Атанасовски не може да се сети каде бил на 27ми април

Упадот во Собранието беше командуван директно од седиштето на ВМРО-ДПМНЕ.

Ова го тврди Александар Василевски-Нинџа во неговото сведочење за случувањата на 27ми април. Според него,  дека  протестите за „Заедничка Македонија“ имале само фиктивни водачи контролирани од ВМРО-ДПМНЕ.

Попладнево сведочеше и поранешниот прв човек на тајната полиција Владимир Атанасовски.

Колегата Михајло Видимлиски е во Кривичниот суд.

Ванхојте: Обвинителите да се остават да ја вршат својата работа за случајот „Рекет"

Белгискиот експерт Питер Ванхојте, кој беше ангажиран во процесот на преговори за Договорот од Пржино, излезе со реакција за случајот на Јавното обвинителство „Рекет".

Тој на својот Фејсбук профил напиша дека што и да се случило во Канцеларијата на специјалниот јавен обвинител, важно е да се запрат сите шпекулации и да им се дозволи на обвинителите да ја вршат својата работа.

Ванхојте повикува дека доколку се утврди дека имало злоупотреба на моќта, луѓето што биле вмешани во тоа, треба да се осудат, но најпрвин да се запрат шпекулациите.

– Анализирајќи го она што се случува, моето прво прашање е: зошто ова наеднаш излегува на површината? Кој стои зад тоа? Дали Катица Јанева допре до некои луѓе кои веруваа дека се недопирливи и се над законот? Како одговор на ова „во чиј интерес е ова да се случува", можев да обезбедам долга листа имиња, но тоа нема да и помогне на земјата да тргне напред, напиша Ванхојте на Фејсбук.

Оценува дека една работа е јасна, а тоа е дека политичарите повторно ја збркаа работата и наместо да гарантираат непристрасно и независно судство, политичарите од сите партии продолжија со нивните лични борби и заборавија, како што рече, на правилната имплентација на основните демократски принципи, како што е поделба на моќта и потребата од независно судство.

– Тоа докажува дека има уште многу пат да се изоди. Можам само да се надевам дека граѓанското општество повторно ќе се разбуди и ќе бара да бидат почитувани демократските вредности, дури и од страна на политичарите. И најпосле, што и да се случи, истрагите со прислушуваните разговори мора да продолжат. Тоа е товар од минатото, но никој не треба да заборави што се случи, и оние кои беа вклучени во тоа, вклучувајќи го и Груевски, се соодветно судени и на крајот и осудени.

-И ЕУ и Орбан треба да бидат свесни дека никој не може да даде азил на ваква личност, и во исто време да бара од Македонија да го почитува владеењето на правото. Затоа и ова треба да се исправи!, напиша Ванхојте на Фејсбук. 

Премиерот Заев ќе предложи разрешување на поголем број функционери

Премиерот Зоран Заев денеска на Владата ќе и предложи разрешување на досегашни директори, заменици, раководители на институции и членови на управни одбори, а ќе достави и предлози за пополнување на местата кои ќе бидат испразнети по разрешувањето.

– Од денеска ќе почне постапка на именување на новите носители на државни функции, дел преку надзорни одбори, дел преку ресорни министри кои имаат можност да одлучуваат за таквите постапки. Секако за тие постапки постојат законски процедури. Ова се одлуки кои јас ќе ги доставам до Владата и до управувачките органи или носителите на одлуки, рече на денешната прес-конференција премиерот Заев, соопштувајќи ги притоа имињата на оние кои ќе бидат разрешени согласно оваа одлука.

Во разрешените, меѓу другите се директорот на ЈП „Македонија Пат" Гајур Кадриу, на „Здравствен дом" Скопје Злате Мемедовиќ, директорот и претседател на УО на МЕПСО Сашо Василевски, економскиот директор на УК за гинекологија и акушерство Ваљон Бела, ВД директорот на Агенција за лекови и медицински средства МАЛМЕД Ќахил Ибраими, директорката на Клиниката за детски болести Катерина Ставриќ, на Драмски Театар Скопје Викторија Арангелова Петровска, претседателот на УО и директор на ЕЛЕМ Драган Миновски и директорот на Железници Ирфан Асани.

Прв Центар за медијација за промоција на придобивките од договорното решавање на споровите

Затоа што страните што доаѓаат во постапка на медијација однапред имаат предзнаење, а тоа е вештина на медијаторот, дека всусшност треба да дојдат да се договорат врз база на интересот. 

Во склоп на Сојузот на стопански комори (ССК) почнува да работи првиот Центар за медијација чија цел е преку предавања и обуки да ги запознае, пред сè, бизнисмените за предностите од решавање на споровите на мирен и ефикасен начин наместо во судски постапки кои се поскапи и подолготрајни.

Центарот го отвора Комората на медијатори која е формирана пред две години. Нејзиниот претседател Славе Младеновски на прес-конференција рече дека центарот ќе функционира по меѓународни стандарди и по примерот на вакви места во Европа и светот. Тој рече дека во наредниот период ќе се фокусираат на популаризација и промоција на медијацијата во интерес на граѓаните и правните субјекти. Целта е, пред сѐ, бизнис-секторот да може да се обрати во Комората и својот спор да го реши во постапка на медијација и таа да биде објаснета како постапка и кои се нејзините бенефити.

Младеновски ги повика бизнисмените да покажат интерес споровите да ги решаваат преку медијација. Постапката во суд, според него, за кој било спор не трае помалку од една година, а најчесто и многу повеќе. Со медијацијата, пак, законски услов е постапката да заврши 60 дена, а според досегашните искуства, рече Младеновски, предметите што се решават со медијација ги завршуваат и до пет дена.

– Затоа што страните што доаѓаат во постапка на медијација однапред имаат предзнаење, а тоа е вештина на медијаторот, дека всусшност треба да дојдат да се договорат врз база на интересот. Таквиот пристап им овозможува на страните да си го дефинираат интересот и во неколку разговори таа постапка  завршува на заемно задоволство. Она што го прави медијаторот, всушност, е што им помага да ја потпишат спогодбата на која се согласиле двете страни и потоа евентуално да ја заверат на нотар, додаде Младеновски.

Според нивни пресметки, соодносот на заштедените време и трошоци  помеѓу медијација и судски спор е еден спрема десет.

Законот за медијација е донесен во 2006 година и до 2016 во постапка на медијација поминале околу 100 предмети. Нивниот број е значително зголемен во изминатите две години со формирањето на Комората на медијатори и сега, според нивната евиденција, има околу две илјади предмети. Тие очекуваат дека со формирањето на центарот сè повеќе ќе се користат услугите на медијаторите, а  ќе бидат растоварени и судовите.

Потпретседателот на ССК Александар Милошевски соопшти дека повеќе од 20 000 деловни субјекти кои членуваат во Сојузот ќе бидат запознати со придобивките на медијацијата во центарот што се отовра во рамки на ССК.

Тој посочи дека кај стопанските спорови медијацијата е законски задолжителна ако паричното побарување не надминува 1.000.000 денари, односно странките во тој случај се должни пред поднесување на тужбата на суд да се обидат спорот да го решат по пат на медијација.

Серија предавања што ќе бидат организирани во првиот Центар за медијација во ССК ќе ги водат  лиценцирани медијатори и универзитетски професори. Програмата со предавања ќе им биде пратена на сите членки на ССК и ќе биде објавена на неговата веб-страница. Комората на медијатори и ССК најавија вакви центри и во други градови во земјава.

притисни ентер