Амбасадорот Џес Бејли отвори Центар за млади во Гостивар

Амбасадорот на САД во Македонија Џес Бејли предаде во употреба Центар за млади и заедницата (Youth and Community Centеr) во Гостивар и порача дека од денес младите гостиварци ќе имаат место во кое ќе ги унапредуваат меѓусебните односи.

На пригодната свеченост по повод отварањето беа претставени дел од активностите кои почнаа да се спроведуваат во овој центар. Амбасадорот Бејли ја истакна мултикултурата на Гостивар како предност и порача таа да се негува.

- Отворањето дојде многу побрзо отколку што сите ние се надевавме. Тоа е и затоа што имаше одлична соработка со Општината Гостивар, со градоначалникот, со бизнис-секторот и многу други кои ја обезбедија својата поддршка и овозможија целата заедница да се спои. Овој проект се занимава со потребите коишто веќе ги слушнавме, потребите на младината. Ова е место каде што луѓето се среќаваат и разговараат, лице в лице, а не онлајн, на мрежите. Затоа сметам дека ова е навистина моќна предност што ќе им помогне на младите луѓе да се разбираат меѓу себе, рече амбасадорот Бејли во обраќањето.

Новоотворениот Центар за млади има за цел да ѝ помага на младата популација во професионалниот и личен развој. Во него ќе се спроведуваат проекти за поддршка за градење кариера, претприемништво и разни креативни, културни настани и воннаставни активности за учениците. Функционирањето на ценатрот е финансиски поддржано од Амбасдата на САД во Македонија.

Амбасадорот Бејли при посетата на Гостивар имаше и едночасовна средба со градоначалникот Арбен Таравари. /MИА

Се одржа Меѓународниот натпревар за сирени во Шангај

Подводниот визуелен спектакл „Мермејд опен“ (Mermaid Open), познат и како Меѓународен натпревар за сирени во Шангај, Кина се одржа минатиот викенд. На него учествуваа стотина спортисти од Кина, Јужна Кореја и Казахстан.

Беа прикажани уметнички нуркачки вештини во неколку дисциплини, а натпреварувачките и натпреварувачите се оценувани во неколку категории.

Натпреварот се одржа во базен со 7.500 кубни метри вода и околу 50.000 риби во него, a двајца од јужна Кина се прогласени за шампиони - во женска и машка конкуренција, пишува „Шангај дејли“. Натпреварите со сирени станаа многу популарни во Кина последниве години, а за да го поттикне овој спорт, Океанскиот парк „Хајчанг“ во Шангај планира да организира серија настани и за претстојните празници во мај.

Видео: Атина „проголтана“ од сахарска прашина, градот обоен во портокалово

Атина и јужните делови на земјата вчера беа обвиени со сахарска прашина, со нијанси на жолта и портокалова боја што создава нереална атмосфера во градот.

Облаците од прашина, пренесени преку Средоземното море од северна Африка, го обвија акропол и другите знаменитости на Атина.. Силните јужни ветрови носеа прашина од Сахара, па во последните часови од денот грчката престолнина изгледаше како да е користен филтер за фотографирање, пренесува Euronews. Метеоролозите најавуваа дека небото ќе се расчисти денеска поради промената на правецот на ветерот, поради што ќе паднат и температурите.

Кулеба ги пофали американските политичари за одобрувањето на пакетот воена помош за Украина

Претставници на Пентагон најавија дека одредена муниција веќе е складирана во Европа, а се очекува меѓу приоритетите да бидат артилериската и противвоздушната одбрана.

Министерот за надворешни работи на Украина, Дмитро Кулеба со ентузијазам ги пофали американските политичари за одобрувањето на долго одложуваниот пакет воена помош од 61 милијарда долари за Украина, но предупреди дека новите испораки нема веднаш да го свртат бранот на војната.

„Алелуја“, изјави Кулеба во интервју за „Гардијан“ на прашањето за реакцијата на вчерашното конечно гласање на американскиот Сенат. Тој рече дека „неговото верување е дека ќе има позитивен исход“, но Западот мора „да сфати дека ерата на мирот во Европа е завршена“ и да ја изгради својата одбранбена индустрија.

Говорејќи за „Гардијам“, Кулеба рече дека се надева оти Белата куќа ќе го претстави новиот пакет оружје „за неколку дена, можеби и часови“ и дека е „само прашање на логистика“ залихите да се префрлат на фронтот.

Претставници на Пентагон најавија дека одредена муниција веќе е складирана во Европа, а се очекува меѓу приоритетите да бидат артилериската и противвоздушната одбрана.

Кулеба, исто така, рече дека Украина идентификувала седум системи за воздушна одбрана „Патриот“ кои би можела да ги користи за заштита на цивилите во поголемите градови надвор од Киев. Еден е добиен од Германија, уште четири се лоцирани и преговорите се во тек, рече Кулеба, а на повидок се уште два. /МИА

притисни ентер