На овој настан, премиерот Заев го придружуваше неговата сопруга Зорица, која во името на семејството Заеви, на претставниците на организацијата „Тризомија 21“, која го организира фестивалот, им предаде донација во финансиски средства за поддршка на оваа манифестација.

Во своето обраќање претседателот на Владата на Република Македонија, Зоран Заев истакна:

„Денеска гледајќи ги насмеаните лица, знам дека во изминативе три дена се исполнети душите со позитивна енергија и дека сите уживаат во уметноста којашто ја споделија овие деца, сами меѓу себе и со сите нас и би рекол, вистински актеришта.

Пет – годишната традиција на „Игри без маска, театар без дискриминација“ воопшто не е мал јубилеј и секако е повод истиот да се слави, особено имајќи го предвид фактот дека овој меѓународен фестивал е единствен на Балканот од ваков вид.

По примерот на ваквите фестивали, чија крајна цел е вклучување на лицата со попреченост во сите културни настани, политиката на Владата е пред се, создавање на општество кое повеќе нема да ги стигматизира лицата со каква било попреченост.

Да создадеме општество коешто во себе ќе ги вклучи сите без разлика на нивниот физички изглед или ниво на ментален развој.

Она што започнавме да го правиме за лицата со каква било попреченост уште минатата година, секако не запре годинава. И ве уверувам дека со засилен интензитет ќе продолжиме да го правиме и понатаму.

Лани започнавме со многу законски решенија во делот на законот за социјална заштита, односно овозможивме низа олеснувања за исполнување на правата на лицата со попреченост. На пример родителите можат да работат со скратено работно време и по 26-тата година на своето дете со попреченост, а правото на посебен додаток по навршување на 26-тата година, по автоматизам преминува во право на помош и нега од друго лице.

Секако Националната стратегија 2018-2027 наречена „Тимјаник“ е одлична можност да ги адресираме правците на вистинска грижа и социјализација на нашите сограѓани.

Во насока на проширување на мрежата на постоечки услуги и алтернативни форми на грижа и заштита на овие ранливи категории на граѓани се отворени неколку нови дневни центри и тоа: за деца со церебрална парализа во Прилеп и Скопје, за деца со попреченост во Велес, Кочани и во Македонска Каменица. Отворен е и центар за продолжен престој на деца со попреченост во Куманово, а во завршна фаза е отворањето на центар за престој и рехабилитација на деца со даунов синдром во Скопје.

Како поддршка на биолошките семејства кои имаат деца со попреченост, ги зголемивме вкупните износи за поддршка и посебен додаток и уште многу други привилегии, но не би сакал денеска навистина на овој прекрасен настан да ги кажувам сите овие новини кои се случуваат во поддршка на лицата со посебни потреби. Денеска сме овде да дадеме поддршка токму на нашите сограѓани, лицата со посебни потреби за да можат да се чувствуваат еднакви да може да се чувствуваат рамноправни и да можат сите заедно еднакво да му се радуваат на животот.

Сметајте на поддршката и понатаму од Владата на Република Македонија за сите овие инклузивни активности коишто ги организирате. И во името на Владата, Ви благодарам на сите и на организаторите и на училиштата коишто заедно создавате нешто коешто ја прави Македонија, поубаво место за живеење за сите.“

На крајот на обраќањето на претседателот на Владата на Република Македонија, Зоран Заев, претставник на здружението „Тризомија 21“, на премиерот Зоран Заев, му подари маска во рамка, во знак на благодарност за поддршката.