Дискусија за нацрт амандманите за уставни измени во МАНУ

Заменикот на претседателот на Владата, Бујар Османи и министерот Никола Димитров, учествуваа на третата јавна дискусија за нацрт амандманите за уставни измени во согласност со Договорот од Преспа, која се одржа во амфитеатарот на МАНУ.

Предлозите и сугестиите, кои беа изнесени на тричасовната дебата, на која експертски осврти дадоа академиците Владо Камбовски и Таки Фити и професорот Светомир Шкариќ, како и други претставници на академската заедница, граѓански организации и граѓани, ќе бидат сумирани и поднесени до Владата, која ќе ги изготви заклучоците од серијалот јавни дискусии и ќе ги достави во Собранието.

Вицепремиерот за евроинтеграции, Бујар Османи истакна дека Преспанскиот договор е историски договор, кој е постигнат како што рече во една историска година за нас и дека тој ќе отстрани товар, односно еден голем камен, кој не ја оставаше Македонија да оди напред.

Вицепремиерот Османи се осврна на позитивните аспекти на Договорот, кој рече дека гарантира членство во НАТО и ЕУ и обезбедува сигурна иднина и од економски и од безбедносен аспект за сите граѓани, посебно младите кои не би сакале да останат во државата, ако таа им нуди неизвесна иднина.

„Евроатлантската ориентација и стратешка цел, никогаш, ниту во најтешките моменти од живеењето на нашата земја, не беше доведена под знак прашање. Над 75 проценти од населението, независно од етничката или верската припадност, континуирано беа и останаа за членство во ЕУ и НАТО. Тоа е голема обврска за сите сериозни политичари, а ние се сметаме за сериозни политичари и ви ветувам дека со сите наши одлуки, сега и натаму, ќе го следиме масовниот глас на граѓаните“, рече Османи оценувајќи дека Македонија е единствена земја која покажа како на европски начин се решаваат балканските идентитетски проблеми.

Министерот за надворешни работи Никола Димитров рече дека Македонија не може да ја смени својата географска положба, ниту својата историја која е важна и темел на нејзиното постоење, но, во денешнината како што истакна, може да влијае за иднината, со преземање на одговорноста и со донесување на одлуки како Договорот од Преспа и неговата имплементација.

„Најголемата штета од нерешавањето на спорот со Грција е врз нас. Не е ниту САД, ниту Русија, ниту Европа, ниту Германија, ниту, пак, Грција. Не е точна тезата дека другите имаат интерес да се реши овој проблем“,  рече министерот Димитров посочувајќи дека штетата најмногу ја трпиме самите ние, кои сме надвор од НАТО и Европската Унија.

Димитров истакна дека со Договорот од Преспа и решавањето на повеќедецениското прашање се затвора и поглавјето на идентитетските прашања, кое заедно со членството во НАТО и ЕУ, се трите цели кои Владата сака да ги постигне со овој Договор.

Академик Таки Фити во своето излагање, потсети на заклучоците од научната расправа на Академијата, која се одржа во септември, истакнувајќи дека имплементирањето на Договорот од Преспа ја обезбедува единствената алтернатива за Македонија, односно напредувањето во евроатлантските процеси. Академикот Таки Фити додаде дека договорот ги зајакнува и зацврстува идентитетските прашања, осврнувајќи се на потребата експертите да се изјаснат за да се изнајде решение за имињата на некои од институциите, откако ќе бидат усвоени уставните измени. Тој рече дека и во МАНУ нема едногласие по овие прашања, но оцени дека и тоа е легитимно, доколку за забелешките се понуди алтернативно решение.

Академик Владо Камбовски во обраќањето рече дека Договорот од Преспа е заснован на европски начела, вредности, почитување на трајното пријателство и човековите права, додавајќи дека уставните измени треба да се гледаат во контекст на елементите кои се содржани.

Камбовски се задржа и на, како што рече неколку императивни елементи, набројувајќи ја промената на официјалното име, решение кое го оцени како компромис кој ги балансира интересите на двете држави, а притоа не го оспорува националниот идентитет. Тука Камбовски подвлече дека  во историјата, Македонија била и Демократска, Народна, Социјалистичка. Потоа, Академикот во врска со формулацијата за државјанство, ја оцени одредницата „граѓани на Република Северна Македонија“ како исправна формулација  за уредување на статусот на граѓаните и особено дефинирањето на македонскиот јазик како официјален јазик.

Професорот Камбовски на дебатата ја начна и темата во врска со наоѓање решение, во случај да се јави ситуација како сегашната, кога Претседателот на државата не го потпишува Указот за Законот за ратификација на Договорот, кој веќе два пати е изгласан од пратениците и помина во Собранието на Република Македонија.

Професорот Светомир Шкариќ во своето излагање се задржа на предлогот, Договорот од Преспа да се смести во посебен амандман и да биде дел од уставниот поредок на Република Македонија, со што би се обезбедиле импликации врз уставните норми и правниот систем. Дел од сугестиите на Професорот се однесуваа на амандманот 34, предлагајќи одлуките на АСНОМ да останат такви какви што се и да се додадат зборовите „забележани или запишани во Прогласот“.

Според Шкариќ, уставните измени се многу полесни од тоа што изгледа и додаде дека тежината е поврзана со политичкиот процес, договорот на двете Влади.

На јавната дискусија, беа отворени и прашањата како да се регулираат интересите на  македонските државјани во дијаспората, се слушаа различни мислења за тоа дали треба или не треба да се набројуваат другите етнички заедници по однос на дијаспората, како и прашања кои би се отвориле во периодот по стапувањето во сила на Законот за Договорот од Преспа, а кои се однесуваат на истражувања во научната дејност. 

Дебатите за уставните измени, организирани од Владата како овластен предлагач на истите, продолжуваат во понеделник во Штип и Тетово.

Е-Tinex – новата интернет продавница на Тинекс

Ланецот на супермаркети Тинекс од 17ти декември ја отвори својата прва електронска продавница E-Tinex.

Електронската продавница E-Tinex претставува најсовремена онлајн продавница за малопродажба во Македонија, со широка понуда на производи достапни за купување од дома или било која друга локација.

E-Tinex продавницата располага со асортиман од 6000 производи поделени во 22 групи кои опфаќаат различни категории на производи како основни производи, овошје и зеленчук, месо и сувомеснати производи, млечни производи, готови јадења, средства за хигиена и чистење, прозиводи за домот и др.  Дополнително, електронската продавница им овозможува на членовите на Мој Тинекс програмата за лојалност да собираат и користат поени и при секое онлајн пазарење, преку поврзување на нивната поен+ картичка со корисничкиот профил.

Засега, доставата на производи ќе се врши само на територија на Скопје, но од компанијата Тинекс најавуваат дека постои можност за проширување на дистрибутивната мрежа во иднина, во зависност од побарувачката и интересот на нивните купувачи од останатите градови.

Со отворањето на електронската продавница, Тинекс ја заокружи успешната година во која оствари повеќе значајни достигнувања и проекти како отворањето на сопствен логистички центар во индустриската зона Чојлија, започнувањето на Мој Тинекс клуб програмата за лојалност и отворањето на новиот трговски центар Лиса во населба Ново Лисиче.

“Нашата компанија постои веќе 24 години и е фокусирана кон континуирано унапредување на своето работење, со цел оддржување и зајакнување на односите со своите потрошувачи. Да се задржи лидерската позиција сите овие години за нас претставува предизвик, но и мотивација, која не поттикнува постојано да превземаме нови чекори со кои ќе одговориме на потребите на пазарот и ќе го осигураме своето место на врвот. Свеста на потрошувачите за електронското пазарење во нашата земја е во подем и сметаме дека со нашата електронска продавница ќе може да допринесеме кон развој и приближување на нашиот пазар кон светските трендови во малопродажбата. Преку отворањето на наша електронска продавница направивме уште еден чекор напред кон модернизирање на купувачките навики во Македонија.“- изјави Цветанка Христовска, бренд директор на Тинекс.

Пратениците на унгарската опозиција избркани од државната телевизија

Припадниците на обезбедувањето исфрлиле двајца независни пратеници од зградата на унгарската државна телевизија откако се обиделе да прочитаат петиција.

Тие петицијата се обиделе да ја прочитаат ден откако полицијата употребила солзавец на демонстрантите во Будимпешта, пишува „РСЕ“.

Двајцата пратеници биле меѓу десетината членови на парламентот кои ноќта ја поминале во зградата на телевизијата во рамките на демонстрациите против политиката на премиерот Виктор Орбан.

Во петицијата се наведени барањата за вчерашниот протест, меѓу кои и повикот за повлекување на новиот закон за работа, независност на јавните медиуми и судови и приклучување на Унгарија на канцеларијата за обвинителство на ЕУ.

На интернет се емитирани снимките на кои припадниците на обезбедувањето ги туркаат двајцата пратеници и ги истиснуваат надвор од зградата. Останатите пратеници го продолжуваат протестот во зградата на телевизијата.

Во недела околу 10.000 демонстранти учествуваа во протестот под името „Среќен Божиќ, господине премиере“. Тоа беше четврт и досега најголем собир во последните седум дена против, како што изјавуваат демонстрантите, се поизразената авторитативна власт на Орбан.

Протестниот марш помина мирно се додека полицијата не употреби солзавец пред зграда на телевизијата.

Гутереш: Преспанскиот договор е пример за мирно решавање спорови

Договорот од Преспа меѓу Грција и Македонија е пример за мирно решавање на транснационалните спорови, истакна генералниот секретар на ОН Антонио Гутереш во обраќањето на 18. Меѓународен форум во Доха.

-Договорот меѓу Атина и Скопје е успешен пример за транснационалните напори за затворање на спорни прашања. Договорот ќе има биде од корист за целиот балкански регион, рече Гутереш.

Тој повика на засилување на напорите на меѓународната заедница за решавање и на другите отворени прашања во светот кои предизвикуваат тензии.

– Во ера на хаос и конфузија гледаме голема надеж за успешно решавање на разликите и споровите како што беа меѓу Грција и Македонија за прашањето за името. Тоа не потсетува и ни покажува дека кога работиме заедно можеме да постигнеме големи работи во корист на нашите народи, порача генералниот секретра на ОН, Антонио Гутереш.

притисни ентер