Поранешниот словенечки премиер навредувал новинарки на твитер, сега мора да плати 6.000 евра

Лидерот на Словенечката демократска партија и поранешен словенечки премиер, Јанез Јанша казнет е со 6.000 евра поради навреда на новинарки на Радиотелевизија Словенија (РТВ).

Во пресудата изречена после повторно судење во Велење, со која судот ја потврдил својата првобитна одлука, наредено му е на Јанша да ги плати и трошоците за судењето во висина од 513 евра, јавува агенцијата „СТА“.

Во пораката која на Твитер ја објавил во 2016 година, Јанша новинарката на РТВ, Евгенија Карл и уредничката Мојца Пашек Сетинц ги нарекол “испрани проститутки чии евтини услуги ги нудат на Фејсбук страница на јавна куќа“.

Новинарките поднеле посебни тужби против Јанша, а судот во Велење пресудил во нивна корист.

Јанша се жалел на двете судски одлуки, при што Вишиот суд во Целје застанал на негова страна и наложил повторно судење во случајот на Евгенија Карл, но ја потврдил првостепената пресуда во случајот на Пашек Сетинц.

Поднесена кривична против двајца кичевци за „незаконско влијаење врз сведоци"

Против двајца кичевци е поднесена кривична пријава поради тоа што „незаконски влијаеле врз сведоци".

Како што соопшти МВР, надворешната канцеларија за криминалистички работи од Кичево поднела кривична пријава против кичевчаните Ф.М.(25) и А.М.(22), поради постоење основи на сомнение за сторено кривично дело „незаконито влијание врз сведоци".

На 09.07.2019 година пријавените пратиле телефонски пораки со закана кон А.Т. (21) од Кичево, поради тоа што претходно дал изјава како сведок во постапка против нив пред Основниот суд во Кичево./МИА

УЈП ќе почне контроли кај физичките и правните лица поврзани со „Рекет"

Управата за јавни приходи (УЈП) до петок ќе даде налози за отпочнување на контроли кај физичките и правните лица поврзани со случајот „Рекет", најави денеска директорката на УЈП Сања Лукаревска.

-Ќе постапиме во делот кој се однесува на даноците. До петок би требало да ги дадеме налозите за отпочување на контролата во Меѓународниот сојуз, 1ТВ, БМЈ груп и сите останати даночни обврзници за кои преку анализите сме утврдиле дека постоеле одредени деловни односи и соработка. Ќе направиме и контрола на сите засегнати физички лица во телата и органите на Меѓународниот сојуз за кои ќе ги утврдиме и исплатите кои се правени, рече Лукаревска во одговор на прашање на денешата прес-конференција во УЈП.

Таа прецизира дека физичките лица ќе бидат контролирани по основ на остварените приходи и по основ на Законот за персонален данок, а останатите даночни обврзници преку ДДВ, данок на добивка, пресметки, деловни односи, задржан данок,…

-Преку исплатите што ги правел Меѓународниот сојуз ќе видиме на чија сметка од физичките лица се легнати тие пари и дали воопшто се пријавени. Доколку се утврдат даночни затајувања УЈП ќе започне постапки за потекло на имот, посочи Лукаревска.

Директорката на УЈП информираше дека при вчерашната контрола на дуќаните во Пластичарката улица и во Општина Чаир, постапувајќи по пријава на граѓани за нерегуларности со фискалните сметки, била извршена контрола на фискалните апарати кај 42 даночни обврзници.

-Кај 12 даночни обврзници се констатирани неправилности согласно Законот за регистрирање на готовинските плаќања.Од нив девет не издавале фискални сметки, еден не поседувал  фискална опрема, а два не воделе книга  за дневни финансиски извештаи. Во два објекти констатирано е дека физичкото лице врши дејност трговија, без регистрирана фирма, рече Лукаревска и додаде дека против нив се преземени соодветни мерки.

Потенцира дека во Пластичарската улица се заклучувале објектите откако ги виделе возилата на УЈП со што биле оневозможени да изврат контроли. Во објектите каде извршиле контроли нашле на добра соработка од вработените.

УЈП досега спроведе контроли и во Дебар, Кичево, Струга, Охрид, Тетово, Гостивар, Струмица, Куманово, Крива Паланка, Дојран, Гевгелија, Прилеп и во повеќе скопски општини. Предмет на контола биле и повеќе фестивали во Охрид, Прилеп, Дојран, Струмица и Струга каде Управата делувала превентивно.

Директорката информираше дека за речиси три пати е зголемен бројот на пријавите за неправилности и неиздавање на фискални сметки од страна на граѓаните со воведувањето на мерката за поврат на15 отсто од пресметаниот ДДВ. Од 1 до 20 август се регистрирани 97 пријави за неиздвање сметки, а лани во овој период имало само 26. Од 1 јули со стартот на Мој ДДВ до сега се поднесени вкупно 310 пријави, а во истиот период лани 112. Најголем дел од нив се за Скопје, поточно за Општина Чаир и за Охрид и Струга.

Заклучно со вчера бројот на скенирани фискални сметки е 12.371.552 со кои е остварен промет од 6.360.382.050 денари за кои вкупниот ДДВ изнесува 690.603.831 денар, а повратот од 15 отсто е  во износ од 103.590.575 денари.

– Веб апликацијата „Мој ДДВ" преку која граѓаните ќе имаат детален увид за се што скенирале изминатиот период, како и колку поврат може да остварат е веќе изработена и тестирана и ќе биде пуштена во употреба. Преку неа граѓаните ќе можат да ги повлечат, односно да ги поништат погрешно скеираните фискални сметки, потенцира Лукаревска и апелираше дел од поголемите супермаркети, за кои граѓаните се жалат дека не можат да ги скенираат сметките, бидејќи се бледи, да ги сервисираат своите фискални апарати./МИА

Јанева по претресот во СЈО, донесена повторно дома

Специјалната јавна обвинителка Катица Јанева која со полициска придружба попладнево го напушти СЈО, повторно е вратена во нејзиниот дом во скопската населба Козле.

Обвинителката Вилма Рускоска потврди дека полицијата влегла во СЈО со налог да се одземе компјутерот на Јанева. Засега нема информации зошто Јанева е вратена дома.

Се очекува во текот на денов таа да биде изведена пред судија на претходна постапка кој треба да одлучи по барањето на Јавното обвинителство за одредување мерка притвор.

ЈО бара притвор за Јанева поради основано сомнение за злоупотреба на службената положба и овластувања, заради стекнување лична корист.

Полицијата денеска по налог ЈО ја приведе Катица Јанева во нејзиниот дом, по што со полициска придружба беше донесена во СЈО.

Катица Јанева, која беше спомната во снимките што ги објави италијанскиот весник „Ла Верита", вчера беше на распит во Јавното обвинителство за организиран криминал за случајот „Рекет"./МИА

притисни ентер