Од опозициската партија по синоќа одржаниот извршен комитет соопштија дека се несериозни обидите на власта да ја манипулира јавноста со измислени образложенија дека се барало амнестија за некаков криминал.
И опозицискиот лидер Мицкоски и премиерот Заев по лидерската средба вчера изјавија дека за дел од прашањата имало за дел немало согласност.
Амнестија - директна, индиректна, заобиколена, немам право ниту јас, ниту Мицкоски. Во држава, во која се бориме за најзначајната реформа во правосудството - владеење на правото и законот да важи еднакво за сите, ова е незамисливо. За вакви работи нормално дека не можеме да разговараме. Немаме право, немаме мандат!- изјави Заев.
Според неофицијални информации ВМРО-ДПМНЕ барале измени во кривичниот законик во делот на злоупотребата на службената положба и овластувања, околу кратење на рокот на застареност и висината на казните, што се толкува како индиректна амнестија и обид да се издејствува ослободување од гонење на поранешни функционери СЈО и ОЈО.
Од ВМРО-ДПМНЕ тврдат дека нивната принципиелна позиција е инсистирањето да се реализира веќе договорениот концепт за финансирање на партиите и формирање Пржинска влада пред секои избори.