Гонзалез: Не сум задоволен од играта

Вардар со победа и со нов рекорд го заврши основниот дел од регионалната СЕХА лига. Но, по натпреварот против Нексе на кој „црвено-црните“ славеа со 29:25, тренерот на Вардар, Раул Гонзалез, изрази незадоволство од играта.
- Во првото полувреме не игравме добро, по одморот одигравме малку подобро, доволно колку за победа. Сега останува да се одмориме и добро да се подготвиме за фајнл-фор турнирот, кој се игра во Скопје, истакна Гонзалез.
И Игор Карачиќ по натпреварот наведе дека по полошиот прв дел уследило консолидирање за историската победа во СЕХА.
- Нексе беше одлично подготвен, а ние влеговме малку лошо во првиот дел, но во вториот дел притиснавме. Со помош на некои играчи кои беа распожени дојдовме до победа со која влеговме во историјата на СЕХА. Сега останува да се одмориме, а потоа да се подготвуваме за Ф4 во СЕХА и за Лигата на шампионите, нагласи Карачиќ.
Вардарци ја забележаа 17 победа и станаа единствениот тим во регионалното натпреварување кој успеал да дојде до едно вакво остварување.
Досегашниот рекорд беше сопственост на унгарски Веспрем со 16 победи и две ремија.
За Вардар во регионалното натпреварување следен предизвик е фајнл-форот во СЕХА лигата, кој се игра од 13-15 април во Скопје./MИА

Наполи го претстави Карло Анчелоти за нов тренер

Италијанскиот фудбалски клуб Наполи го претстави Карло Анчелоти за нов тренер.

Фудбалскиот стручњак потпиша тригодишен договор вреден 6,5 милиони евра по сезона.

Претседателот на клубот Аурелио де Лаурентис пред неколку часа соопшти дека ја прекинале соработката со тренерот Маурицио Сари.

Анчелоти претходно беше тренер на Парма, Милан, Јувентус, Челзи, Реал Мадрид, ПСЖ и последно во Баерн Минхен. За него ова ќе биде прво враќање во Серија А по девет години.

Наполи заврши на второто место во Серија А  и следната сезона ќе игра во Лигата на шампионите./МИА

Леконт: Ѓоковиќ веднаш требаше да го оперира лактот

Поранешниот француски тенисер Анри Леконт изјави дека проблемот на Новак Ѓоковиќ е од ментална природа и се забележува дека не ужива на теренот. 

Според Леконт, најдобриот српски тенисер донел лоша одлука кога станува збор за неговото лечење и веднаш требало да замине на операција на лактот.

- Проблемот на Ѓоковиќ е од ментална природа. Мора да бидете решителни и да уживате во процесот на враќање. Се сомневам дека тој ужива на теренот, а треба да верува и да си докаже на себеси дека тоа е можно. Тој е одличен играч и мора повторно да освојува големи натпревари, но факт е дека не се врати на вистинскиот начин, потенцира поранешниот француски тенисер.

Според него за Ѓоковиќ не би било добро повторно да соработува со Борис Бекер.

- Најголемата грешка на Ѓоковиќ беше тоа што премногу долго ја одложуваше операцијата  на лактот, истакна Леконт.

Ѓоковиќ по тешкиот старт во 2018 година и по разочарувачките резултати, конечно на турнирот во Рим почна да игра на повисоко ниво, но се уште далеку од неговите најдобри периоди./МИА

Наполи го отпушти тренерот Маурицио Сари

Италијанскиот фудбалски клуб Наполи го отпушти тренерот Маурицио Сари.

- Му благодариме на Маурицио Сари на драгоцената посветеност во Наполи, кој на овој град и навивачите ширум светот им донесе убави емоции и престиж, создавајќи стил на игра на кој му се воодушевуваа сите, напиша претседателот на клубот Аурелио де Лаурентис.

Фудбалскиот стручњак ќе добие обесштетување од половина милион евра, бидејќи Наполи му врачи отказ пред први јуни.

Сари е прв кандидат да го наследи Антонио Конте во Челзи, а на неговото место во Наполи треба да дојде Карло Анчелоти. Се очекува Анчелоти наскоро и официјално да биде претставен како нов тренер на Наполи./МИА

притисни ентер