор, а алијансата да подготви Протокол за пристапување на нова земја членка. Процесот на ратификација треба да помине во сите 29 земји членки на НАТО до крајот на годината, со тоа што Грција се обврза дека прва ќе го стори тоа. По гласањето во парламентот, официјална Атина со вербална нота ќе ја извести земјава дека го ратификувала протоколот, а Македонија со писмо ќе ги извести ОН и меѓународните организации за новото име – Република Северна Македонија.
Објавување во службен весник во Грција
Подготвување на протокол во НАТО
Ратификација на протоколот во Грција
Вербална нота до Македонија дека Грција го ратификувала протоколот
Македонија со писмо ги известува ООН и меѓународните организации за новото име – Република Северна Македонија.
Договор од Преспа.
„По влегувањето во сила на оваа спогодба, Македонија веднаш и во согласност со разумните административни практики ќе ги преземе сите неопходни мерки со цел надлежните органи на земјата од тогаш понатаму внатрешно да го употребуваат името и термините од оваа спогодба во сите нови службени документи, кореспонденција и релевантни материјали”
Предвидува договорот. Сепак, со тоа земјава не станува веднаш членка на НАТО. Додека трае ратификацијата во парламентите на останатите членки на алијансата, Македонија ќе учествува во процесите, односно ќе добие столче на масата, но без право на глас.
Откако ќе биде ратификуван протоколот за членство во парламентите на сите 29 земји членки на алијансата, следува поканата за пристапување, која на земјава ќе и ја упати Генералниот секретар на НАТО Јенс Столтенберг.
Последниот дел од пристапувањето е земјава и формално да го прифати членството во Алијансата, со референдум или со гласање во парламентот. Официјалното пристапување на Македонија како 30-та земја членка на Алијансата според најавите би се случило во 2020 година.