Реформаторот Петар Богојески доцна синоќа е разрешен од партиската функција земеник генерален секретар на ВМРО-ДПМНЕ со одлука на Извршниот комитет. Од партијата тврдат дека разрешувањето е резултат на непрофесионално работење, за Богојески пак причината се разликите меѓу партиските и концептите кои ги подржува реформското крило на ВМРО-ДПМНЕ.

Едноставно непомирливи се нашите два концепти, едниот за демократизација, модернизација и европеизација, а другиот за клиентелизација, криминализација и авторитарен кариеризам во ВМРО ДПМНЕ и невозможно е двата да функционираат заедно, наведува Богојески на својот фејбук профил по неговото разрешување.

,,ВМРО ДПМНЕ во овој момент е целосно на погрешна страна од историјата, тргна во целосно погрешен правец и не е можно заедно на истиот воз во истиот правец. Се надевам за кратко ќе биде тоа констатирано и ќе биде земен друг тек.Ќе повторам, го поразивме Груевски, но не и груевизмот во нас. Се плашам дека тие политики одат во корист на плановите за поширока политичка и безбедносна дестабилизација на регионалната стабилност, што ќе резултира со загрозување на македонската државност, што за мене е без простор за било каков компромис. Мојата максима беше и останува “Да изгубиме сите, а да добие Македонија!” . Република Македонија ќе биде членка на НАТО и ЕУ, со или без овие политички елити на македонската политичка сцена.

Богоески во неделата го оствари правото на глас и гласше на референдумот и отворено го повикуваше членството на ВМРО-ДПМНЕ да излезат на галасање наспроти официјалниот став на партијата за постапување по сопствено убедување. Од опозицијата не одговорија дали е можно судбината на Богојески да ја доживеат и останатите членови на ИК кои се изјаснија на референдумот или не ги делат истите ставови со раководството на партијата. Неофицијално се споменуваат имињата на реформаторот Коста Богданов кој пред синоќешниот Извршен комитет рече дека според него најдобро е пратениците да ја преземат својата одговорност и процесот со уставните измени да се заврши во собрание, како и еден од потпретседателите на апртијата и актуелен градоначалник Митко Јанчев.

Богданов засега останува дел од ИК на партијата, но во телефонски разговор за Канал 5 вели оти не ја исклучува можноста за поднесување оставка, а тоа ќе зависи од следните чекори кои ќе ги преземе партијата. Јанчев пак вели информација за неговоро разрешување до досега не пристигнала до него, најавувајќи го своето присуство на вечерашниот состанок. Евентуалните разрешувања би можеле да се случат вечерва за кога е закажана седница на Централниот комитет кој е задолжен за смена на членови во партиските тела.