Британскиот амбасадор во Приштина предупредува дека таквото сценарио може да предизвика воен конфликт и други преседани на Балканот.
Косовскиот претседател Тачи вели – нема да дозволиме нова Република Српска на Косово.
Темата прекројување на границите повеќе не е табу ниту во Косово, ниту во Србија, но и од двете страни на границата со подеднаква неизвесност се чека евентуалниот епилог. Очекувано, поголем дел од Србите би сакале северниот дел на Косово, со мнозинско српско население да стане дел од Србија. Албанците од овој крај, пак, стравуваат дека наскоро можат да се разбудат дома, но во друга држава, велат тие за Радио Слободна Европа.
-Само во Косово. Многу е тешко да го напуштиме селото. Тука сме од времето на нашите дедовци и прадедовци, вели жител на Општина Звечан за Радио Слободна Европа.
-Ситуацијата е конфузна. Населението е загрижено. Ризично е, вели жител на Општина Звечан за Радио Слободна Европа.
Во неизвесност се и Србите во Прешевската долина, во трите српски општини со мнозинско албанско население.
-Не се плашам. Ќе останам овде. Не зборувам од национални уверувања. Едноставно, јас сум Србин и тоа засекогаш ќе останам, жител на Прешево за Радио Слободна Европа
Меѓународната заедница и натаму се обидува да ја стиши идејата на косовскиот претседател Тачи за прекројување на границите. Британскиот амбасадор во Приштина за косовската телевизија Т7 вели дека тоа е опасно сценарио, кое може да предизвика домино ефект и во другите земји од Балканот.
– Границите се пишуваат со зборови, но се менуваат со куршуми, промената на границата меѓу Косово и Србија би предизвикала и други преседани на Балканот. Не ја гледам разликата меѓу корекција на границата, како што тоа го нарекува Тачи и размена на територии, изјави Руари О Конел, амбасадор на В.Британија во Косово
Денеска Тачи се обидува да ретерира. Мојата цел не е етничка поделба, ниту создавање на втора Република Српска на наша територија, туку воспоставување на 400 километри долгата граница со Србија, вели тој за весникот „Денес“, ден откако Меркел порача дека Германија не дозволува промена на границите на Балканот. Вучиќ вчера изјави дека Берлин со признавањето на Косово, веќе ги разграничил двете земји.
-Она што го кажа Меркел, ако смеам да преведам, за сите наши граѓани, кога рече дека е против разграничување, па таа веќе не имаше разграничено, на начин што цело Косово е одвоено од Србија и што е независна држава, изјави Александар Вучиќ, претседател на Србија.
Дали ќе се одврзе српско-косовскиот јазол и дали корекцијата на границите, за кои зборуваат Тачи и Вучиќ се реална опција, ќе биде појасно по нивната средба закажана во септември.