Кучан: Македонија покажа решителност, ЕУ и НАТО да го исполнат својот дел од задачата

Претстојниот Самит во Софија ќе ги откочи интеграциските процеси за земјите од Западен Балкан кои беа блокирани поради неможноста за првенствено продлабочување на внатрешните односи меѓу земјите членки во ЕУ.

Претстојниот Самит во Софија ќе ги откочи интеграциските процеси за земјите од Западен Балкан кои беа блокирани поради неможноста за првенствено продлабочување на внатрешните односи меѓу земјите членки во ЕУ, што следствено требаше да доведе до прием на нови земји членки, оцени поранешниот словенечки претседател Милан Кучан на денешната средба со претседателот на Собранието Талат Џафери. 

- Кучан, како личен сведок на осамостојувањето на државата Македонија, нагласи дека земјата покрај соочувањето со препреки во внатрешните односи, се соочила и со препреки во надворешните односи со соседите, препреки кои не зависат од добрата волја од страна на Македонија, ниту од нејзините заложби, информира собраниската прес-служба.  

Словенија, нагласил Кучан, секогаш ќе ја поддржува Македонија во нејзините евроатлантски аспирации зашто успеа да демонстрира решителност и исполнителност на својот дел од задачата кон ЕУ и НАТО. - Сега останува на нив да го исполнат својот дел од таа задача, посочил поранешниот претседател на Словенија.

Претседателот на Собранието Џафери изразил задоволство од одличните односи меѓу двете земји кои, како што рекол, се без отворени прашања, но и благодарност за континуираната и принципиелна поддршка на Словенија за македонските евроатлантски интеграции.

Џафери го информирал соговорникот за случувањата во Македонија изминатата година, за донесувањето на пакетот реформски закони заедно со опозицијата како дел од приоритетните области од Планот 3-6-9, за потпишувањето и ратификацијата на Договорот со Бугарија во делот на подобрувањето на односите со соседите и интензивирањето на разговорите со Република Грција за надминување на спорот околу прашањето за името.

На средбата Џафери - Кучан присуствувале и пратениците од Пратеничката група за соработка со Парламентот на Република Словенија Фросина Ташевска Ременски,  Шпреса Хадри и  Неџбедин Каремани. /МИА

Оставката на Коѕијас главна тема во Грција

 Обвинувањата од Панос Каменос до Никос Коѕијас за лошо водење на тајните фондови, се чини, било тоа што ја прелеала чашата и го натера, сега веќе поранешниот, министер за надворешни работи на Грција да си поднесе оставка.

Грчките медиуми, детално ги анализираат причините за повлекувањето на Коѕијас, а несогласувањата на завчерашната владина седница, како за фондовите така и за Договорот од Преспа, биле само последната капка.

Според медиумите во Грција, меѓу шефот на дипломатија и премиерот во периодот кога беа затегнати грчко–руските односи се појавиле различни перцепции за одредени теми.

Како што јави дописничката на МИА од Атина, оставката на Никос Коѕијас и натаму е главна тема во Грција. Анализи, коментари, изјави, барање причини е она што преовладува во грчките медиуми.

„Жртвување на Коѕијас од Ципрас“; „Плати погрешен министер“; „Потчинетост на Каменос“; „Порака на Ципрас до повеќе страни: Нема да толерирам“; се дел од насловите во денешните изданија на грчките весници.

Според грчката телевизија „Антена“, Коѕијас сметал дека Ципрас не му дал доволна поддршка на владината седница, не застанал на негова страна во кавгата со Каменос и покрај политичката цена како потписник на Договорот од Преспа, но и личните напади врз него, со испратените куршуми, земја со крв и слично.

Весникот „Катимерини“, повикувајќи се на соработници на Коѕијас пишува дека, тој бил погоден од нападите на Каменос „дека е човек на Сорос и дека зема од фондовите“.  За време на владината седница, според истите извори, дополнителни навреди од министерот за одбрана до министерот за надворешни работи, предизвикал одново споменатиот предлог на Коѕијас да важи истиот закон за контрола на тајните фондови за сите министерства (меѓу кои и она на Каменос) како што важи за Министерството за надворешни работи.

Имено, Коѕијас сакал да преземе иницијатива, пратениците да изгласаат закон со кој, парламентот ќе биде надлежен за контрола на тајните фондови од сите министерства. До денес, единствено се контролираат фондовите од грчкото МНР, врз основа на законот предложен од самиот Коѕијас на почетокот на 2017.

Грчката телевизија „Скај“, но и други медиуми во Грција, коментираат дека односите меѓу Ципрас и Коѕијас се заладиле уште од кризата во грчко – руските односи. Тогаш, според Скај, немало суштински разлики, туку различни перцепции за одредени прашања. Не дека Ципрас не се согласувал со протерувањето на руските дипломати, туку не се согласувал со начинот на кој се управувало со ова прашање. Грчкиот премиер, дури размислувал, на закажаната посета на Москва на 7 декември, да замине сам, без Никос Коѕијас.

„Скај“, повикувајќи се на свои информации објави дека пред околу една година имало и друга оставка на Коѕијас која тогаш, не била прифатена од Ципрас.

Она што отвора прашања во Грција е кои ќе бидат следните чекори на Никос Коѕијас, кој не е член на владеачката СИРИЗА, туку е лидер на движењето на идеи и активност Прато од чии редови во грчкиот парламент има тројца пратеници. 

По оставката, за денес попладне, закажан е вонреден состанок на политичкиот секретаријат на движењето, додека пак во понеделник поранешниот министер за надворешни работи на Грција како лидер на Прато, ќе одржи говор на грчкиот остров Крит.

Исто така, енигма останува дали во грчкото МНР ќе се одржи примопредавање на функцијата меѓу Никос Коѕијас и Алексис Ципрас./МИА.

Спасовски: Македонија системски се бори против нелегалната трговија со оружје

Во изминативе години Македонија се фокусираше на градење интегриран, системски пристап кон борбата против нелегалната трговија со оружје и експлозивни материјали.

Свесни за фактот дека употребата и достапноста на нелегалното оружје директно негативно влијае не само врз сеопштите трендови во разните области од криминалот, туку и може директно да влијае врз дестабилизација на самите општества, во изминативе години Македонија се фокусираше на градење интегриран, системски пристап кон борбата против нелегалната трговија со оружје и експлозивни материјали.

Ова денеска го изјави министерот за внатрешни работи Оливер Спасовски обраќањето на Состанокот на локалните групи за координација за недозволена трговија со оружје на земјите од Западен Балкан. 

- Во изминатиот период МВР како институција во чија законска надлежност е справувањето со оваа проблематика, направи многу во стандардизацијата и имплементацијата на нормите, иницијативите, препораките по однос на воспоставување квалитетни и ефикасни рамки за превенција, контрола, но и откривање на нелегалната трговија со мало и лесно оружје, муниција, експлозивни материи, градејќи кредибилен, одржлив и интегриран национален концепт на делување, рече Спасовски.

Посочи оти Министерството подготви нова Национална стратегија за контрола на мало и лесно оружје која ги детерминира и дефинира новите трендови и предизвици, но и правците и приоритетите за дејствување, креирајќи координиран систем на меѓуинституционално делување на сите релевантни чинители, вклучително и граѓанскиот сектор.

Спасовски ја потенцира нужната заедничка соработка која што треба да ја даде суштинската логистика во успешната контрола на малото и лесно оружје и спречување на нелегалната трговија со истото.

- Тоа партнерство треба да биде клучната алка во синџирот, не само од аспект на размена на искуства и знаења, туку и од аспект на конкретна оперативна размена на податоци и спроведување заеднички операции. Верувам дека денешниот состанок, односно идеите, иницијативите што ќе бидат изнесени или разгледувани ќе дадат нов квалитет во насока на потесно и поефикасно заедничко делување, рече Спасовски на Состанокот на локалните групи за координација за недозволена трговија со оружје на земјите од Западен Балкан. 

Помпео: САД сериозно го сфаќаат исчезнувањето на Кашоги

Американскиот државен секретар Мајк Помпео изјави дека неговата земја сериозно го сфаќа исчезнувањето на саудискиот новинар Џамал Кашоги.

Тој ова го изјави за време на престојот во Турција каде што разговараше со претседателот Реџеп Таип Ердоган.

Според него, Ердоган јасно рекол оти Саудијците соработувале со турската истрага. КАШОГИ последен пат бил виден како влегува во саудискиот конзулат во Истанбул по документи во врска со неговата венчавка со една турска новинарка.

притисни ентер