Од Скопје до Приштина за 45 минути по новиот автопат што почнува да се гради годинава

Од Скопје до Приштина за 45 минути во 2023 тата. Автопатот Скопје - Блаце ќе почне да се гради, во вториот квартал годинава, најавија надлежните. 

 Ќе се гради во две фази. Тендерот за првата фаза, од граничниот премин Блаце до клучката Блаце, во должина од 2км, ќе биде објавен следниот месец, а треба да е готов следната година.

Според планираното, втората фаза од изградбата, од клучка Блаце до клучка Стенковец кај Скопје, ќе започне во 2020тата. Таа делница ќе биде долга 10,5км, но е покомплексна за градба. Трасата се препроектира, поради низа проблеми.

Автопатот е во должина од околу 12,5км, а ќе биде широк околу 28 метри. Предвидени се 4 тунели во должина од 4км, 8 мостови и други придружни објекти. Како и две клучки, една кај Блаце и друга кај Стенковец.

Име за автопатот се уште нема, но вицепремиерот Османи вели дека во неформални разговори со лидерот на ДУИ, Ахмети, се размислува за името „Арбен Џафери“ – исто како автопатот во Косово, но за ова дополнително ќе разговараат во Владата.

Скопје  - Блаце ќе чини 110 милиони евра. Првата делница ќе се гради со 10 милиони евра - пари од Јавното претпријатие за државни патишта, 73 милиони се заем од ЕБОР, а уште 27 милиони треба да се обезбедат преку грант.

Во велешко активни неколку шумски пожари

 Уште еден шумски пожар над месноста викана „Неделна вода" во Велес изби утрово во 9:30 часот, каде гори нискостеблеста дабова шума. 

Во гаснењето се вклучени екипи од ШС „Бабуна" и Територијалната Противпожарна Единица од Велес.

Од ТППЕ Велес, за МИА информираат дека се уште гори нискостеблестата дабова шума и над Манастирот кај село Оморани што избувна вчера попладне, а во гаснењето се вклучени екипи од Шумското стопанство „Бабуна" од Велес.

Пожар има и во реонот на велешките села Џидимирци и Иванковци, а зафатена е и површина од скопска страна поради што, освен велешки, вклучени се и пожарникари од ТППЕ од Скопје како и вработени од ЈП „Македонски шуми" од Скопје.

Екипи на ШС „Бабуна" од Велес работат на целосно газнење на пожарот кај село Каласлари во кој гореше квалитетна борова шума.

– Пожарот избувна во петокот, а беше локализиран вчера напладне со екипа на ТППЕ од Велес, но нашите екипи од ШС „Бабуна" од Велес вчера, ноќеска и денеска се уште се на терен и работат на негово целосно ликвидирање, информира за МИА Љубинка Попова, директор на ШС „Бабуна" од Велес.

Во овој голем шумски пожар изгореа околу 50 хектари квалитетна борова шума, а во негово гаснење беа вклучени и два авиони од Дирекцијата за заштита и спасување. /МИА

Нов протест во Црна Гора со барање за оставка на владата и претседателот

Во Подгорица синоќа е одржан шестиот по ред граѓански протест „97.000: Спротивстави се“, на кој учествуваа повеќе илјади граѓани со барање за оставка на Владата и претседателот на државата.

Собирот мина без инциденти, а организаторите ги повикаа граѓаните и на 30 март „без страв“ да излезат на протести.

Еден од организаторите, Славиша Грубиша, оцени дека опозициско единство и тесна соработка е неопходна во овој случај. – Не дели мал чекор од целта, со нас се синдикатите. Ова е протест на сите граѓани и сите се добредојдени, потенцира Грубиша.

Демонстрациите, оценети како најмасновни граѓански протести во Црна Гора, почнаа по објавувањето на аферата „Коверт“.

Душко Кнежевиќ, бизнисмен близок до власта, кој пред истрагата на црногорското обвинителство побегна во Лондон, објави снимка на која на најблискиот соработник на Ѓукановиќ и поранешен градоначалник на Подгорица Славољуб Стијеповиќ, пред изборите во 2016 година му предава коверт со, како што вели, 97.500 евра.

Стијеповиќ парите веднаш ги става во џеб. Оттогаш почнува политичкиот потрес во Црна Гора, а бројката „97.000“ стана и официјален назив на групата граѓани, кои под слоганот „Спротивстави се“ почнаа со улични протести.

Под притисок на јавноста, Обвинителството го сослуша Стијеповиќ дури после седум дена, а после 20 беше осомничен за перење пари.

Во меѓувреме, Кнежевиќ, јавно обвинувајќи се и сам себе, соопшти дека на сите избори богато ја финансирал Демократската партија на социјалисти на Ѓуканович, што е строго забрането. Тој го обвини и за низа други махинации.

Обвинителството одговори со покренување нови истраги против Кнежевиќ, додека воопшто не го сослуша Ѓукановиќ за аферата „Коверт“, бидејќи верувале оти тој не знаел за незаконското финансирање на партијата на чие чело се наоѓа.

Ѓуканович ги отфрли обвиненијата, тврдејќи дека Кнежевиќ му се одмаздува бидејќи одбил да го заштити од истрагата на Обвинителството.

Народна банка со низа активности ќе ја одбележи Глобалната недела на парите

Народна банка по повод Глобалната недела на парите, која почнува од утре, ќе реализира активности за јакнење на свеста за потребата од поголема финансиска писменост и ќе ги промовира предностите од поголемата финансиска вклученост.

Посебен настан ќе биде националниот натпревар во рамки на Европскиот квиз на парите што за првпат ќе се одржи во нашава земја. Оваа активност е на иницијатива на Македонската банкарска асоцијација, а во извршувањето покрај Народната банка, се вклучени и Комисијата за хартии од вредност и Министерството за образование и наука. На натпреварувањето, на 27 март, ќе бидат избрани победниците кои ќе ја претставуваат земјава на финалето што ќе се одржи во Брисел во организација на Европската банкарска федерација.

Како најава на активностите за одбележување на Глобалната недела на парите, вчера Народна банка почна да го објавува серијалот текстови „Економија за секого", преку кој, на едноставен јазик, за пошироката јавност се објаснуваат одредени поими или појави од областа на макроекономијата, финансиите и банкарството. 

Народната банка започна и едукативен караван со кој за ученици од неколку училишта, главно од руралните средни, обезбеди превоз за да можат да ги посетат централната банка и другите регулаторни институции од финасискиот сектор. При посетата на Народната банка, учениците ќе имаат можност да проследат едукативни презентации и да добијат едукативни материјали, како и да го посетат Музејот на Народната банка. Народната банка, како што најавуваат оттаму, ќе ја посетат и деца од една детска градинка во обид и на најмладите генерации да им се доближи значењето на парите. /МИА

притисни ентер