Иванов: Договорот со Грција е штетен и нема да го потпишам

 Претседателот Ѓорге Иванов оцени дека договорот со Грција е штетен за Република Македонија, дека е лична одлука и одговорност на премиерот Зоран Заев и министерот Никола Димитров и дека нема да го потпише. 

Во ТВ-обраќање попладнево тој пред македонската јавност соопшти дека  договорот му бил доставен на увид утрово на средба со  Заев и Димитров на која, како што рече, им кажал дека е нивни личен договор, нивна лична одлука и нивна одговорност.

- Им укажав дека овој штетен договор претставува напуштање на досега изградените суштински државни позиции кои беа потврдени и на последните две лидерски средби. Тоа се неменување на Уставот и неприфаќање име за севкупна употреба или ерга омнес. Ваквиот штетен договор, кој е единствен во историјата на човештвото, за мене е недостоинствен и неприфатлив. Со него се крши Уставот, законите и се рушат државните институции. Нема да легализирам политички дивоградби. Владата не смогна сила и храброст да изградиме заеднички став и да се постигне национален консензус, истакна Иванов.

Целиот преговарачки процес, според Иванов, се одвивал несериозно,  неодговорно и нетранспарентно, за што сведочи и крајниот резултат. Нагласи дека текстот на договорот е поразителен за Република Македонија и со него не се предвидува само промена на уставното име, туку промена на преамбулата, како и на сите членови од Уставот каде се спомнува името и термините произлезени од името Македонија. 

- Дали е достоинствено да се информираат сите членки на ОН дека сте го промениле уставното име. Дали е достоинствено да ги прифатите сите грчки барања и ултиматуми. Дали е лидерство да се прифати текст на договор во кој нема никаква правна сигурност и гаранција за македонската страна. Со ваков договор се отвораат многу повеќе прашања и проблеми отколку што се затвораат. Прашања со несогледливи последици по македонската држава и македонскиот народ. Грција успеа да ги исполни своите максималистички барања. Одговорно тврдам дека тоа што го напрви со Македонците во Грција сега, преку овој договор, настојува да го направи со Македонците во Македонија, рече шефот на државата на обраќањето од „Вила Водно“. 

Со ваков договор, според претседателот, не се јакне македонскиот идентитет, туку се деградираат веќе стекнатите права кои ги имаме во Обединетите нации. Се погазува, рече, заветот на нашите предци кои го создаваа вековниот идеал и стремеж за  единствена Македонија, се погазува 73-годишното право на самоопределување и државност на македонскиот народ и се брише 27-годишната историја на независна македонска држава.

- Република Македонија  ја  губи својата суверена еднаквост  што произлегува од повелбата на Обединетите нации.  Повикувам да се престане да се злоупотребува остварувањето на нашите стратешки цели и определби. ЕУ и НАТО не смеат да бидат алиби за лош договор кој ќе предизвика несогледливи и штетни последици по државните и националните интереси  на Република Македонија. Ваквиот договор не го обединува општеството, туку дополнително го поларизира, рече Иванов. 

Како претседател, нагласи тој, и во иднина ќе се залага за изнаоѓање решение кое нема да го наруши достоинството на македонскиот народ и граѓаните на Република Македонија и го повика народот да не се плаши. 

- Мојот став е конечен - нема да ме поколебаат со никакви притисоци, уцени и закани. Нема да поддржам и потпишам ваков штетен текст на договор, заклучи претседателот Иванов во обраќањето пред македонската јавност.

Калеска -Ванчева: Пратениците во Собранието на Република Македонија ќе гласаат за усогласениот текст на реформскиот Закон за спречување на корупцијата и судир на интереси

Денеска пратениците во Собранието на Република Македонија ќе гласаат за усогласениот текст на реформскиот Закон за спречување на корупцијата и судир на интереси.

Закон со којшто конечно Македонија ќе добие силна и независна институција за борба против корупцијата.

Пратеничката група на СДСМ и на Коалицијата не отстапи од ставот да добиеме квалитетна законска рамка, којашто ќе овозможи функционирање на стручно, целосно независно антикорупциско тело, оневозможувајќи какви било партиски притисоци и злоупотреби.

Новата Државна комисија за спречување на корупцијата добива сериозни надлежности во контролата на финансирањето на политичките партии и во време на изборна кампања, но и во следење на законитоста на нивното редовно финансирање.

Со новото законско решение се врши допрецизирање на одредбата која овозможува директен увид во банкарските сметки, но само по покрената постапка.

Се овозможува увид во базите на податоци од 17 институции, меѓу кои и МВР, УЈП, Катастар, Царина, Централен регистар, Комисија за хартии од вредност…

Особено треба да се нагласи зајакнувањето на капацитетите на Државната комисија за спречување на корупцијата. Се формира Секретаријат кој ќе обезбеди неспречено спроведување на надлежностите, се зајакнува финансискиот капацитет на Комисијата, но и на вработени за кои се обезбедува додаток на плата до 30 проценти.

Вака усогласениот Предлог закон кој, верувам дека денеска едногласно ќе го усвоиме, обезбедува строги и прецизни критериуми за избор на нов состав на ДКСК. Мора да се нагласи дека за прв пат во историјата на Република Македонија ќе имаме јавно интервју на кандидатите, кое ќе се пренесува на собранискиот канал.

Истовремено, создаваме услови за целосна департизација на ова тело, со тоа што се оневозможува секој кој имал каква било врска со одредена политичка партија во последните десет години да се кандидира за член на ДКСК.

Со Предлог законот се врши усогласување со правото на ЕУ во областа на правосудството и фундаменталните права, а вклучени се и препораките на ГРЕКО, на експертските извештаи и на извештаите на ЕК за напредокот на земјата од 2015 и 2016 година.

Пратеничката група на СДСМ и Коалицијата е убедена дека преку конструктивен и ефикасен процес ќе избереме нов состав на Антикорупциската комисија, која непречено ќе го следи изборниот процес што следува.

Снежана Калеска -Ванчева, пратеничка од СДСМ и коалицијата

Наставничка нападнала колешка во Кавадарци

 Наставничка нападнала колешка во Кавадарци, информацијата за МИА ја потврди Верољуб Додевски, портпарол на СВР Велес.

-На ден 15 јануари 2019 година во Полициската станица  – Кавадарци педесет и четиригодишна жена од Кавадарци пријавила дека утрото, околу 08.30 часот, во наставничката канцеларија во училиште во Кавадарци, каде е вработена како наставничка, била физички нападната од нејзина колешка на возраст од 47 години, вели Додевски.

Тој не открива повеќе детали за инцидентот. 

Американец го преживеал 11 септември, но не и Најроби

Американскиот бизнисмен Џејсон Спиндер е еден од преживеаните во терористичкиот напад на Њујорк на 11 септември 2001 година, но немаше толку среќа да го преживее и нападот на џихадистите во Најроби, Кенија.

Џејсон ја основаше и управуваше фирмата Ај-дев интернешнал која е стационирана во главниот град на генија, а е еден од 14-те настрадани во завчерашниот терористички напад на луксузниот хотелски комплекс во Најроби, потврди неговата мајка.

Американскиот Стејт депатмент потврди дека меѓу настраданите има и еден американец, но не соопшти повеќе детали.

Два дена по нападот во хотелот во Најроби во кој загинаа 21 лице, црвениот крст на Книја соопшти дека деветнаесет лица сè уште се водат како исчезнати.

Одговорноста за нападот ја презеде терористичката организација Ал Шабаб со седиште во Сомалија, а опсадата на хотелскиот комплекс заврши со ликвидација на напаѓачите.

притисни ентер