Таков настан не можеше да помине без уникатни и луксузни автомобили.
Во главната улога беше Rolls-Royce Phantom IV од 1950 година во кој новата војвотка од Сасекс, Меган Маркл дојде на венчавката со принцот Хари.
Тој автомобил бил специјално направен за сегашната кралица Елизабета II, додека била принцеза.
Тоа бил првиот Rolls-Royce во сопственост на кралицата и нејзиниот принц Филип.
Пред новата принцеза, го користела и војвотката од Кембриџ, Кејт Мидлтон, на венчавката со принцот Вилијам во 2011 година.
Phantom IV е еден од 18-те Rolls-Royce автомобили направени во периодот од 1950-1956 година, а сите 18 се направени само за оние кои сопствениците на компанијата ги сметале за достојни.
Во моментот постојат само уште 16 Phantom IV, вклучувајќи го и овој кој ја имаше главната улога на венчавката.
Преостанатите 15 може да се пронајдат во музеите и другите јавни или приватни колекции.
Со оглед на тоа дека автомобилот е стар скоро 70 години, не е сигурно дека сите се во возна состојба.
Освен овој Rolls-Royce, на кралската венчавка се појавија уште неколку луксузни автомобили.
Како државниот Bentley од 2002 година, кој е еден од вкупно два кои се произведени, во кој пристигнаа кралицата Елизабета и принцот Филип.
Принцезата Кејт Мидлтон, војвотката од Кембриџ, во замокот Виндзор пристигна во Daimler DS 420s, со своите две постари деца, принцот Џорџ и принцезата Шарлота.
Оваа државна лимузина е во кралска употреба од 1992 година, а станува збор за еден од само три произведени примероци.
Откако го кажаа судбоносното “да“ принцот Хари и војвотката Меган заминаа со електричен Jaguar E-type Concept Zero.
Автомобилот е произведен во 1968 година, но во меѓувреме променет му погонот на електрична енергија.
Овој Јагуар има посебна регистрација E190518, бидејќи се венчаа на 19 мај 2018 година.
