Гудиќ: Македонија поканета да се приклучи во „Спортските игри за млади“

Македонија е поканета да се приклучи во најголемата манифестација во рамки на аматерскиот спорт во Европа, за учениците од основните училишта, информира извршниот директор на Регионалната организација на „Спортските игри за млади“ Тихомир Гудуќ.

Тој нагласи дека промовираат дружење, негување на вистинските вредности, спортски активности и фер плеј, толеранција и почитување на различностите. Појасни дека уште од првите игри до денес, апсолутно се за децата е бесплатно, а право на учество има секое дете.

- Програмата на игрите дава можност на сите кои сакаат да се дружат и уживаат во спортските активности. Учесниците можат, но не мораат да бидат активни спортисти. Доволно е да се вљубеници во здравиот начин на живот, да имаат желба да се дружат со нас, да ги пробаат своите можности во некоја спортска дисциплина. Токму затоа Игрите се алтернатива на сите негативни трендови на секојдневието, вели Гудиќ.

Делегација од „Спортските игри за млади“ на почетокот на минатиот месец се сретна со премиерот Зоран Заев. На средбата биле претставени планот и иницијативата за развоја на „Спортските игри за млади“ и на територијата на Република Македонија, а била упатена директна покана до премиерот за пристапување и приклучување кон регионалниот СИМ проект.

- Многу сум задоволен од состанокот и средбата со премиерот Заев, кој е човек со голема и позитивна енергија. Веќе на прв впечаток ги препозна сите предности на СИМ проектот. Ја почитувам неговата борба и се она што го направи за Република Македонија. Ме воодушеви со тоа што искрено го сака спортот, како и со фактот дека е тимски играч. Многу е ефикасен, односно да се изразам со вистинскиот збор, тој е човек од акција. Ја уважува и почитува секоја професија имајќи предвид дека веднаш пристапи оперативно на разработка на планот во присуство на своите соработници, директорот на Агенцијата за спорт и млади Дарко Каевски, како и специјалниот советник за спорт во Владата Даниел Димевски, кои исто така оставија поволен впечаток на членовите на нашата делегација. Тимот на премиерот со нас сега работи на подготовка на планот, потребите и можностите, нагласи Гудиќ.

Доколку дојде до покренување на проектот, како што вели, постои можност првиот човек на СИМ за Македонија да биде поранешниот ракометен репрезентативец на Македонија, Наумче Мојсовски. Гудиќ нагласи дека се направени прелиминарни разговори со него, а тој ја прифатил поканата.
Во рамки на „Спортските игри за млади“ се организираат натпревари во десет спортски дисциплини: мал фудбал, одбојка на песок, уличен баскет, одбојка, игри меѓу два огна, пинг-понг, тенис, атлетика и шах. И покрај тоа што се работи за аматерско спортување, натпреварите се организирани на професионално ниво, со сите пропозиции и со постојните правила за секоја спортска дисциплина.

„Спортските игри за млади“ се одржуваат веќе 22 години во Република Хрватска, осум во Босна и Херцеговина и пет сезони во Република Србија. Победниците на државните првенства во сите земји, во сите спортови ќе изборат пласман за учество на Големото меѓународно финале на „Спортките игри за млади“, кое по традиција се одржува секоја година во Сплит. Градот домаќин во Хрватска ќе нагости вкупно 1.300 дечиња, тренери, спортски работници и други гости.

Игрите се одржуваат под покровителство на владите на земјите во кои се реализираат.

Костадиновска-Стојчевска во Пустец: Преку соработка во културата ја зајакнуваме врската

Преку соработка во културата ја зајакнуваме врската со нашинците во Преспа.

Министерката за култура Бисера Костадиновска-Стојчевска заедно со директорката на Заводот и музеј – Битола, Мери Стојанова, го посети Музејот посветен на ликот и делото на албанскиот писател со македонско потекло, Стерјо Спасе, во селото Глобочани, каде што оствари средба со градоначалникот на Општина Пустец, Пали Колефски.

Како што соопшти Министерството за култура, посетата е по повод продолжувањето на прекуграничната соработка со Албанија во рамките на програмата ИПА со проектот „Смарт4Ју2“, чија цел е да ги афирмира културните вредности што ги поседува регионот и да ги развие туристичките потенцијали на општините Битола, Пустец и Корча.

-Преку соработка во културата, ја зајакнуваме врската со нашинците во Преспа. Успешната реализација на заедничките проекти носи придобивки за граѓаните од двете страни на границата. Културата и културното наследство даваат идентитетско значење на луѓето од овој регион, а од економски аспект, претставуваат значаен туристички потенцијал, рече на средбата министерката за култура Костадиновска-Стојчевска.

На средбата со градоначалникот на Општина Пустец, Колефски, се наведува во соопштението, беше потврдена заемната заложба за зачувување на нашето културно наследство бидејќи, како што кажа Костадиновска-Стојчевска, тоа значи зачувување и на нашиот културен и национален идентитет.

- Kолефски ги најави новите планови и активности во Глобочани, а беа разменети идеи за нови проекти за унапредување на соработката преку културната размена и промоција на туристичкиот потенцијал на овој регион, со цел подобрување на економскиот развој и животниот стандард на граѓаните што живеат во Преспа. Од страна на министерката Бисера Костадиновска-Стојчевска беше посочено дека Министерството за култура, преку традиционалната поддршка на манифестацијата „Македонско културно лето во Пустец и во Корча“, останува партнер во заедничките заложби за негување на македонската култура, идентитет и традиција во овој прекуграничен регион, соопшти Министерството за култура.

Директорката на Заводот и музеј од Битола, Мери Стојанова, информираше дека продолжуваат активностите што се планирани за наредниот период, за искористување на ЕУ-можностите за развој на културата и заштитата на културното наследство, и укажа на нови можности за соработка со општините Пустец и Корча.

-Проектот „SMART4YOU2“, кој е поддржан од Програмата за прекугранична соработка на Европската Унија, има буџет во вкупен износ од милион и двесте илјади евра европски неповратни средства за развивање на културните и туристичките потенцијали на прекуграничниот регион, се наведува во соопштението.

Во рамките на еднодневната посета, министерката за култура Костадиновска-Стојчевска ќе оствари средба со префектот на округот Корча, Нерти Јоли.

Тухел: Пласманот на табелата не е важен во дербито со Борусија

Тренерот на Баерн Минхен, Томас Тухел не смета дека дербито против Борусија Дортмунд ќе биде помалку интересно поради пласманот на двата тима во Бундеслигата.

Обично тоа е директен судир во борбата за титулата, но реалноста сега е поинаква. Шампионите заостануваат 10 бода зад лидерот Баер Леверкузен, а тимот од Вестфален е четврти.

- Пласманот е таков каков што е. Но, ние имаме шанса да го освоиме „Der Klassiker“. Станува збор за емотивен натпревар кој е историски за Бундеслигата и спротиставува два големи ривали. Значи нема разлика од претходните сезони, истакна Тухел.

На дуелот на „Алијанц Арена“ домаќините ќе бидат без капитенот Мануел Нојер, кој се уште чувствува болки од повреда. Александер Павловиќ, Рафаел Гереиро и Саша Бои исто така се аут од истата причина. Сепак, Хари Кејн се враќа и ќе игра откако пред неколку дена ги пропушти пријателските дуели во Англија поради повреда.

- Во лицето на Дортмунд очекувам противник кој ќе сака да не победи. Борусија е силна во нападот, а генерално играчите претпочитаат да ја контролираат топката. Ќе биде отворен натпревар. Инаку, нашето расположение е одлично, бидејќи во последно време сме убедливи и во нападот, мирен е Тухел.

Тој одби да ги коментира информациите дека Чаби Алонсо одлучил да остане во Баер Леверкузен и следната сезона. Шпанецот беше меѓу имињата кои се поврзуваа за наследник на Тухел во Минхен.

-Не сум сигурен дека сум вистинската личност за прашањето. Ова е одлука на Чаби, прашајте го него, изјави тој.

Еден од главните шефови на Камора се согласил да соработува со властите по четврт век во затвор

По повеќе од 25 години затвор и одбивање да зборува, еден од главните шефови на италијанската комора, Франческо Скијавоне, одлучи да соработува со обвинителството, објавија италијанските медиуми, пренесе Бета.

Истражните органи се надеваат дека ќе добијат повеќе информации за Камора и нејзината можна поврзаност со италијанската политичка сцена.

Седумдесетгодишниот Скијавоне бил еден од основачите и „кум“ на кланот Камора „Касалези“ во провинцијата Касерта во близина на Неапол.

Пред неколку недели, како што јави ДПА, тој воспоставил контакт со антимафијашките служби.

Двајца од неговите синови соработуваат со властите од 2018 и 2021 година, а уште двајца се во затвор.

Камора е една од најозлогласените мафијашки организации во светот, а нејзиното родно место се јужните италијански провинции Казерта и Неапол.

притисни ентер