Македонија

СДСМ: Мицкоски не ги виде црнилата кои 11 години ја уништуваа Македонија поради бизнис со хидроцентрали

Граѓаните вечерва видоа уште едно бледо и конфузно издание на Христијан Мицкоски, очаен во обидите да го одбрани криминалот на Никола Груевски, реагираат од СДСМ на обраќањето на претседателот на ВМРО- ДПМНЕ, Христијан Мицкоски.

Нема Мицкоски ниту една идеја, нема ниту еден предлог, нема план, програма, не може да понуди ништо кое би имало значење за подобар живот на граѓаните, за интересите на државата.

Фокусот на Мицкоски повторно е на судството и на обвинителите. Тоа потврдува дека единствената агенда, единственото нешто за коешто се грижи Мицкоски е одбрана на криминалот на криминалната ВМРО-ДПМНЕ и Никола Груевски.

На раб на очај се обидите на Мицкоски да го покрие своето учество во криминалните шеми и криминалното владеење на режимот на Никола Груевски.

Граѓаните многу добро знаат Мицкоски не бил дел од кабинетот на некој „поранешен премиер“ туку бил дел од кабинетот на Никола Груевски, носителот на режимот, на криминалот и сите црнила што 11 години и се случија на Македонија.

Токму Мицкоски бил лева рака на Груевски и во партијата, во криминалната ВМРО-ДПМНЕ бил генерален секретар.

Цела децинија Мицкоски молчеше за црнила кои 11 години ја уништуваа Македонија, ги осиромашија граѓаните а од земјава направија заробена држава. Тогаш бизнисот со хидроцентрали што му го додели токму Никола Груевски беше доволно светло за Мицкоски.

Македонија излезе од црнилата на ВМРО-ДПМНЕ и сега оди напред.

Македонија и нејзините граѓани чекорат кон светла иднина, кон ЕУ и НАТО, Мицкоски и врвот на ВМРО-ДПМНЕ остануваат сами во црнилата, остануваат сами во одбраната на криминалите.

Формула

Строл над сите во единствениот тренинг во Кина

Ленс Строл се најде на врвот на табелата на крајот на единствениот слободен тренинг пред Големата награда на Кина, која се враќа во календарот на Формула 1 по петгодишно отсуство.

Канадскиот возач на Астон Мартин извозе 1:36.302 во својот последен летечки круг за време на единствениот тренинг час во Шангај. Така тој го победи Оскар Пјастри од Мекларен за 0,327 секунди, а првата тројка ја заокружи светскиот шампион Макс Верстапен, кој заостануваше 0,358 зад Строл. Сите тројца ги постигнаа своите најдобри кругови во нивните квалификациски симулации со меките гуми.

Серхио Перез остана четврти, само 0,030 зад својот тимски колега од Ред Бул. Мексиканецот го постигна својот најдобар резултат во вториот брз круг на меките пневматици, откако направи грешка при застанувањето за свиокот 6 во неговиот прв.

Возачите на Хаас, Нико Хулкенберг и Кевин Магнусен ја завршија сесијата на петтото и шестото место, а Естебан Окон, Алекс Албон, Даниел Рикиардо и Валтери Ботас ги заокружуваат првите 10.

Локалниот миленик Гуанју Џоу, кој се натпреваруваше пред својата публика за прв пат овој викенд, заврши на 11-тото место на единствениот тренинг. /МИА

Фудбал

Алонсо со критики кон тимот и покрај крајниот успех против Вест Хем

Тренерот на Баер Леверкузен, Чаби Алонсо, изрази незадоволство по реваншот од четвртфиналето на Лигата на Европа помеѓу Германците и екипата на Вест Хем.

Натпреварот заврши нерешено 1:1, што значи дека „аспирините“ одат напред кон фајналфор.

-Се подготвувавме за опција во која Вест Хем ќе не притисне многу силно. Не ни беше многу удобно да играме во нашата формација. Да бидам искрен, во првото полувреме противниците беа подобри и се чувствувавме надвор од место. Многу е важно што не примивме втор гол бидејќи тие дефинитивно одиграа подобро од нас. За среќа, по паузата ги свртевме работите. И мило ми е што продолживме понатаму. Секогаш има тешки моменти во Лига Европа, изјави Алонсо.

Во полуфиналето, фудбалерите на Баер ќе се соочат со Рома во повторување на минатогодишната битка во оваа фаза од турнирот. Тогаш „Римјаните“ излегоа како победници. Натпреварите сега се на 2 и 9 мај - првиот се игра во Рим, а реваншот во Леверкузен. /МИА

Фудбал

Де Роси за дуелот со Алонсо во ЛЕ: Го почитувам уште од кога беше играч

Тренерот на Рома, Даниеле де Роси, ја прокоментира големата победа на тимот со 2:1 против екипата на Милан, со која и официјално „римските волци“ се пласираа во полуфиналето на Лига Европа.

Менаџерот, кој неодамна го презеде првиот тим, продолжува да прави чуда, а синоќа ги пофали своите играчи за нивниот напредок.

-За да го победиме овој Милан ни требаа вештини. Кога останавме со 10 фудбалери, моравме да играме со интензитет, но со интелигенција и тактичко знаење. Само трчање не е доволно. Многу сум горд што тренирам таков тим. Не беше лесно бидејќи Милан е многу силен тим кој игра добар фудбал. Завчера видовме дека дури ни Реал Мадрид не беше активен и се бранеше, ние истото го направивме, кога беше вистинскиот момент за тоа, изјави Де Роси.

Римјаните во полуфиналната фаза ќе играат против екипата на Баер Леверкузен во реприза на пресметката од истата фаза на турнирот од минатата кампања, кога „волците“ стигнаа до успехот.

-Можеби сакаат да се одмаздат за минатата година кога ги победивме. Ќе видиме што ќе се случи, но очигледно не не сметаат за фаворити. Можеби некој го чекаше Милан во полуфиналето од Лига Европа. Имам голема почит кон Чаби Алонсо уште од кога беше играч, додаде Де Роси.