Здравје

Три нови случаи со мали сипаници во Скопје, досега 69 заболени

Три нови случаи со мали сипаници (морбили) се регистрирани вчера во Скопје.

Станува збор за дете на возраст од една и пол година од населбата Чаир, како и за 10-месечно дете и петгодишно дете од Центар, кои не биле вакцинирани, информираат денеска за МИА од Министерството за здравство.

Со овие три нови случаи, како што посочуваат, од декември, досега, во Скопје се регистрирани 69 заболени од мали сипаници.

– Во моментов 24 пациенти со морбили се сместени на Клиниката за инфективни болести. Крај на епидемијата ќе се прогласи тогаш кога нема да има ниту еден заболен во период од четири недели. Од почетокот на епидемијата на морбили во декември и од почетокот на забраната за примање деца во градинка кои не се вакцинирани со МРП вакцина, досега, се вакцинирани повеќе од 3.400 деца, истакнуваат од Министерството за здравство.

Во меѓувреме, во градинките во Скопје се уште не се примаат невакцинирани деца, а државните здравствени инспектори прават увид на терен за да утврдат дали има градинки што примаат невакцинирани деца, но досега не регистрирале таков случај.

Свет

Приватна средба на полскиот премиер со Трамп

Полскиот претседател Анджеј Дуда соопшти дека за време на неговата посета на Њујорк, вчера имал приватна средба со поранешниот шеф на американската држава и републикански претседателски кандидат Доналд Трамп.

Изборниот штаб на Трамп ги опиша двајцата политичари како „одлични пријатели“, се вели во соопштението за состанокот, во кое се додава дека разговарале за предлогот на Дуда земјите од НАТО да трошат најмалку три отсто од својот БДП за одбрана.

Дуда, чиј мандат истекува во 2025 година, беше еден од меѓународните партнери на Трамп кога тој беше претседател.

– Доналд Трамп ме покани во својот приватен стан, така да се каже. Ова е едноставно приватен состанок за време на мојот престој овде, во Њујорк, изјави Дуда.

Трамп, кому му се суди во Њујорк под обвинение дека го купил молчењето на порно актерката Сторми Даниелс за нивната врска, е во тесна трка против актуелниот демократ Џо Бајден пред претседателските избори во ноември.

Многу европски лидери долго време стравуваат дека новиот мандат на Трамп може да значи намалување на американската поддршка за Украина, која граничи со Полска, но и за НАТО алијансата.

„Претседателот Трамп со задоволство потсети на неговата значајна посета на Полска во 2017 година и го пофали полскиот народ за цврстата одбрана на својот суверенитет и посветеноста на заштитата на европските граници од секакви и сите закани, објави предизборниот штаб на Трамп во соопштението за печатот.

Шоу биз

Синовите на Џон Ленон и Пол Макартни снимија песна

Синовите на некогашните членови на поп-рок составот „Битлс“ - Џон Ленон и Пол Мекартни, објавија заедничка песна за познатиот парк „Примроус Хил“ во Лондон.

Џејмс Мекартни (46) и Шон Оно-Ленон (48) заеднички ја напишаа баладата „Primrose Hill“, пренесува лондонски „Телеграф“.

„Многу сум среќен што можам да ја споделам мојата најнова песна што ја напишав со мојот добар пријател Шон Оно-Ленон. Со објавувањето на оваа песна се чувствуваме како да се движиме сите заедно. Возбуден сум што ќе продолжам да споделувам музика со вас“, напиша Мекартни на Инстаграм.

Познатиот парк бил отворен во првата половина на 19. век на ритче во центарот на Лондон, а таму денес се наоѓа куќата на сер Пол Мекартни.

Фудбал

Пиоли пред реваншот со Рома: Ова е одлучувачки момент за европските амбиции на Милан

Тренерот на Милан, Стефано Пиоли, ги искажа своите очекувања за вечерашниот натпревар со Рома.

Во првиот натпревар од четвртфиналето на Лига Европа, Милан загуби на домашен терен од Римјаните со резултат 0:1.

- Одам на овој натпревар со самодоверба бидејќи знам за што се способни моите играчи. Сигурен сум дека знаат што да прават на вакви важни натпревари. Мора да подобриме некои ситници во однос на првиот натпревар. Ова е одлучувачки момент за нашите европски амбиции. Мора да ги покажеме нашите најдобри квалитети на теренот и да ја исцедиме секоја последна капка пот, изјави тренерот на Милан.

Натпреварот на „Олимпико“ во Рим ќе почне во 21 часот.