ОЈО почна предистражна постапка за претседателот Иванов

Претседателот Иванов се најде под опсервација на скопските обвинители.

Проверуваат - дали има основи за кривична одговорност во неговите одлуки да не ги потпише указите за Законот за јазиците и за Договорот од Преспа, и покрај тоа што тие два пати беа изгласани во Собранието.

Од обвинителството не откриваат за кое кривично дело има сомнеж, освен дека станува збор за предистражна постапка во која ќе се проверуваат наводи од две анонимни кривични пријави.

„Постапувајќи по две анонимни кривични пријави во врска со непотпишувањето на Законот за јазиците и Договорот од Преспа, Основното јавно обвинителство Скопје постапува во предистражна постапка, во насока на проверка на наводите во пријавите. Со таа цел веќе се побарани податоци и информации од Собранието на Република Македонија и од Кабинетот на Претседателот на Република Македонија за тоа кога се донесени одлуките во законодавниот дом, односно дали и од кои причини не се потпишани од страна на Претседателот“, изјавија од Скопското обвинителство.

Според членот 75 од Уставот, Претседателот е должен да ги потпише указите, доколку законите се по втор пат изгласани во Собранието, но во кој рок децидно не е предвидено.

Оваа правна празнина толкувајќи ја како право за т.н. џебно вето неколку пати е користена од претседателите, но Иванов е првиот што јавно соопшти дека нема да ги потпише двата закони – и за јазиците и за договорот со Грција, со што самиот призна дека нема намера да ја почитува уставната одредба.

Според членот 87 од Уставот, Претседателот е одговорен за кршење на Уставот и законите во вршењето на своите права и должности.. Но клучната дилема е дали може кривично да одговора, со оглед дека ужива имунитет кој може да му го симне единствено Уставниот суд, и тоа со двотретинско мнозинство..

Според Уставот, постапка за утврдување на одговорност на претседателот или т.н. импичент, покренува Собранието со двотретинско мнозинство, а за одговорноста одлучува Уставниот суд, исто така со двотретинско мнозинство..  Ако Уставниот суд утврди одговорност на претседателот на Републиката, функцијата му престанува по сила на Уставот, стои во членот 87.

Во Белорусија се одржуваат парламентарни избори

Во Белорусија денес се одржуваат парламентарни избори, на кои 516 кандидати се борат за 110 места во долниот дом на парламентот.

Изборите ќе бидат набљудувани од Западот за да се види колку слобода претседателот Александар Лукашенко ќе им овозможи на опозиционите кандидати, пренесува „Ројтерс“.

Националната изборна комисија соопштила дека до сега гласале повеќе од една третина од бирачите, односно 36 проценти, а „АП“ наведува дека постои опасност од манипулација на резултатите.

Опозицијата тврди дека гласањето е преполно со злоупотреби затоа што гласачките кутии не се чуваат, а пребројувањето на гласови се врши без присуство на набљудивачи.

По парламентарните, Белорусија наредната година ја очекуваат и претседателски избори.

Снегот во Франција и понатака прави проблеми

Околу 145.000 луѓе вчера биле без струја на југоистокот од Франција поради обилните врнежи од снег, соопштија од компанијата која управува со дистрибутивната мрежа.

Со прекин на струја се соочиле областите Дром, Изере, Рон, Лоар и Ардеш, се вели во соопштението и се додава дека техничките тимови работат на санација на проблемот.

Како што се наведува, невреме во четврток вечерта ја погоди источна и централна Франција и во еден период повеќе од 330.000 домови биле без електрична енергија.

Се намалува бројот на подржувачи за независна Каталонија

Самостојност на Каталонија подржуваат 41,9 проценти од жителите на таа шпанска покраина, а се противат 48,8 проценти.

Тоа го покажува анкетата на каталонската јавна институција за истражување на јавното мислење „ЦЕО“.

Анкетата била спроведена од 16 септември до 7 октомври, пред донесувањето пресуда за каталонските сепаратисти, а испитаниците одговарале на прашањето„Сакате ли Каталонија да биде самостојна држава?“

Анкетата покажала дека опаѓа бројот на оние кои бараат отцепување од Шпанија, имајќи во предвид дека пред референдумот во 2017 година за независност биле 48,7 проценти од испитаниците.

притисни ентер