Младеновски: УБК беше организатор на упадот во собранието

УБК била директно инволвирана во организацијата на насилниот упад во Собранието на 27-ми април, открија обвинетите браќа Младеновски во нивното сведочење. 

Тие посочија дека главна врска меѓу групата маскирани лица предводени од Александар Василевски – Нинџа и тајната полиција бил агентот Никола Бошковски, кој подоцна заедно со началникот Горан Грујевски пребега во Грција.

Стефан Младеновски кажа дека вечерта откако излегол од Собранието се упатил кон Жена Парк кај споменикот на Прометеј. Таму веќе биле Нинџа, Кољо а по кратко време и и сите останати кои пред упадот се собрале во еден од рестораните на Кејот на Вардар.

„Во еден момент се слушна дека групи на Албанци се собираат и се спремаат да дојдат кон Собранието. По тоа Нинџа отиде да се види со Никола Бошковски – Прскач кој како што разбрав е дојден со некое возило кај градска болница. Потоа разбрав дека во тоа возило имало оружје автоматско, полуавтоматасо и оружје. Кога го прашав Нинџа што ќе се случи ако дојдат Албанци кажа дека и тука има луѓе кои знаат да пукаат. Но од тоа ништо не се случи“ – вака сведочеше Стефан Младеновски.

Тој откри дека вечерта кај споменикот на Прометеј бил присутен и уште еден агент на УБК Дејан Димковски – Боксер кој ги убедувал дека нема потреба да се грижат бидејќи ги искршил сите камери во Собранието.

Истото тоа лице ни кажа дека околу 22 часот претседателот Иванов ќе има обраќање и ќе прогласи воена состојба, дека воена полиција веќе е поставена на патарините кај Гостивар и Тетово и кај Корупчино, но од тоа не се случи ништо. Иванов излезе и повика на мир и наредниот ден ги повика двете партии на лидерска. Дејан Димковски – Боксер кажа дека таа информација ја добил од некое лице Синиша кое работи кај претседателот Иванов – раскажа Стефан Младеновски.

Сведочењето на неговиот брат, Михаил Младеновски пак фрли ново светло за физичките напади на јавни личности за време на протестите. Тој рече дека поранешниот директор на УБК Владимир Атансовски му кажал на Нинџа да следи за него интересни лица, што ги нарекувал државни непријатели, а биле следени и обвинители од СЈО.

„За време на протестите пред ДИК требаше возилата на Петре Шилегов и Љубомир Фрчкоски да се дигнат во воздух. За време на протестите ‘За заедничка Македонија’ физички беа напаѓани и навредувани новинари и други луѓе кои учествуваат во јавниот живот на Република Македонија. Овие дејствија беа организирани од Нинџа, по насока од Владимир Атанасовски, тогашниот директор на УБК” ... раскажа Михаил Младеновски.

Двајцата браќа раскажаа и дека Нинџа и ексдиректорот на УБК често се среќавале по изборите во декември 2016та, кога се планирал упад со молотови коктели во ДИК, но не се случил затоа што расправата по приговорите на ВМРО ДПМНЕ се одложила.

Сведочењето на Стефан Младеновски беше оценето како храбро иако задоцнето од обвинетиот Горан Ангелов. Според него со ова се докажало дека упадот бил организиран од УБК , а патриотските здруженија биле искористени. Задоволство од исказите имаше и кај водачите на иницијативата “За заедничка Македонија”.

ЕУ подготвува мерки против Турција и Кина

Министрите за надворешни работи на ЕУ се согласија да одговорат на координиран начин на контроверзниот закон за национална безбедност наметнат од Кина на Хонг Конг, но исто така разгледуваат и мерки против Турција.

Високиот претставник на ЕУ за надворешни работи и безбедносна политика Јосеп Борел, исто така, се закани со акција против Турција, која го раздвојува европскиот блок по низа прашања, од човековите права до оф-шор дупчењето гас кај Кипар и трансформацијата на скапоцениот споменик Аја Софија од музеј во џамија.

„Денес се договоривме да развиеме координиран европски одговор за да покажеме поддршка за автономијата и граѓанското општество на Хонг Конг“, рече европскиот министер за надворешни работи по првата физичка средба на министрите по неколку месеци.

„Ова ќе се состои од мерки на ниво на Европската унија, но и од оние што се во надлежност на земјите-членки“, рече тој за кинескиот закон за Хонг Конг, кој стапи во сила минатиот месец.

Можните нови мерки може да вклучуваат поголема контрола на извозот на „специфични и чувствителни“ технологии до Хонг Конг, откри Борел, како и можност за визи за граѓаните во Хонг Конг и стипендии за студентите од автономниот регион.

Германскиот министер за надворешни работи Хајко Маас истакна дека одлуката на Кина за новиот закон „треба да има влијание“ врз европскиот извоз на оружје.

Тој истакна дека германско-францускиот предлог за нови мерки вклучувал и поедноставен визен режим за уметници, научници, истражувачи и новинари од Хонг Конг, кои се изложени на ризик заради нивната работа.

Актот за национална безбедност е донесен кон крајот на јуни и е насочен против сепаратизмот, субверзијата, тероризмот и дослух со странски сили на територијата на Хонг Конг.

Властите во автономниот регион сега можат да ги следат и прислушуваат луѓето за кои постои сомневање дека ја загрозуваат националната безбедност, а законот предвидува доживотен затвор за субверзивни активности.

Друго големо прашање на агендата е односот меѓу Европската унија и Турција.

Во врска со дупчењето за експлоатација на гас од страна на Турција во водите во близина на Кипар, Борел рече дека Унијата може да преземе нови активности доколку операцијата продолжи.

„Ние ќе подготвиме опции за воведување соодветни мерки како одговор на предизвиците од Турција“, рече тој.

Турција осуди четворица активисти од невладини организации за човекови права Амнести Интернешнл на неколку години затвор, сметајќи ги за виновни за тероризам, како што предупреди министерот за надворешни работи на Луксембург, Жан Аселборн, на состанокот.

По состанокот, Борел рече дека ЕУ исто така ќе одговори на новите прекршувања на ембаргото за вооружување на Либија.

„Имаме намера да ги зајакнеме санкциите против режимот со цел да придонесеме за подобро спроведување на резолуциите на Советот за безбедност на ООН“, рече тој.

Откажан е Егзит 2020 поради состојбата со коронавирусот

На официјалната Фејсбук страница на фестивалот „Егзит“е објавено дека нема да се одржи оваа година.

„Бидејќи здравствената состојба во нашата земја не се подобри од нашето последно обраќање, а имајќи предвид дека здравјето и безбедноста на сите учесници на фестивалот се наш приоритет број еден, ве информираме дека прославата на 20 години од Егзит фестивалот дефинитивно нема да се одвива од 13 до 16. август годинава на тврдината Петроварадин “, пишуваат организаторите.

Тие понатаму објаснија дека ќе ги објават датумите за фестивалот за 2021 година до крајот на месецот.

„Новото менување на датумот на фестивалот е обемен и сеопфатен процес, за кој е потребно време, затоа ве молиме да бидете трпеливи. Датумите за Егзит 2021 ќе ги објавиме до крајот на месецот, а известување за апликациите и опциите за наплата ќе пристигнат наскоро. Да се грижиме едни за други “, напишаа тие.

На прашањето на следбеник дали луѓето кои веќе купиле билети за оваа година ќе можат да добијат билети за следната година, одговорија потврдно.

„Така ќе биде. Повеќе информации наскоро“, одговориле тие.

Германија и Италија бараат итна примена на пакетот помош за економијата

И Рим и Берлин, сакаат брза и убедлива реакција од Европа за економските последици од кризата со корона, изјавија германската канцеларка Ангела Меркел и италијанскиот премиер Џузепе Конте по состанокот во близина на Берлин.

„Предизвикот е огромен и затоа одговорот мора да биде со иста мерка“, рече германската канцеларка Ангела Меркел по средбата со италијанскиот премиер Џузепе Конте на замокот Месберг во близина на Берлин.

Таа предупреди за обиди за намалување на фондот за борба против економските последици од кризата со корона.

„Она што е важно за овој фонд е тоа што е голем и останува голем“, рече Меркел за фондот од вкупно 750 милијарди евра, заклучувајќи дека задача на Европа е да ја надмине оваа криза преку солидарност.

Таа изрази оптимизам дека ќе се постигне договор за фондот и покрај отпорот на т.н. квартет, Австрија, Холандија, Шведска и Данска, кои се против најголемиот дел од фондот да се плати во форма на грантови, и само помал дел во форма на заеми.

„Освен Германија и Италија, има уште 25 шефови на држави и влади и затоа треба да градиме мостови во сите правци“, рече Меркел и додаде дека „патот до целта е сè уште долг“.

„Позициите засега се далеку. Не можам да кажам со сигурност дали ќе постигнеме договор во петок или сабота“, рече Меркел.

Италијанскиот премиер инсистира на договор и спроведување на фондот за помош што е можно поскоро.

„Мораме да дејствуваме брзо, да реагираме брзо, затоа што историјата не учи дека дури и најдобрата реакција не е добра ако пристигне премногу бавно“, рече Конте.

Тој е убеден дека заедничкиот пазар на Европската унија ќе биде „уништен што е можно поскоро“, без одлучувачка реакција на последиците од кризата врз економијата. Тоа ќе резултира, рече тој, со „поделба на Европската унија“.

„Координираниот и силен одговор на Европа е многу важен против оваа епохална криза“, рече Конте.

И Меркел и Конте ја пофалија иницијативата на претседателот на Советот на Европската унија, Чарлс Мишел, што треба да доведе до компромис.

„Германија, како и Италија, е заинтересирана да работи на заедничкиот пазар“, рече германската канцеларка.

Со околу 35.000 смртни случаи предизвикани од коронавирусот, Италија се соочува со сериозни економски последици од пандемијата.

Италија би можела да добие 36 милијарди евра меки заеми за да и помогне на нејзината економија, за која се очекува годинава да падне за 10 проценти.

Лидерите на ЕУ ќе се состанат во Брисел во петок и сабота на разговори околу планот на Европската комисија за пакетот помош од 750 милијарди евра, при што 500 милијарди евра ќе бидат распределени на членките и 250 милијарди евра преку заеми.

Пред самитот на европските лидери на крајот на неделава, Меркел утре ќе му биде домаќин на шпанскиот премиер Педро Санчез во нејзината канцеларија во Берлин.

притисни ентер