МЗТ против Олимпија по четвртиот триумф во АБА лигата

Екипата на МЗТ Скопје Аеродром попладнево, на домашен терен во салата „Јане Сандански“, ќе го пречекаат тимот на Петрол Олимпија на отворањето на 19. коло од АБА-лигата.

„Сино-белите“ во пресметката со „змајчеки“ ќе пробаат да дојдат до четвртиот триумф во регионалното натпреварување, без разлика на проблемите со повредените играчи со кои тренерот Жељко Лукајиќ се соочува веќе подолго време.

- Во секој натпревар влегуваме со желба за победа и за стабилизација на играта. Не следат милион работи кои мора да ги решаваме во од, но мора да го вежбаме и карактерот. Се надевам дека ќе успееме да решиме еден голем проблем, а тоа е играта против агресивна одбрана, што се покажа како лош дел од нашата игра. На такви работи мора да обрнеме поголемо внимание, бидејќи поради противничкиот пресинг имаме голем број загубени топки. Се надевам дека веќе на мечот против Петрол Олимпија ќе имаме одреден одговор на тоа бидејќи овие денови напорно трениравме на овој сегмент, вели тренерот Лукајиќ.

Ова ќе биде 12. меч на двата тима во регионалната лига. Досегашниот меѓусебен скор е 6-5 во корист на Петрол Олимпија. 

Наполи го претстави Карло Анчелоти за нов тренер

Италијанскиот фудбалски клуб Наполи го претстави Карло Анчелоти за нов тренер.

Фудбалскиот стручњак потпиша тригодишен договор вреден 6,5 милиони евра по сезона.

Претседателот на клубот Аурелио де Лаурентис пред неколку часа соопшти дека ја прекинале соработката со тренерот Маурицио Сари.

Анчелоти претходно беше тренер на Парма, Милан, Јувентус, Челзи, Реал Мадрид, ПСЖ и последно во Баерн Минхен. За него ова ќе биде прво враќање во Серија А по девет години.

Наполи заврши на второто место во Серија А  и следната сезона ќе игра во Лигата на шампионите./МИА

Леконт: Ѓоковиќ веднаш требаше да го оперира лактот

Поранешниот француски тенисер Анри Леконт изјави дека проблемот на Новак Ѓоковиќ е од ментална природа и се забележува дека не ужива на теренот. 

Според Леконт, најдобриот српски тенисер донел лоша одлука кога станува збор за неговото лечење и веднаш требало да замине на операција на лактот.

- Проблемот на Ѓоковиќ е од ментална природа. Мора да бидете решителни и да уживате во процесот на враќање. Се сомневам дека тој ужива на теренот, а треба да верува и да си докаже на себеси дека тоа е можно. Тој е одличен играч и мора повторно да освојува големи натпревари, но факт е дека не се врати на вистинскиот начин, потенцира поранешниот француски тенисер.

Според него за Ѓоковиќ не би било добро повторно да соработува со Борис Бекер.

- Најголемата грешка на Ѓоковиќ беше тоа што премногу долго ја одложуваше операцијата  на лактот, истакна Леконт.

Ѓоковиќ по тешкиот старт во 2018 година и по разочарувачките резултати, конечно на турнирот во Рим почна да игра на повисоко ниво, но се уште далеку од неговите најдобри периоди./МИА

Наполи го отпушти тренерот Маурицио Сари

Италијанскиот фудбалски клуб Наполи го отпушти тренерот Маурицио Сари.

- Му благодариме на Маурицио Сари на драгоцената посветеност во Наполи, кој на овој град и навивачите ширум светот им донесе убави емоции и престиж, создавајќи стил на игра на кој му се воодушевуваа сите, напиша претседателот на клубот Аурелио де Лаурентис.

Фудбалскиот стручњак ќе добие обесштетување од половина милион евра, бидејќи Наполи му врачи отказ пред први јуни.

Сари е прв кандидат да го наследи Антонио Конте во Челзи, а на неговото место во Наполи треба да дојде Карло Анчелоти. Се очекува Анчелоти наскоро и официјално да биде претставен како нов тренер на Наполи./МИА

притисни ентер