ТВ дуел Заев-Мицкоски е можен во секое време, останува да се прецизира времето и локацијата

Премиерот Зоран Заев е подготвен во секое време и на која било национална телевизија да дебатира на сите теми од интерес за јавноста на евентуален лидерски дуел.

Kој апсолутно ќе се случи, а останува само да се прецизира времето и локацијата, вели владиниот портпарол Миле Бошњаковски, по вчерашното барање од лидерот на опозициската ВМРО-ДПМНЕ  Христијан Мицковски за ТВ дуел со премиерот.

- Основен принцип на  работата на премиерот Заев е отвореноста и така функционира и Владата. Наназад со години бараме дуел, секогаш сме биле подготвени,  комуницираме двонасочно и како Влада секогаш сме отворени за дуели, дебати, новинарски прашања на прес-конференции, рече денеска Бошњаковски.

Како што напомена, последниот премиерски дуел во државава беше во 1998 година, односно пред цели 20 години.

На редовната прес-конференција Бошњаковски наведе и дека можеби ВМРО-ДПМНЕ се во право оти не е точна бројката за советници на поранешниот премиер Никола Груевски што ја објави вчера Владата, затоа што, како што вели, таа ќе биде многу поголема откако ќе се најдат и обработат податоците за периодот од 2006 до 2010 година.

- Опозицијата излезе со информација вчера дека бројката од 91 можеби и не е точна. Можно е да се во право бидејќи  податоците од 2006 до 2010 година не се обработени, така што сигурно бројката ќе биде многу поголема од 91 советник. Во моментот, со бројот на советници на Никола Груевски од 2010 до 2016, сумата е тројно поголема од советниците на актуелнииот премиер Зоран Заев, што значи  во моментот кога ќе ги најдеме, а ќе ги најдеме документите од 2006  до 2010 година, оваа сума сигурно  ќе биде повеќе од тројно поголема, рече Бошњаковски.

Владината прес-служба вчера објави дека за 91 советник и надворешни соработници на поранешниот претседател на Владата Груевски годишно биле издвојувани 1,73 милиони евра.

Без струја утре поголем дел од Гевгелија и околината

Поголем дел од корисниците на електрична енергија во градот Гевгелија и околните населени места утре 10 часа ќе немаат струја поради изведување неопходни инвестициски зафати за подобрување на електро-мрежата.

Од гевгелиски ЕВН денеска соопштија дека во времето од 7 до 17 часот без електрично напојување ќе бидат фабриките во индустриската зона во северниот дел од градот Гевгелија и корисниците на булеварот „Гевгелија“ улиците „Маршал Тито“, „7 Ноември“, „Ристо Фршинин“ и „Илија Миов“, како и хотел казиното „Аполонија“.

Во околината на градот, утре прекин во електроснабдувањето ќе има во село Мрзенци, индустриската зона „Блокотехна“, оранжериите кај селото Прдејци, хотел казиното „Принцес“ и бензинската пумпа „Шимов“ на граничниот премин Богородица. Без струја, исто така, ќе бидат и сите индустриски корисници на излезот од Гевгелија кон селото Моин, вклучително и селата Моин и Ново Конско. /МИА

Оставката на Коѕијас главна тема во Грција

 Обвинувањата од Панос Каменос до Никос Коѕијас за лошо водење на тајните фондови, се чини, било тоа што ја прелеала чашата и го натера, сега веќе поранешниот, министер за надворешни работи на Грција да си поднесе оставка.

Грчките медиуми, детално ги анализираат причините за повлекувањето на Коѕијас, а несогласувањата на завчерашната владина седница, како за фондовите така и за Договорот од Преспа, биле само последната капка.

Според медиумите во Грција, меѓу шефот на дипломатија и премиерот во периодот кога беа затегнати грчко–руските односи се појавиле различни перцепции за одредени теми.

Како што јави дописничката на МИА од Атина, оставката на Никос Коѕијас и натаму е главна тема во Грција. Анализи, коментари, изјави, барање причини е она што преовладува во грчките медиуми.

„Жртвување на Коѕијас од Ципрас“; „Плати погрешен министер“; „Потчинетост на Каменос“; „Порака на Ципрас до повеќе страни: Нема да толерирам“; се дел од насловите во денешните изданија на грчките весници.

Според грчката телевизија „Антена“, Коѕијас сметал дека Ципрас не му дал доволна поддршка на владината седница, не застанал на негова страна во кавгата со Каменос и покрај политичката цена како потписник на Договорот од Преспа, но и личните напади врз него, со испратените куршуми, земја со крв и слично.

Весникот „Катимерини“, повикувајќи се на соработници на Коѕијас пишува дека, тој бил погоден од нападите на Каменос „дека е човек на Сорос и дека зема од фондовите“.  За време на владината седница, според истите извори, дополнителни навреди од министерот за одбрана до министерот за надворешни работи, предизвикал одново споменатиот предлог на Коѕијас да важи истиот закон за контрола на тајните фондови за сите министерства (меѓу кои и она на Каменос) како што важи за Министерството за надворешни работи.

Имено, Коѕијас сакал да преземе иницијатива, пратениците да изгласаат закон со кој, парламентот ќе биде надлежен за контрола на тајните фондови од сите министерства. До денес, единствено се контролираат фондовите од грчкото МНР, врз основа на законот предложен од самиот Коѕијас на почетокот на 2017.

Грчката телевизија „Скај“, но и други медиуми во Грција, коментираат дека односите меѓу Ципрас и Коѕијас се заладиле уште од кризата во грчко – руските односи. Тогаш, според Скај, немало суштински разлики, туку различни перцепции за одредени прашања. Не дека Ципрас не се согласувал со протерувањето на руските дипломати, туку не се согласувал со начинот на кој се управувало со ова прашање. Грчкиот премиер, дури размислувал, на закажаната посета на Москва на 7 декември, да замине сам, без Никос Коѕијас.

„Скај“, повикувајќи се на свои информации објави дека пред околу една година имало и друга оставка на Коѕијас која тогаш, не била прифатена од Ципрас.

Она што отвора прашања во Грција е кои ќе бидат следните чекори на Никос Коѕијас, кој не е член на владеачката СИРИЗА, туку е лидер на движењето на идеи и активност Прато од чии редови во грчкиот парламент има тројца пратеници. 

По оставката, за денес попладне, закажан е вонреден состанок на политичкиот секретаријат на движењето, додека пак во понеделник поранешниот министер за надворешни работи на Грција како лидер на Прато, ќе одржи говор на грчкиот остров Крит.

Исто така, енигма останува дали во грчкото МНР ќе се одржи примопредавање на функцијата меѓу Никос Коѕијас и Алексис Ципрас./МИА.

Спасовски: Македонија системски се бори против нелегалната трговија со оружје

Во изминативе години Македонија се фокусираше на градење интегриран, системски пристап кон борбата против нелегалната трговија со оружје и експлозивни материјали.

Свесни за фактот дека употребата и достапноста на нелегалното оружје директно негативно влијае не само врз сеопштите трендови во разните области од криминалот, туку и може директно да влијае врз дестабилизација на самите општества, во изминативе години Македонија се фокусираше на градење интегриран, системски пристап кон борбата против нелегалната трговија со оружје и експлозивни материјали.

Ова денеска го изјави министерот за внатрешни работи Оливер Спасовски обраќањето на Состанокот на локалните групи за координација за недозволена трговија со оружје на земјите од Западен Балкан. 

- Во изминатиот период МВР како институција во чија законска надлежност е справувањето со оваа проблематика, направи многу во стандардизацијата и имплементацијата на нормите, иницијативите, препораките по однос на воспоставување квалитетни и ефикасни рамки за превенција, контрола, но и откривање на нелегалната трговија со мало и лесно оружје, муниција, експлозивни материи, градејќи кредибилен, одржлив и интегриран национален концепт на делување, рече Спасовски.

Посочи оти Министерството подготви нова Национална стратегија за контрола на мало и лесно оружје која ги детерминира и дефинира новите трендови и предизвици, но и правците и приоритетите за дејствување, креирајќи координиран систем на меѓуинституционално делување на сите релевантни чинители, вклучително и граѓанскиот сектор.

Спасовски ја потенцира нужната заедничка соработка која што треба да ја даде суштинската логистика во успешната контрола на малото и лесно оружје и спречување на нелегалната трговија со истото.

- Тоа партнерство треба да биде клучната алка во синџирот, не само од аспект на размена на искуства и знаења, туку и од аспект на конкретна оперативна размена на податоци и спроведување заеднички операции. Верувам дека денешниот состанок, односно идеите, иницијативите што ќе бидат изнесени или разгледувани ќе дадат нов квалитет во насока на потесно и поефикасно заедничко делување, рече Спасовски на Состанокот на локалните групи за координација за недозволена трговија со оружје на земјите од Западен Балкан. 

притисни ентер